پرەزيدەنت • 04 شىلدە، 2021

پرەزيدەنت ۇلتتىق دومبىرا كۇنىنە ارنالعان كونتسەرتكە باردى

165 رەت كورسەتىلدى

قاسىم-جومارت توقاەۆ قازاقستاندىقتاردى ۇلتتىق دومبىرا كۇنىمەن قۇتتىقتاي وتىرىپ، ەلباسىنىڭ باستاماسىمەن دومبىرانى ۇلىقتاۋ مەرەكەسىن وتكىزۋ يگى داستۇرگە اينالعانىن ايتتى، دەپ حابارلايدى Egemen.kz اقورداعا سىلتەمە جاساپ.

– بۇل – حالقىمىزدىڭ تامىرى تەرەڭدە جاتقان ءتول ونەرىن دارىپتەيتىن مەيرام. قازاق پەن دومبىرا – ءبىر-بىرىنەن  بولە-جارۋعا بولمايتىن ەگىز ۇعىم. دومبىرا – كونە زاماننىڭ اڭىزدارىنا  ارقاۋ بولعان كيەلى اسپاپ. «اقساق قۇلان» كۇيىنىڭ شىعۋ توركىنىن بىلمەيتىن قازاق كەمدە-كەم. ەجەلگى  داۋىردەن جەتكەن قاستەرلى دومبىرا ۇرپاقتان-ۇرپاققا ميراس بولىپ كەلەدى.  قازاق سان عاسىرلىق شەجىرەسىنىڭ كۋاسى بولعان قاسيەتتى اسپاپتى بويتۇمارىنا بالاعان. قازىرگى تىلمەن ايتساق، بۇل – ءبىزدىڭ ۇلتتىق برەندىمىز، – دەدى پرەزيدەنت.

مەملەكەت باسشىسىنىڭ ايتۋىنشا، قۇدىرەتتى قوس ىشەكتىڭ ۇنىندە ۇلى دالانىڭ جىرى، بابالاردىڭ سىرى ساقتالعان. حالقىمىز قۋانىشى مەن قايعىسىن، ارمان-تىلەگى مەن ءۇمىتىن كۇي ارقىلى جەتكىزگەن. مەملەكەت باسشىسى دومبىراعا ءتىل بىتسە، تەبىرەنبەيتىن قازاق جوق ەكەنىن، قانداستارىمىز مەكەندەيتىن قاي ەلگە بارساق تا، دومبىرانىڭ قوڭىر ءۇنى كۇمبىرلەپ تۇراتىندىعىن اتاپ ءوتتى. بايتاق دالانى دۇبىرلەتكەن كۇيشىلەردىڭ اسىل مۇراسى – رۋحاني قازىنامىزدىڭ باعا جەتپەس بايلىعى. 

– قۇرمانعازىنىڭ «سارىارقاسى»، تاتتىمبەتتىڭ «سارجايلاۋى» كۇي ونەرىنىڭ  شىڭى سانالادى. نۇرعيسانىڭ «اققۋى» – قازاقتىڭ قانىنا سىڭگەن بەكزات ونەردىڭ بىرەگەي تۋىندىسى. سونداي دارىن يەلەرىنەن امانات بولعان كيەلى مۇرا بۇگىندە ادامزاتتىڭ اسىل قازىناسىنا اينالدى.  كۇي ونەرى يۋنەسكو شەڭبەرىندەگى قۇندىلىقتار قاتارىنا قوسىلدى. دومبىرانى ۇلىقتاپ، كۇي ونەرىن دامىتۋ ءۇشىن ەلىمىزدە كوپتەگەن يگى ىستەر اتقارىلۋدا. ەلوردادا كۇي اتاسى قۇرمانعازىنىڭ ەسكەرتكىشى اشىلدى. ال كەشە عانا كۇيشى دينا اپامىزدىڭ قۇرمەتىنە  ساۋلەت تۋىندىسى بوي كوتەردى، – دەدى قاسىم-جومارت توقاەۆ.   

پرەزيدەنت وزىق مادەنيەتى بار ۇلتتىڭ رۋحى ءاردايىم بيىك بولارى ءسوزسىز دەپ سانايدى. سوندىقتان وسكەلەڭ ۇرپاق وسى كيەلى ونەردى لايىقتى جالعاستىرۋى قاجەت. مەكتەپتە دومبىرا ۇيرەنۋگە ارنالعان فاكۋلتاتيۆ ساباقتارىن ەنگىزۋ جونىندەگى باستامانى قولداعان قاسىم-جومارت توقاەۆ، بۇل ساباقتار بالالارىمىزدىڭ ۇلتتىق ساناسىنىڭ كۇشەيۋىنە جانە ولاردىڭ كوزقاراسى مەن مادەني تانىمىنىڭ كەڭەيۋىنە وڭ ىقپال ەتەتىنىنە سەنىم ءبىلدىردى. 

– بيىل ءبىرىنشى مامىردان شىعارماشىلىق ۇيىرمەلەر مەملەكەتتىك تاپسىرىس اياسىندا جۇمىس ىستەي باستادى. بالالار مۇنداي ۇيىرمەلەرگە تەگىن قاتىساتىن بولدى. وسىنىڭ بارلىعى جاستاردىڭ ۇلتتىق قۇندىلىقتاردى يگەرۋى ءۇشىن قاجەت. سوندىقتان دومبىرانىڭ قادىر-قاسيەتىن وسكەلەڭ ۇرپاقتىڭ ساناسىنا ءسىڭىرۋ – وتە ماڭىزدى مىندەت.  قازىر  جاستارىمىز دومبىرانى زاماناۋي مۋزىكامەن ۇشتاستىرىپ، جەر جۇزىنە تانىتۋدا. بۇل ءتول تاريحىمىز بەن مادەنيەتىمىزگە الەم حالىقتارىنىڭ قىزىعۋشىلىعىن ارتتىرادى، قازاقستاننىڭ بىرەگەي بەت-بەينەسىن  قالىپتاستىرادى، – دەدى مەملەكەت باسشىسى.     

ءسوز سوڭىندا قاسىم-جومارت توقاەۆ مۋزىكا ونەرى ەشكىمدى ۇلت پەن تىلگە بولمەيتىنىن، دومبىرانىڭ ءۇنى ەلىمىزدەگى بارشا ەتنوستاردى ورتاق قۇندىلىققا بىرىكتىرىپ، رۋحاني تۇتاستىققا باستايتىندىعىن اتاپ ءوتتى.

– ۇلتىمىزدىڭ رۋحىن كوتەرەتىن دومبىراعا ءار شاڭىراقتىڭ تورىندە ورىن بار. سەبەبى دومبىرا – قازاقتىڭ جانى، – دەدى پرەزيدەنت.

 

سوڭعى جاڭالىقتار

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

دوللار ارزاندادى

قارجى • كەشە

ۇقساس جاڭالىقتار