ۇجىم دەمەكشى, بۇگىندە ەل ىشىندە مەكەمە قىزمەتكەرلەرى بىرلەسىپ ەكپە ەگۋدى ۇردىسكە اينالدىرعان. اسىرەسە, الماتى وبلىسىندا. بۇل ورايدا وبلىستىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ ماماندارى كۇندەلىكتى مونيتورينگ جۇرگىزۋدە. اۋدان, قالالارداعى مەملەكەتتىك جانە جەكەمەنشىك مەكەمەلەردىڭ قىزمەتكەرلەرى ەكپە سالدىرۋعا ۇجىم بولىپ بارۋدا.
تالدىقورعان قالاسىنداعى ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ ۇستازدارى مەن ستۋدەنتتەرى ۇيىمداسقان تۇردە ەكپە الۋدا. بۇگىنگى تاڭدا وقۋ ورنىنىڭ 674 قىزمەتكەرىنىڭ 304-ءى ۆاكتسينانىڭ ەكى كومپونەنتىن دە الدى. ال 4 049 ستۋدەنتتىڭ 1 261-ءى ەكپە سالدىردى.
– ۇجىمدىق يممۋنيتەت قالىپتاستىرماي سىرقاتتانۋدىڭ الدىن الۋ مۇمكىن ەمەس. سوندىقتان ۋنيۆەرسيتەتتىڭ وقىتۋشىلار قۇرامى مەن ستۋدەنتتەرى ەكپە الۋدا. جاڭا وقۋ جىلىنا دايىندىق بۇگىننەن باستالعان. بارلىق سانيتارلىق تالاپتاردى ساقتاۋ نازارعا الىنعان. ۋنيۆەرسيتەت Ashyq جوباسىنا قوسىلدى. كەلۋشىلەر مەكەمەنىڭ سىرتقى قاشاسىنان تەكسەرۋ توبىنىڭ تەكسەرۋىنەن وتەدى. ۋنيۆەرسيتەتتە ۆاكتسينا سالدىرۋدىڭ تيىمدىلىگى بارىسىندا بريفينگ ۇيىمداستىرىلۋدا. ەكپە سالدىرعانداردى ماراپاتتاۋ ماقساتىندا ستۋدەنتتەر ۇيىندە تۇرۋ اقىسىن ازايتامىز. سونداي-اق شەت ءتىلىن تەگىن وقىتۋ كۋرستارىن اشامىز. اعىلشىن تىلىنەن ءدارىس جۇرگىزىلىپ, سەرتيفيكات بەرىلەدى, – دەيدى ۋنيۆەرسيتەت رەكتورى قۋات بايمىرزاەۆ.
تالدىقورعانداعى №1 ەمحانانىڭ سانيتارلىق-ەپيدەميولوگ دارىگەرى ايگۇل مۇساعۇلوۆانىڭ ايتۋىنشا, جەتىسۋ ۋنيۆەرسيتەتى سياقتى ۇجىممەن ەكپە الىپ جاتقانداردىڭ قاتارى وسكەن.
اتالمىش ەمدەۋ مەكەمەسىنىڭ ۆاكتسينا سالۋ بريگاداسى مەكەمەلەرگە وزدەرى بارۋدا. ەكپەنى ۇجىممەن سالدىرامىز دەپ حابارلاسسا, دارىگەرلەر جەدەل كەلەدى.
سونىڭ ناتيجەسىندە قالاداعى ءبىلىم بەرۋ مەكەمەلەرى, قۇقىق قورعاۋ ورىندارى, اسكەري بولىمشەلەر كوروناۆيرۋسقا قارسى ەكپەنى كەزەكپەن الۋدا. بۇل ەمحانا كۇنىنە 500-600 ادامعا قىزمەت كورسەتۋدە. ال تالدىقورعان قالاسى بويىنشا تاۋلىگىنە 900-گە تارتا ادام ۆاكتسينا الىپ, جامان اۋرۋدان ساقتانۋدا.
ايتپاقشى, وسى رەتتە ايتا كەتكەنىمىز ءجون شىعار. توتىداي تۇرلەنگەن تالدىقورعاندا DiVera مەديتسينالىق ورتالىعى اياسىندا ورتالىقتاندىرىلعان مەديتسينالىق زەرتحانا اشىلدى. زاماناۋي عيماراتتىڭ لەنتاسىن وبلىس اكىمىنىڭ ورىنباسارى ارسلان داندىباەۆ, OLYMP MEDICAL GROUP جشس باس ديرەكتورى ەرجان سۇلەيمەنوۆ, دەنساۋلىق ساقتاۋ مينيسترلىگىنىڭ باس ونكولوگى, اكادەميك ديليارا قايداروۆا, وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ قيىپ, اقجولتاي تىلەگىن جولدادى.
