ال ەندى ءبولىپ جىكتەيتىن بولساق, وسى قارىزدىڭ 4,8 تريلليونى تۇتىنۋشىلىق ماقساتتا الىنعان. بۇل دا ءبىر اي بۇرىنعىمەن سالىستىرعاندا 3,3, ءبىر جىل بۇرىنعىمەن سالىستىرعاندا 16,3 پايىزعا ءوسىپ وتىر. يپوتەكالىق زايم دا قالىس قالار ەمەس. باسپانالى بولۋ جولىنداعى زايمدار ءبىر جىلدا 35,5 پايىزعا ءبىر-اق سەكىرگەن. نەسيە سەگمەنتىنىڭ وسىنشاما قارقىنمەن دامىپ, تاۋارلىق نەسيە سەكتورىنىڭ كەڭەيىپ, جاڭا بانكتىك ونىمدەردىڭ پايدا بولىپ, اۆتونەسيەلەۋ مەن يپوتەكا كولەمىنىڭ كۇن ساناپ وسكەنىنە قاراماستان, قازاقستاننىڭ كورسەتكىشى رەسەيدەن الدەقايدا تومەن. Ranking جوباسى وسىعان نازار اۋدارىپتى.
«2020 جىلدىڭ قورىتىندىسى بويىنشا جەكە تۇلعالار نەسيەسىنىڭ ءىجو-دەگى ۇلەسى 10,7 پايىزدى قۇراسا, رەسەيدە بۇل كورسەتكىش 18,7 پايىزعا تەڭ. تۇتىنۋشىلىق نەسيەلەردىڭ ءىجو-دەگى ۇلەسى 6,2 پايىزدى قۇراسا, رەسەيدەگى ۇلەسى 10 پايىزعا جۋىقتايدى. ارمەنيانىڭ كورسەتكىشى رەسەيدەن دە جوعارى. وندا جەكە تۇلعالاردىڭ نەسيەسى ءىجو-ءنىڭ 27 پايىزىنا جەتكەن. بەلورۋسسيادا 10,6 پايىز دەڭگەيىندە. تەك قىرعىزستاننىڭ عانا كورسەتكىشى وتە تومەن – 2,9 پايىز. وندا قارجى جۇيەسى مەن نەسيە نارىعى وتە ءالسىز», دەلىنەدى حابارلامادا.
جوبا زەرتتەۋىنشە, بىزدەگى نەسيەلەۋ دەڭگەيى رەسەيمەن عانا ەمەس, وزگە ەلدەرمەن سالىستىرعاندا دا تومەن. حالىقارالىق ۆاليۋتا قورىنىڭ دەرەگىنشە, 2019 جىلى قارىز قۇندى قاعازدارى مەن ءۇي شارۋاشىلىقتارىنداعى نەسيە كولەمىنىڭ جالپى جيىنتىعى ىشكى جالپى ءونىمنىڭ 9,74 پايىزىن قۇراپتى. رەسەيدە بۇل كورسەتكىش 19,07 پايىزعا تەڭ بولسا, وزگە ەلدەردە ودان بىرنەشە ەسە جوعارى, ماسەلەن اقش-تا – 75,34, كانادادا – 101,23 پايىز.
«مەملەكەتتىك اقشانى قوسا العاندا بانكتەر مەن قارجى ينستيتۋتتارىنان بەرىلەتىن بولشەك نەسيەنىڭ ءوسىمى – كەز كەلگەن ەلدىڭ ەكونوميكاسى مەن قارجى سەكتورىنىڭ دامۋ كورسەتكىشى بولىپ سانالادى. ازىرگە ەلدەگى بولشەك نەسيە دەڭگەيى تولەمدى كەشىكتىرۋ تۇرعىسىنان قاۋىپتى بولىپ سانالمايدى. بيىلعى مامىردىڭ قورىتىندىسى بويىنشا بارلىق نەسيە ءتۇرى بويىنشا تولەمدى كەشىكتىرۋ نەبارى 4,6 پايىزدى قۇراعان. بىلتىر ول كورسەتكىش 5,8 پايىز بولعان ەدى», دەپ جازادى اگەنتتىك.
