«قاراسورا-2021» رەسپۋبليكالىق جەدەل الدىن الۋ ءىس-شاراسى اياسىندا جامبىل وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى شۋ اۋدانىنىڭ 27 جانە 61 جاستاعى جەرگىلىكتى تۇرعىندارىن ۇستادى. ءتىنتۋ جۇمىستارى بارىسىندا جالپى سالماعى 30 كەلىگە جۋىق «ماريحۋانا» ەسىرتكى زاتى تابىلدى. تاركىلەنگەن زاتتىڭ دوزاسى 300 مىڭنان اسادى. قارا نارىقتا مۇنداي ەسىرتكى مولشەرىنىڭ قۇنى - شامامەن ءۇش ميلليون تەڭگەنى قۇرايدى.
«قر قك 296-بابى 4-بولىگى «اسا ءىرى مولشەردە ەسىرتكى زاتتارىن زاڭسىز ساقتاۋ» بويىنشا سوتقا دەيىنگى تەرگەۋ باستالدى. اتالعان قىلمىس ءۇشىن 3 جىلدان 7 جىلعا دەيىنگى مەرزىمگە باس بوستاندىعىنان ايىرۋ قاراستىرىلعان», دەدى جامبىل وبلىسى پد ۋپن باستىعى اسقار جۇمابەكوۆ.
