ايماقتار • 25 شىلدە، 2021

باتىس قازاقستان: اۋىل اكىمىن سايلاۋ

61 رەت كورسەتىلدى

باتىس قازاقستان وبلىسىنىڭ 31 اۋىلدىق وكرۋگىندە اۋىل اكىمدەرىنىڭ سايلاۋى ءجۇرىپ جاتىر. بۇگىنگى سايلاۋ بارىسىن ءوز كوزىمەن كورۋ ءۇشىن گازەت ءتىلشىسى تەرەكتى اۋدانىنا قاراستى №352، 353، 384 سايلاۋ ۋچاسكەلەرىن ارالاپ قايتتى دەپ حابارلايدى Egemen.kz.

باتىس قازاقستان وبلىسىندا بۇگىن 79 سايلاۋ ۋچاسكەسى جۇمىس ىستەپ، 31 اۋىلدىق وكرۋگتىڭ اكىمى سايلانىپ جاتىر. سونىڭ ىشىندە ءبىز بارعان تەرەكتى اۋدانىندا 4 اۋىلدا سايلاۋ وتۋدە ەكەن. اۋدانداعى ەڭ ۇلكەن ەلدىمەكەن – پودستەپنوي اۋىلدىق وكرۋگى اۋماعىندا 10370 ادام تۇرادى. 6712 سايلاۋشى وكرۋگ اۋماعىنداعى 5 سايلاۋ ۋچاسكەسىنەن داۋىس بەرىپ جاتىر ەكەن. ءبىز اۋىلدىق مادەنيەت ۇيىندە ورنالاسقان №384 سايلاۋ ۋچاسكەسىنە تاڭەرتەڭگى 10.00. ساعات شاماسىندا باردىق. مادەنيەت ءۇيى الدىندا ۇيىمداسىرىلعان اۋىل شارۋاشىلىعى جارمەڭكەسى، الىستان ەستىلەتىن قازاقى اۋەندەر بۇگىنگى ءىس-شاراعا مەرەكەلىك سيپات بەرىپ تۇر ەكەن.

«2197 سايلاۋشى بار تىزىمدە، قازىرگى ۋاقىتتا ءبىرىنشى رەت بولىپ جاتقان سايلاۋ عوي، كەلىپ جاتقان كىسىلەردىڭ كوڭىل-كۇيى جاقسى، ۇلكەن ادامدار مەيرام سياقتى كەلىپ جاتىر، ءبىزدى مەيراممەن قۇتتىقتاپ جاتىر، كۇتىپ وتىرمىز، جاقسى دايىندىق ءوتتى. كەنتتىڭ وزىندە 3 سايلاۋ بولىمشەسى بار. حالىققا ريزامىز، كارانتيندىك تالاپتاردى ءتۇسىنىپ، ساقتىق شارالارىن ساقتاپ جاتىر. ءبىزدىڭ سايلاۋ ۋچاسكەسى بويىنشا ەكى ساعاتتىڭ ىشىندە تىركەلگەن سايلاۋشىلاردىڭ 12 پايىزى داۋىس بەردى»، دەيدى №384 سايلاۋ ۋچاسكەلىك سايلاۋ كوميسسياسىنىڭ توراعاسى گۇلايىم ساعىندىققىزى.

ءبىز كولىك تىرەگەن كەلەسى مەكەن – اقسۋات اۋىلى بولدى. وكرۋگتە جالپى سانى 2967 ادام تۇرادى. وكرۋگ قۇرامىنا ورتالىقتان بولەك ماگيسترالنوە، پويما، ايتيەۆ سەكىلدى شاعىن اۋىلدار كىرەدى. وبلىس ورتالىعىنا جاقىن، توپىراعى قۇنارلى، سۋلى-نۋلى جەردە ورنالاسقاندىقتان، حالىقتىڭ ءال-اۋقاتى جاقسى ەكەنى سەزىلىپ تۇر. وكرۋگتە ەڭبەككە جارامدى 1355 ادامنىڭ 1277-ءسى جۇمىسپەن قامتىلعان. وكرۋگ اۋماعىندا ءونىمى كورشىلەس شەتەلدەرگە دە شىعارىلاتىن اتاقتى كۇنباعىس مايى زاۋىتى جۇمىس ىستەپ تۇر. اۋىلدا 5 زاڭدى تۇلعا، 12 جەكە كاسىپكەر، 11 شارۋا قوجالىعى بار ەكەن.

«اۋىلدا تىركەلگەن 734 سايلاۋشىمىز بار. قازىرگى جاعدايعا قاراعاندا حالىقتىڭ بەلسەندىلىگى جامان ەمەس»، دەيدى №352 سايلاۋ ۋچاسكەسىنىڭ توراعاسى ەرجان قۇرمانوۆ.

ءبىر قىزىعى، اقسۋات اۋىلىنىڭ تىزگىنىن ۇستاۋعا نيەت بىلدىرگەن ەكى ۇمىتكەر دە بۇرىن بۇل اۋىلدا تۇرماعان، سىرتتان كەلگەن ازاماتتار ەكەن. پاندەميانىڭ ورشۋىنە بايلانىستى سايلاۋالدى ۇگىت-ناسيحات كەزەڭىندە ۇمىتكەرلەر جيىن جاساپ، اۋىل حالقىمەن كەزدەسە المادى. كوپ ءىس-شارا الەۋمەتتىك جەلىلەر ارقىلى ءوتتى. وكرۋگتى ارالاپ، پىكىر يەلەرىمەن، اۋىل اقساقالدارىمەن، بەلسەندى توپتارمەن كەزدەسكەن كەيبىر ۇمىتكەر ەلدىڭ ەسىندە قالىپتى.

