ناۋقاستار سانى, اسىرەسە, اتىراۋ قالاسىندا كوبەيىپ تۇر. ءبىر كۇندە شاھاردا 280 ناۋقاستىڭ تىركەلۋى الاڭداتپاي قويمايدى. بۇعان قوسا تەڭىز كەنىشىندە 10 ناۋقاس تىركەلدى. سونداي-اق وڭىردەگى جەتى اۋداننىڭ بارىندە قاۋىپتى ۆيرۋستىڭ «قاقپانىنا» تۇسكەندەر تابىلىپ وتىر. ناقتىلاي ايتقاندا, قۇرمانعازى اۋدانىندا – 17, جىلىويدا – 11, يندەردە – 6, ماقاتتا – 4, يساتايدا – 2, ماحامبەتتە – 2, قىزىلقوعا اۋدانىندا 2 ادامنان كوروناۆيرۋس ينفەكتسياسىنىڭ بەلگىسى انىقتالدى.
وسىعان بايلانىستى ينفەكتسيالىق ستاتسيونارلارعا جاتقىزىلعان ناۋقاستار سانى دا ارتا باستادى. قازىر 806 ادام ەمدەلىپ جاتىر. ونىڭ ىشىندە مودۋلدىك اۋرۋحانادا – 188, اۋداندارداعى ستاتسيونارلاردا – 188, №2 وبلىستىق اۋرۋحانادا – 150, كارديولوگيالىق ورتالىقتا – 108, فتيزيوپۋلمانولوگيالىق ورتالىقتا – 103 ناۋقاس ەم الۋدا. تەڭىز كەن ورنىنداعى ينفەكتسيالىق ستاتسيوناردا 69 ادام ەمدەلىپ جاتىر. ال ءۇي جاعدايىندا 1 080 پاتسيەنت ەم-دوم الۋدى جالعاستىرۋدا.
– اتىراۋدا ناۋقاستاردىڭ دەنى پتر-تەست جۇرگىزىلەتىن زەرتحانالاردا جاسالعان قورىتىندىنىڭ ناتيجەسىمەن انىقتالىپ وتىر. قازىر وڭىردە كوروناۆيرۋس ينفەكتسياسىنا قارسى زەرتتەۋ جۇرگىزىلەتىن 14 پتر-تەست زەرتحاناسى جۇمىس ىستەيدى. بۇل زەرتحانالاردا تاۋلىگىنە 14 مىڭنان اسا زەرتتەۋ جۇرگىزىلەدى. ەلىمىزدە كوروناۆيرۋس ينفەكتسياسى تىركەلگەن بىلتىرعى ناۋرىزدان بەرى وڭىردە جۇرگىزىلگەن پتر-تەست سانى 1 ملن 292 مىڭدى قۇرادى, – دەيدى ا.بايدۋاليەۆ.
ونىڭ مالىمەتىنە قاراعاندا, قاۋىپتى ۆيرۋستىڭ تارالۋ كورسەتكىشىنىڭ وسۋىنە بايلانىستى 520 رەزەرۆتىك توسەكتىك ورىن دايىندالىپتى. ونىڭ ىشىندە 20 توسەكتىك ورىن جانساقتاۋ بولىمىنە ءبولىنىپ وتىر. كارانتيندىك ستاتسيونار ءۇشىن 408 توسەكتىك ورىن اشىلعان.
– كوروناۆيرۋس ينفەكتسياسىنا شالدىققان ناۋقاستار سانى كۇرت وسەتىن بولسا, تاعى بىرنەشە اۋرۋحانادان ينفەكتسيالىق ستاتسيونار اشۋدى كوزدەپ وتىرمىز. ناقتىلاي ايتقاندا, وبلىستىق اۋرۋحانادا – 50, تەمىر جول اۋرۋحاناسىندا – 120, ماحامبەت اۋدانىنداعى فتيزيوپۋلمونولوگيالىق ورتالىقتا – 150, سونداي-اق جاتاقحانانىڭ بىرىندە 200 ورىندىق ينفەكتسيالىق ستاتسيونار اشىلادى. قازىر 2 428 ورىندىق ينفەكتسيالىق ستاتسيونارلاردا 806 ناۋقاس ەمدەلۋ ءۇشىن وقشاۋلاندى. ستاتسيونارلارداعى جۇكتەمە – 33,2 پايىز. جانساقتاۋ بولىمىندە 108 ورىن بار. قازىر بۇل بولىمدە جاعدايى اۋىر 53 ناۋقاس جاتىر. ناۋقاستاردىڭ جەتەۋى وكپەنى جاساندى جەلدەتۋ اپپاراتىنا قوسىلعان. مۇنداعى جۇكتەمە 49 پايىزدى قۇراپ وتىر, – دەيدى ا.بايدۋاليەۆ.
