قازىرگى ۋاقىتتا حالىقتىڭ دەنساۋلىعىن ساقتاۋ ۇكىمەتىنىڭ وزەكتى باعىتتارىنىڭ ءبىرى بولىپ تابىلادى. Covid-19 كوروناۆيرۋستىق ينفەكتسياسى جانە ونىمەن بايلانىستى جاعدايلار بارلىق سالالارعا ايتارلىقتاي وزگەرىستەر ەنگىزدى. مەملەكەت باسشىسى قاسىم-جومارت توقاەۆ كوروناۆيرۋسپەن كۇرەسۋدىڭ بىردەن-ءبىر ءارى سەنىمدى جولى ۆاكتسينا سالۋ ەكەنىن اتاپ ءوتتى.
پتر–تەستتەردى قولدان جاساۋ جانە پايدالانۋ فاكتىلەرى بويىنشا ىشكى ىستەر مينيسترلىگى ءوز قۇزىرەتى شەگىندە قاجەتتى شارالار قابىلداۋدا. كەيبىر ازاماتتار قازىرگى جاعدايدى پايدا تابۋ ءۇشىن پايدالانادى, پتر تەستىلەۋ ناتيجەلەرى مەن ۆاكتسيناتسيا پاسپورتىن قولدان جاسايدى, وسىلايشا كوروناۆيرۋستىڭ تارالۋىنا سەپتەسەدى.
جىل باسىنان بەرى ىشكى ىستەر ورگاندارى پتر-تەستىلەۋ ناتيجەلەرى مەن ۆاكتسيناتسيا پاسپورتتارىن قولدان جاساۋدىڭ, سونداي-اق ولاردى پايدالانۋدىڭ 30 جاعدايىن تىركەدى.
مىسالى, الماتى قالاسىندا قاجىلاردىڭ ساۋد ارابياسى كورولدىگىنە كەتۋىن راسىمدەۋ كەزىندە ۆاكتسيناتسيالاۋ پاسپورتتارىن (143 پاسپورت) جاپپاي دايىنداۋعا قاتىسى بار تۋريستىك كومپانيا انىقتالدى.
سوتقا دەيىنگى تەرگەۋ جۇرگىزىلۋدە, ءتىنتۋ ءىس-شارالارى بارىسىندا ۇيىمداستىرۋ تەحنيكاسى, مورلەر, بلانك ونىمدەرى الىندى, سوت ساراپتامالارى تاعايىندالدى.
ەسكە سالا كەتەيىك, جالعان قۇجات دايىنداعانى ءۇشىن 4 جىلعا دەيىن باس بوستاندىعىنان ايىرۋ, ال ونى پايدالانعانى ءۇشىن 40 تاۋلىككە دەيىن قاماۋعا الۋ تۇرىندەگى قىلمىستىق جاۋاپكەرشىلىك قاراستىرىلعان.
