قىرعىزستاننىڭ ەكونوميكا جانە قارجى مينيسترلىگى جانىنداعى تۋريزم دەپارتامەنتى ديرەكتورىنىڭ ورىنباسارى قيال كەنجەماتوۆانىڭ ايتۋىنشا, قازىر قىرعىزستان 19 ەلدىڭ, سونىڭ ىشىندە قازاقستاننىڭ ۆاكتسينالاۋ تولقۇجاتىن مويىندايدى.
«مەن دەنساۋلىق ساقتاۋ مينيسترلىگىندەگى ارىپتەستەرىممەن حابارلاسىپ, ءبىزدىڭ رەسپۋبليكامىز مويىنداعان ۆاكتسينالار تۋرالى سۇرادىم. ماعان «بۇگىنگى كۇنى بار ۆاكتسينالاردىڭ بارلىعىن مويىندايمىز», دەپ جاۋاپ بەردى. سوندىقتان ءبىز بارلىق ۆاكتسينا سالدىرعان تۋريستەردەن پتر-تەست تالاپ ەتپەي, سونىڭ ىشىندە QazVac-پەن دە وتكىزەمىز», دەدى قيال كەنجەماتوۆا.
سونداي-اق تۋريزم دەپارتامەنتى ديرەكتورىنىڭ ورىنباسارى ۆاكتسينا پاسپورتىنىڭ كەز كەلگەن فورماتى: ەلەكتروندى جانە قاعاز تۇرىندە بولسىن جارامدى ەكەنىن اتاپ ءوتتى.
تۋريزم دەپارتامەنتىنىڭ وكىلى شاعىم تۇسكەن كەزدە قىرعىزستاندىق شەكاراشىلار قازاقستاندىق ۆاكتسينا پاسپورتىنىڭ قانداي ەكەنىن بىلمەگەندىكتەن قازاقستاندىقتاردى وتكىزبەگەن بولۋى مۇمكىن ەكەنىن راستادى. بىراق, ونىڭ ايتۋىنشا, 30 ماۋسىمنان باستاپ شەكارا قىزمەتىندە تولقۇجاتتىڭ ۇلگىسى بەرىلگەن جانە مۇنداي جاعداي ەندى قايتالانبايدى.
