تۇركيا پرەزيدەنتى ەلباسىن شىن جۇرەكتەن تۋعان كۇنىمەن قۇتتىقتاپ, مىقتى دەنساۋلىق جانە باۋىرلاس قازاقستاننىڭ مۇددەسى جولىنداعى كوپجىلدىق مەملەكەتتىك قىزمەتىنە جاڭا جەتىستىكتەر تىلەدى.
رەجەپ تايپ ەردوعان نۇرسۇلتان نازارباەۆ ءوز ەلىنىڭ كوشباسشىسى عانا ەمەس, سونىمەن قاتار نۇر-سۇلتان مەن انكارا اراسىنداعى ستراتەگيالىق سەرىكتەستىكتىڭ نەگىزىن قالاۋشى رەتىندە زور قۇرمەتكە يە بولعانىن ايتتى. تۇركيا پرەزيدەنتى قازاقستاننىڭ تۇڭعىش پرەزيدەنتىنىڭ تۇركىتىلدەس مەملەكەتتەر ىنتىماقتاستىعى كەڭەسىنىڭ (تۇركى كەڭەسى) قۇرمەتتى توراعاسى رەتىندەگى ايرىقشا رولىنە توقتالدى, سونداي-اق ەۋرازيا كەڭىستىگىندەگى ينتەگراتسيالىق باستامالارىنىڭ ماڭىزدىلىعىن ەرەكشە اتاپ ءوتتى.
ەلباسى رەجەپ تايپ ەردوعانعا ىزگى تىلەكتەرى ءۇشىن ريزاشىلىعىن ءبىلدىرىپ, قازاقستان مەن تۇركيانىڭ قازىرگى ستراتەگيالىق سەرىكتەستىگىنىڭ دەڭگەيىنە جوعارى باعا بەردى.
ءسوز سوڭىندا نۇرسۇلتان نازارباەۆ پەن رەجەپ تايپ ەردوعان الداعى كەزدەسۋلەردىڭ كەستەسىن تالقىلادى.
