ايماقتار • 25 شىلدە، 2021

اكىمدەر سايلاۋى: ت.رىسقۇلوۆ اۋدانىندا 98 جاستاعى قاريا تاڭداۋىن جاساپ، باتاسىن بەردى

59 رەت كورسەتىلدى

مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، بۇگىن ەلىمىزدە العاش رەت اۋىل اكىمدەرىنىڭ سايلاۋى وتۋدە. ساياسي ناۋقانعا جامبىل وبلىسىنان 38 اۋىلدىق وكرۋگ بويىنشا 122 كانديدات ۇسىنىلىپ، 116 كانديدات تىركەلگەن، دەپ حابارلايدى Egemen.kz.

سايلاۋ ت.رىسقۇلوۆ اۋدانىندا دا جوعارى دەڭگەيدە وتۋدە. اۋداننىڭ اباي، تەرەڭوزەك، جاڭاتۇرمىس، قوراعاتى، قاراقىستاق، اقىرتوبە، قايىڭدى جانە ورنەك اۋىلدىق وكرۋگتەرىندە 16 سايلاۋ ۋچاسكەسى جۇمىس ىستەپ تۇر. ناتيجەسىندە اۋداندا 8 اۋىلدىق وكرۋگتىڭ اكىمى سايلاناتىن بولادى.

اۋىل تۇرعىندارى دا ساياسي ناۋقانعا بەلسەنە قاتىسۋدا. ماسەلەن، قاراقىستاق اۋىلىنىڭ تۇرعىنى، كامەلەت جاسىنا بيىل تولعان شاكارىم ابدىمالىك ۇلى العاش رەت اۋىل اكىمدەرىنىڭ سايلاۋىندا №349 سايلاۋ ۋچاسكەسىنە بارىپ، ءوز تاڭداۋىن جاسادى. سونداي-اق، اۋىل اكىمدەرىنىڭ جاڭا فورماتتاعى سايلاۋىنا اباي اۋىلدىق وكرۋگىندەگى №346 سايلاۋ ۋچاسكەسىندە كوميسسيا توراعاسى، ارداگەر رىسبەك سەكەربەكوۆ پەن وزگە ۇلت وكىلى ناگيما بەكپانوۆا دا داۋىس بەرسە، جاڭاتۇرمىس اۋىلىنىڭ 98 جاستاعى تۇرعىنى، ۇلى وتان سوعىسىنىڭ ارداگەرى شالدانباي شاڭباەۆ ءوز تاڭداۋىن جاساۋمەن قاتار، ۇمىتكەرلەرگە اق باتاسىن دا بەردى.

ۇيىمداستىرۋشىلار تاراپىنان سايلاۋ ۋچاسكەسىنە ەڭ ءبىرىنشى كەلىپ داۋىس بەرگەندەرگە، تۇڭعىش رەت تاڭداۋ جاساعاندارعا، سايلاۋ كۇنى تۋعاندارعا جانە جاسى ەڭ ۇلكەن سايلاۋشىلارعا ارنايى سىيلىقتار بەرىلدى.

جالپى، سايلاۋدا ت.رىسقۇلوۆ اۋدانى بويىنشا ءار اۋىلدىق وكرۋگتەن 3 كانديداتتان بارلىعى 24 كانديدات باق سىناۋدا. ونىڭ ىشىندە 9 كانديدات ءوزىن-ءوزى ۇسىنۋ جولىمەن سايلاۋعا تۇسسە، 7 كانديدات Nur Otan پارتياسىنان جانە 8 كانديدات «اق جول» پارتياسىنان ۇسىنىلعان. اۋدانداعى بارلىق 16 سايلاۋ ۋچاسكەسىندە سانيتارلىق تالاپتار تولىعىمەن ساقتالعان.

سونىمەن قاتار، ت.رىسقۇلوۆ اۋدانىندا سايلاۋ ءوتىپ جاتقان 8 اۋىلدىق وكرۋگتە 12866 داۋىس بەرۋشى بار. بۇل سايلاۋ ناۋقانىنا 60 سەنىمدى وكىل تىركەلگەن.

سونداي-اق، 92 ۋچاسكەلىك جانە اۋداندىق سايلاۋ كوميسسياسىنىڭ 7 مۇشەسى بار. اۋداننىڭ «پارتيالىق ەمەس باقىلاۋ ورتالىعى» رەسپۋبليكالىق قوعامدىق بىرلەستىگىنىڭ تاۋەلسىز بايقاۋشىلارى دا سايلاۋ بارىسىن قاداعالاۋدا.

جاڭاتۇرمىس اۋىلدىق وكرۋگىندەگى №351 سايلاۋ ۋچاسكەسىنىڭ «پارتيالىق ەمەس بايقاۋشىسى» فەرۋزا اقبۇزاۋوۆا سايلاۋدىڭ جوعارى دەڭگەيدە ءوتىپ جاتقانىن، سايلاۋعا حالىقتىڭ بەلسەندى تۇردە قاتىسىپ وتىرعانىن ايتتى.

سوڭعى جاڭالىقتار

ۇقساس جاڭالىقتار