ۆەدومستۆو دەرەگى بويىنشا, قازىرگى كەزدە جوباعا «حيمفارم» اق, «كەنتاۋ ترانسفورماتور زاۋىتى» اق, «ەۆرازيان فۋدس» اق, «التىنالماس اك» اق, «كارلسكرونا» جشس, «الماتى جەلدەتكىش زاۋىتى» جشس جانە «بال تەكستيل» جشس قاتىسىپ جاتىر. بارلىعىن قوسا ەسەپتەگەندە, جالپى ينۆەستيتسيا سوماسى 10,4 ملرد تەڭگە بولاتىن 49 جوبا جۇزەگە اسپاق. ماسەلەن, «حيمفارم» اق قولعا العان «اقىلدى تەحنيكالىق قىزمەت كورسەتۋ» جوباسى جابدىققا پرەديكتيۆتى قىزمەت كورسەتۋگە, وندىرىستىك قىزمەتكە زيان كەلتىرمەي جوندەۋ جۇمىستارىن جوسپارلاۋعا, سونداي-اق جۇمىس پەن قوسالقى بولشەكتەر ءۇشىن قاراجاتقا قاجەتتىلىكتى بولجاۋعا مۇمكىندىك بەرەدى. كاسىپورىننىڭ تاعى ءبىر ماڭىزدى جوباسى «Power Map QA ونىمدەردىڭ ساپاسىن باسقارۋ» دەپ اتالادى. بۇل جۇيە ءونىم ساپاسىن ارتتىرۋعا باعىتتالعان. ءونىمنىڭ بارلىق تسيكلىندا, ياعني جەتكىزۋدەن باستاپ, ءوندىرىلىپ شىعارعانعا دەيىن ماتەريالدىڭ ساپاسىن باقىلاۋعا مۇمكىندىك بەرەدى.
«كارلسكرونا» ماشينا جاساۋ زاۋىتىندا 3 جوبا پايدالانۋعا بەرىلىپ ۇلگەرىپتى. كليەنتتەرمەن ءوزارا قارىم-قاتىناستى باسقارۋ جۇيەسى (CRM) – تۇتىنۋشىلارمەن جۇمىس ىستەۋدە بىرىڭعاي تسيفرلى ەكوجۇيە قۇرۋ, ساتۋ, ماركەتينگ جانە كليەنتتىك قىزمەت كورسەتۋ سالالارىندا اشىقتىقتى ارتتىرادى. بۇدان بولەك, ءوندىرىس وشاعىندا ءونىمدى مودەلدەۋدىڭ 3D جۇيەسى ەنگىزىلگەن. اتالعان جۇيە الدىن الا جاسالعان سىزباعا نەمەسە ەسكيزگە سايكەس نىساننىڭ ءۇش ولشەمدى مودەلىن قۇرۋعا ارنالعان باعدارلامالىق جاساقتامانى قولدانۋعا مۇمكىندىك بەرەدى. قاجەتتى ليتسەنزيالىق باعدارلامالىق قامتۋ, مودۋلدەر مەن كومپونەنتتەر ساتىپ الىنىپ, قىزمەتكەرلەر ProCAST جۇيەسىن قولدانۋعا وقىتىلدى. بۇگىنگى تاڭدا جۇيە كاسىپورىندا ءساتتى جۇمىس ىستەپ تۇر.
«التىنالماس» اك» اق التىن ءوندىرۋ كومپانياسى «تسيفرلىق كەنىش» دەپ اتالاتىن جوباسى اياسىندا 12 جوبانى ىسكە اسىرۋدا. مىسالى, Wencomine تاۋ-كەن جابدىعىن باسقارۋ جۇيەسى «اقتوعاي» جوباسىندا اشىق تاۋ-كەن جۇمىستارىن ديسپەتچەرلەۋ ناقتى ۋاقىت رەجىمىندە قىزمەتكەرلەردىڭ جۇمىس ۋاقىتى مەن تۇرىپ قالۋىنا مونيتورينگ جۇرگىزۋگە, تيەۋ پۋنكتتەرى بويىنشا اۆتوساموسۆالداردى وڭتايلى بولۋگە, تۇرىپ قالۋىن قىسقارتۋعا, سونداي-اق قىزمەتكەرلەر مەن تەحنيكانىڭ نەگىزگى كورسەتكىشتەرىنە (KPI) جان-جاقتى تالداۋ مەن باعالاۋ جۇرگىزۋگە جاعداي جاسايدى. سونىمەن قاتار ورتالىق قويمادا شتريحكودتاۋ جۇيەسى ەنگىزىلگەن. MS Dynamics Axapta (كاسىپورىن رەسۋرستارىن باسقارۋ جۇيەسى) باعدارلامالىق شەشىمىنە نەگىزدەلگەن قويمادا شتريحكودتاۋ جۇيەسىن قولدانادى. بۇل ناقتى ۋاقىت رەجىمىندە ورتالىق قويما جۇمىسىن باقىلاۋعا جول اشادى.
تسيفرلاندىرۋ جۇمىستارىن ىسكە اسىرۋ الەۋمەتتىك تۇرعىدان دا ءتيىمدى بولىپ وتىر. ماسەلەن, «اقباقاي» جانە «اقتوعايدا» ۇيىمداستىرىلعان ينفراقۇرىلىم شەڭبەرىندە «التىنالماس اك» اق جاقىن ماڭداعى ەلدى مەكەندەردى عالامتور جەلىسىمەن قامتاماسىز ەتكەن. بۇل پاندەميا كەزەڭىندە قاشىقتان ءبىلىم بەرۋگە قيىندىقسىز كوشۋگە جانە جالپى ءومىر ءسۇرۋ ساپاسىن ارتتىرۋعا العىشارت بولا الادى. جوباعا قاتىسۋشىلار الداعى ۋاقىتتا ءوز سالالارىنان بولەك, باسقا باعىتتاردا دا تسيفرلى تەحنولوگيالاردى ەنگىزۋدىڭ درايۆەرلەرىنە اينالادى دەگەن سەنىم بار.
