وبلىستىق دەنساۋلىق ساقتاۋ باسقارماسى ءباسپاسوز قىزمەتىنەن ءمالىم ەتكەندەي, وزبەكستان رەسپۋبليكاسىنىڭ 1998 جىلى تۋعان ازاماتى بيىلعى 16 ماۋسىمدا «سپۋتنيك V» ۆاكتسيناسىنىڭ I كومپونەنتىن ەكتىرگەن. سودان كەيىن جىگىتتە جاناما اسەرلەر مەن اسقىنۋلار تىركەلمەگەن.
«بۇل ازامات 14 شىلدەدە جەرگىلىكتى ۋاقىتپەن ساعات 15:00-دە ۆاكتسينانىڭ ءىى كومپونەنتىن سالدىرعان. الايدا, ۆاكتسينانى العانعا دەيىن كەزەكتە تۇرعان شەتەلدىك ازامات مەديتسينا قىزمەتكەرلەرىنە دورەكىلىك تانىتقان. ۆاكتسينانىڭ جاناما اسەرى تۋرالى ارانداتۋ ماقساتىندا بەينەجازبا تۇسىرەمىن دەپ قورقىتقان. دەمالىس بولمەسىندە 30 مينۋتتاي ۋاقىت بولىپ, ۇيگە جىبەرىلدى» دەپ حابارلادى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
بەلگىلى بولعانداي, 14 شىلدەدە جەرگىلىكتى ۋاقىتپەن 18:30-دا «دينا» بازارىنان جەدەل جاردەم قىزمەتىنە قوڭىراۋ تۇسكەن. وندا ديسپەتچەرگە ۆاكتسينا العان ادامدا قۇرىسۋ بەلگىسى بايقالعانى تۋرالى حابارلانعان.
«جەدەل جاردەم ءۇش ساعات بۇرىن ۆاكتسينا العان جانە دارىگەرلەرگە دورەكىلىك تانىتقان وزبەكستان ازاماتىنا شاقىرىلعانى بەلگىلى بولدى. شەتەلدىك جىگىت وبلىستىق اۋرۋحانانىڭ قابىلداۋ بولىمىنە جەتكىزىلىپ, 30 مينۋتتان كەيىن ۇيىنە جىبەرىلدى. سەبەبى, ونىڭ جاعدايى تۇراقتى, اۋرۋحاناعا جاتقىزۋعا ناقتى دايەك بولعان جوق. وسىعان بايلانىستى تۇرعىنداردان ارانداتۋشىلىققا دەن قويماي, تەك رەسمي اقپاراتقا سەنۋدى سۇرايمىز», دەپ مالىمدەدى باسقارمانىڭ ءباسپاسوز قىزمەتىنەن.