دەنساۋلىق ساقتاۋ سەكتورىندا حالىققا باستاپقى مەديتسينالىق-سانيتارلىق كومەكتى دامىتا وتىرىپ, دەنساۋلىق ساقتاۋ سالاسىنىڭ قولجەتىمدىلىگى مەن ساپاسىن ارتتىرۋعا ءمان بەرىلىپ كەلەدى. مەديتسينانىڭ جوعارى تەحنولوگيالىق جۇيەسىن دامىتۋ ارقىلى حالىقتىڭ دەنساۋلىق جاعدايىن جاقسارتۋ قاجەتتىلىگى «قازاقستان – 2050» ستراتەگياسىندا اتاپ ءوتىلدى.
وبلىستىق دەنساۋلىق ساقتاۋ باسقارماسى, «كدل وليمپ» جشس كومپانياسى مەن OLYMP MEDICAL GROUP جشس اراسىندا مەملەكەتتىك جانە جەكەمەنشىك ارىپتەستىك نەگىزىندە زەرتحانا اشۋ قولعا الىنعان ەدى. شارتقا سايكەس بيوماتەريالداردى زەرتتەۋدىڭ كەڭ سپەكترى ۇسىنىلىپ, قالالىق ەمحانالاردىڭ قاجەتتىلىكتەرىن وتەۋ ءۇشىن جاڭا نىسان سالىنىپ, جاراقتاندىرىلدى.
DiVera مەديتسينالىق ورتالىعى – Fujifilm Amulet Innovality ەڭ زاماناۋي اپپاراتىمەن جابدىقتالعان جانە قازىرگى ۋاقىتتا بۇل وبلىس پەن تالدىقورعان قالاسىنداعى ءسۇت بەزى قاتەرلى ىسىگىنىڭ كەشەندى دياگنوستيكاسىن جۇرگىزەتىن جالعىز ورتالىق.
جوبانىڭ ماقساتى – جوعارى ساپالى زەرتحانالىق قىزمەت كورسەتۋ, سىرقاتتارعا ناقتى دياگنوز قويۋ ارقىلى حالىققا مەديتسينالىق قىزمەت كورسەتۋدى جاقسارتۋ, حالىققا ءسۇت بەزى سىرقاتى دياگنوستيكاسى بويىنشا جوعارى ساپالى قىزمەتتەر كورسەتۋ, ءسۇت بەزىنىڭ رەنتگەن سۋرەتتەرىن وڭدەۋدىڭ ساندىق ادىستەرىن ەنگىزىپ, رەنتگەن سۋرەتتەرىن وڭدەپ, وقۋ جانە ساقتاۋدى قامتاماسىز ەتۋ; سونداي-اق حالىققا ءسۇت بەزى سكرينينگى بويىنشا قىزمەت كورسەتۋدى جاقسارتۋ, ءسۇت بەزى وبىرىنىڭ الدىن الۋ ارقىلى ايەلدەر اراسىنداعى ءولىم-ءجىتىمدى تومەندەتۋگە ىقپال ەتۋ. قازاقستاندا ءسۇت بەزى وبىرى ايەلدەردىڭ ونكولوگيالىق اۋرۋشاڭدىعى قۇرىلىمىندا ءبىرىنشى ورىندا جانە حالىقتىڭ ونكولوگيالىق اۋرۋلارىنىڭ جالپى قۇرىلىمىندا ەكىنشى ورىندا تۇر.
مەكەمەنى اشۋداعى تاعى ءبىر ماقسات – پاتسيەنتتەردى تەكسەرۋ, كەڭەس بەرۋ جانە ەمدەۋ پروتسەستەرىن ورتالىقتاندىرۋ. اتالمىش زەرتحانا جىلىنا كەم دەگەندە 1 ملن 530 مىڭ زەرتتەۋ جۇرگىزەدى. مەكەمەدە گينەكولوگ, پەدياتر, تەراپەۆت, تاعى باسقا ماماندار قابىلداۋ وتكىزەدى.
بىرلىگى ءبىرىزدى جەتىسۋ جۇرتى ىندەتتەن قۇتىلۋدىڭ جولى تۇتاستىقتا ەكەنىن ۇققانداي. ۇلتتىڭ دەنساۋلىعىن تۇزەيتىن جاڭا عيماراتتار ەل يگىلىگىنە جاراپ, تۇرعىندار بايىرعى الاڭسىز كۇندەرىنە ورالارىنا سەنىمدىمىز.