وبلىستىق جۇمىسپەن قامتۋ جانە الەۋمەتتىك باعدارلامالار باسقارماسى ماماندارىنىڭ ايتۋىنشا, مەملەكەتتىك اتاۋلى الەۋمەتتىك كومەك الاتىن وتباسىلارعا مەديتسينالىق العاشقى كومەك جيىنتىعى تاراتىلىپ جاتىر. ماقسات – كوروناۆيرۋس ينفەكتسياسىنىڭ تارالۋىنىڭ الدىن الۋ.
– مەديتسينالىق العاشقى كومەك جيىنتىعىنىڭ قۇرامىن دەنساۋلىق ساقتاۋ مينيسترلىگى بەكىتكەن. سوعان سايكەس, 952 مەديتسينالىق قورعاۋ قۇرالدارى قوبديشاسىن اتىراۋ قالاسى مەن اۋدانداردا تۇراتىن وتباسىلارعا تاراتۋدى كوزدەدىك. مەديتسينالىق قورعاۋ قۇرالدارى جيىنتىعىنا تسيفرلى تەرمومەتر, 100 دانا مەديتسينالىق ماسكا, 2 دانا قولعا ارنالعان انتيسەپتيك, يبوپروفەن (400 مگ, 20 تابلەتكا), پاراتسەتامول (500 مگ, 20 تابلەتكا) سالىنعان, – دەپ حابارلادى باسقارما ماماندارى.
دارىگەرلەر قاۋىپتى ۆيرۋستىڭ تارالۋىن تەجەۋ ءۇشىن ۆاكتسينا الۋدىڭ قاجەتتىگىن ءالى دە ايتىپ جاتىر. ءتىپتى ۆاكتسينا الۋشىلاردى ىنتالاندىرۋدىڭ ءتۇرلى شاراسى قولعا الىنىپ جاتىر. ماسەلەن, وبلىستىق «ازاماتتىق اليانس» زتب ۇيىمداستىرعان اقشالاي ۇتىس ويىنى ءار ون كۇن سايىن 30 قىركۇيەككە دەيىن ۆاكتسينا العاندار اراسىندا ويناتىلا باستادى. اقشالاي ۇتىستىڭ العاشقى ويىنى 11 شىلدەدە تىكەلەي ەفيردە ءوتتى. تاۋەلسىز باقىلاۋشىلاردىڭ قاتىسۋىمەن كەزدەيسوق سانداردى تاڭداۋ ارقىلى 10 سەرتيفيكاتتىڭ يەسى انىقتالدى. ولاردىڭ ارقايسىسىنا 200 مىڭ تەڭگەنىڭ سەرتيفيكاتى تاپسىرىلدى.
ەندى وسىنداي ۇتىس ويىنىن «بايزار» ساۋدا-ويىن ساۋىق ورتالىعى دا قولعا الدى. باس جۇلدە –
1 ملن تەڭگە. ۇتىس ويىنىنا 1 شىلدە – 1 قىركۇيەك ارالىعىندا ۆاكتسينا العان تۇرعىندار قاتىسادى.
مۇنداي ىنتالاندىرۋ شارالارىنان سوڭ وڭىردە كۇن سايىن ۆاكتسينا الۋشىلار قاتارى ارتا باستاعانى بايقالادى. وبلىستىق دەنساۋلىق ساقتاۋ باسقارماسىنىڭ دەرەگىنە سۇيەنسەك, 12 شىلدەدە 3 183 ادام ۆاكتسينا سالدىرعان. وسىلايشا, 1 اقپاننان بەرى 118 201 اتىراۋلىق سپۋتنيك V, QazVac, Hayat-Vax ۆاكتسينالارىنىڭ ءبىرىنشى كومپونەنتىن ەكتىردى. ۆاكتسينالاردىڭ ەكىنشى كومپونەنتىن العاندار سانى 62 535 ادامعا جەتىپ وتىر.
اتىراۋ وبلىسى
