تەكسەرىس قورىتىندىسى بويىنشا جول ۇيىمدارىنىڭ باسشىلارىنا كەمشىلىكتەردى جويۋ ءۇشىن 1026 ۇيعارىم بەرىلگەن. اۆتوموبيل جولدارىن كۇتىپ ۇستاۋداعى كەمشىلىكتەر بويىنشا ءتيىستى مەكەمەلەرگە 190 اقپارات جولدانعان. سونىمەن قاتار ايماقتاعى تەمىرجول وتكەلدەرىنە دە تەكسەرىس جۇرگىزىلىپ, ولاردى كۇتىپ-ۇستاۋ بويىنشا 152 اقاۋ انىقتالىپتى. وتكەلدەرگە جاۋاپتى ۇيىمداردىڭ باسشىلارىنا دا اتالعان كەمشىلىكتەردى جويۋ ءۇشىن 56 نۇسقاما جىبەرىلگەن. وسى ورايدا, اۆتوموبيل جولدارىنىڭ قاناعاتتانارلىقسىز كۇتىمى جانە جول قاۋىپسىزدىگىن ءتيىستى قامتاماسىز ەتپەگەنى ءۇشىن 128 لاۋازىمدى تۇلعا اكىمشىلىك جاۋاپكەرشىلىككە تارتىلعان.
«جولداردا جۇمىس جۇرگىزۋ, جولداردى, تەمىرجول وتكەلدەرىن جانە باسقا دا جول قۇرىلىستارىن كۇتىپ ۇستاۋ جونىندەگى تالاپتاردى ورىنداماعانى ءۇشىن قازاقستان رەسپۋبليكاسى اكىمشىلىك-قۇقىقبۇزۋشىلىق تۋرالى كودەكسىنىڭ 631-بابىنىڭ 1-بولىگى بويىنشا 81 لاۋازىمدى تۇلعا اكىمشىلىك جاۋاپكەرشىلىككە تارتىلدى. تاعى 1 لاۋازىمدى تۇلعاعا قاتىستى وسىعان ۇقساس قۇقىق بۇزۋشىلىق جانە ول جول-كولىك وقيعاسىنا اكەپ سوقتىرعانى ءۇشىن اكىمشىلىك حاتتاما تولتىرىلدى», دەيدى جامبىل وبلىستىق پوليتسيا دەپارتامەنتى اكىمشىلىك پوليتسيا باسقارماسى باستىعىنىڭ ورىنباسارى, پوليتسيا پودپولكوۆنيگى نيكولاي سون.
سونداي-اق جولداردى, تەمىرجول وتكەلدەرىن جانە باسقا دا قۇرىلىستاردى نەمەسە جول قوزعالىسىن رەتتەۋدىڭ تەحنيكالىق قۇرالدارىن زاقىمداعانى ءۇشىن 46 جەكە تۇلعا اكىمشىلىك جاۋاپكەرشىلىككە تارتىلعان.