«وسى پويما اۋىلىندا 1996 جىلدان بەرى تۇرامىن. اۋىلىمنىڭ بولاشاق اكىمىن سايلاۋعا تۇڭعىش رەت كەلىپ تۇرمىن. بۇگىنگى سايلاۋ ۇيىمشىلدىقپەن ءوتىپ جاتقان سياقتى. ەكى كانديداتتىڭ بىرەۋىن جاقسى تانيمىن. اۋىلدى ارالاپ، كەلىپ جۇرگەندە اڭگىمەسىن تىڭداپ ەدىم. قولىنان ءىس كەلەتىن، لايىقتى جىگىت سياقتى. داۋىسىمدى سوعان بەردىم»، دەيدى 71 جاستاعى قابي بەكتەنوۆ.

بايقاعانىمىز، وكرۋگ اۋماعىندا ۇيالى بايلانىس، ءموبيلدى ينتەرنەت ساپاسى جاقسارتۋدى قاجەتسىنىپ تۇر ەكەن. ماگيسترالنىي مەن ايتيەۆ اۋىلدارىنا كىرەبەرىس جولدارعا دا جوندەۋ قاجەت. ەستۋىمىزشە، بۇل ەكى اۋىلدىڭ كىرەبەرىس جولىن جوندەۋگە قاجەتتى 140 ملن تەڭگەگە بيۋدجەتتىك ءوتىنىم جولدانعان كورىنەدى. پويما اۋىلىنداعى باستاۋىش مەكتەپ عيماراتى تا كوزگە قوراشتاۋ كورىندى. مۇنىڭ ءبارىن ەل تاڭداعان اۋىل اكىمى اۋدان باسشىلارىنىڭ الدىنا قويىپ، ماسەلەنى وڭىنان شەشسە كەرەك.

«جەرگىلىكتى ۋاقىتپەن تۇسكى ساعات 11.00-دە باتىس قازاقستان وبلىسى بويىنشا سايلاۋشىلاردىڭ 29 پايىزى داۋىس بەردى»، دەپ حابارلادى باتىس قازاقستان وبلىستىق سايلاۋ كوميسسياسىنىڭ توراعاسى عايسا قاپاقوۆ.

جوعارىدا ايتقانىمىزداي، 31 اۋىلدىق وكرۋگ اكىمىنىڭ ورنىنا وسى سايلاۋدا بارلىعى 81 كانديدات تىركەلگەن بولاتىن. سونىڭ ىشىندە 39 كانديداتتى پارتيالار ۇسىنسا، 42-ءسى – ءوزىن ءوزى ۇسىنعان ازاماتتار ەكەن.

«سايلاۋ بارىسىندا 11 ادام ويىنان اينىپ، ءوز كانديداتۋراسىن الىپ تاستادى. بۇگىن ساعات 7-دە سايلاۋ ءوتۋى ءتيىس 79 بولىمشە ەسىگى ايقارا اشىلدى، 488 كوميسسيا مۇشەسى كارانتين تالاپتارىن ساقتاپ، حالىققا ءوز تاڭداۋىن جاساۋعا كومەك كورسەتىپ جاتىر. سايلاۋ ۋچاستوكتارىندا 184 ادام بايقاۋشى بولىپ تىركەلگەن. ونىڭ 79-ى – كانديداتتاردىڭ سەنىمدى وكىلى بولسا، 62 ادام– قوعامدىق ۇيىمداردان، 43 ادام – ساياسي پارتيالار تاراپىنان جىبەرىلگەن باقىلاۋشىلار»، دەدى عايسا قاپاقوۆ.

كۇندىزگى ساعات 11-دەگى مالىمەت بويىنشا اقجايىق اۋدانىندا – سايلاۋشىلاردىڭ 16 پايىزى، بوكەيوردا اۋدانىندا – 29 پايىز، بورلىدە – 23، بايتەرەك اۋدانىندا – 34 پايىز، جاڭاقالادا – 33، قازتالوۆ اۋدانىندا – 39، قاراتوبەدە – 34، سىرىمدا – 41 پايىز، تەرەكتى اۋدانىندا – سايلاۋشىلاردىڭ 27 پايىزى داۋىس بەرگەن. جالپى وبلىس بويىنشا – 29 پايىز سايلاۋشى تاڭداۋىن جاساعان.

ايتا كەتەيىك، سايلاۋ ۋچاسكەلەرىندەگى قوعامدىق ءتارتىپ پەن كارانتيندىك تالاپتاردىڭ ساقتالۋىن قاداعالاپ، 130-داي پوليتسيا قىزمەتكەرى كەزەكشىلىك ەتىپ ءجۇر ەكەن. باتىس قازاقستان وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆ پەن وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى، پوليتسيا پودپولكوۆنيگى ەرنار سۇلتانعاليەۆتىڭ ايتۋىنشا، سايلاۋ كەزىندە زاڭبۇزۋشىلىق وقيعا تىركەلمەگەن، ءبارى ويداعىداي وتۋدە.

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار