فوتو: جەڭىس ىسقاباي, Olympic.kz
«ەلدوس ءوزىنىڭ ناعىز كاسىبي سپورتشى, حاس شەبەر ەكەنىن تاعى ءبىر رەت دالەلدەدى. جارتىلاي فينالداعى بەلدەسۋ فينالدىق جەكپە-جەك دارەجەسىندە ءوتتى. جارتىلاي فينالدىڭ وتە قيىن بولعانىنا قاراماستان, ەلدوس سوڭىنا دەيىن جان اياماي كۇرەستى. ەلدوستىڭ جۇلدەسى قالعان بارلىق سپورتشىلارىمىزعا جول اشىپ, شابىت بەرەدى دەپ سەنەمىز», دەگەن ا.كريۋكوۆ قازىرگىدەي جاعدايدا سپورتشىلاردىڭ دەنساۋلىعى مەن قاۋىپسىزدىگى ماڭىزدى ەكەنىن العا تارتتى. ونىڭ ايتۋىنشا, وليمپيادا قالاشىعىندا قازاقستاندىق دەلەگاتسيانىڭ 120-عا جۋىق مۇشەسى بار. ولاردىڭ جاعدايى جاقسى. سپورتشىلارىمىز قاۋىپسىزدىك شارالارى مەن تالاپتارىن ورىنداپ, تاۋلىك بويى دارىگەر, فيزيوتەراپەۆت, پسيحولوگ ماماندارىنىڭ ءجىتى باقىلاۋىندا.
دزيۋدودان قازاقستان ەرلەر قۇراماسىنىڭ باس جاتتىقتىرۋشىسى عالىمجان جىلگەلديەۆ ەلدوستىڭ بۇل وليمپياداداعى ماقساتى التىن مەدال بولعانىن العا تارتتى. «دەگەنمەن, ە.سمەتوۆتەن باسقا سىنعا تۇسەتىن سپورتشىلار بار. ولار دا ءبىزدى قۋانتىپ, قورجىنىمىزعا التىن مەدال سالادى دەپ سەنەمىز», دەدى باس جاتتىقتىرۋشى.
ءوز كەزەگىندە ەلدوس سمەتوۆ پاندەميا جاعدايىندا جارىستىڭ كورەرمەنسىز ءوتۋى, تريبۋنالاردان جانكۇيەرلەردىڭ قولداۋى مەن داۋىسىن ەستي الماۋ سپورتشىلارعا كەرى اسەرىن تيگىزگەنىن ايتتى. سوعان قاراماستان, بۇل سايىستا 100 پايىز بارىمدى سالدىم دەدى سپورتشى.
«بۇل مەنىڭ ەكىنشى وليمپيادام. وسى جولى باپكەرلەرىممەن بىرگە ءبىرىنشى وليمپيادادا بۇيىرماي قالعان التىن ءۇشىن كۇرەسكەن بولاتىنبىز. بىراق بۇيىرعانى قولا مەدال بولدى. قولىمنان كەلگەننىڭ بارلىعىن جاسادىم. قۋانىشتىمىن. سەبەبى قولا مەدالمەن بولسا دا ەلىمنىڭ بايراعىن جەلبىرەتۋ مەن ءۇشىن ۇلكەن مارتەبە», دەدى ە.سمەتوۆ.
