ەلوردالىق كوشپەلى بريگادا ەڭبەك ۇجىمدارىن ارالادى

بۇگىن ءموبيلدى ۆاكتسيناتسيا توبى Sine Tempore ساۋدا ۇيىنە شىقتى. مۇندا قىزمەتكەرلەردەن بولەك، ساۋدا ورتالىعىنىڭ جالعا الۋشىلارى دا كەلىپ جاتتى.

«ۆاكتسينا العانىما ءبىراز ۋاقىت بولدى، تيىسىنشە قىزمەتكەرلەرىمدى دە ۇگىتتەپ كەلدىم. ءموبيلدى ۆاكتسيناتسيا توپتارىنىڭ ارقاسىندا يممۋنداۋدان وتتىك. بۇل وتە ىڭعايلى، جۇمىس ۋاقىتىمىز بولىنبەيدى، ەشكىم ەشقايدا كەتپەيدى»، دەدى «Sine Tempore» اق پرەزيدەنتى تاتيانا تسوي.

ۆاكتسينا العاندار وزدەرىن جاقسى سەزىنىپ وتىرعانىن ايتتى. ولاردىڭ كوپشىلىگى ەكپە الۋ تۋرالى شەشىمدى ويلانىپ بارىپ قابىلداعان ەكەن.

«سوو-عا ءموبيلدى ۆاكتسيناتسيا كەلەدى دەپ حابارلادى. ويلانباستان تىركەلدىم. سەبەبى، بۇل ينفەكتسيانى ءوزىم جۇقتىرعانمىن، قانشالىقتى قاۋىپتى ەكەنىن دە جاقسى بىلەمىن. بۇل قاۋىپتەن قورعانعان ءجون»، دەدى ەلوردا تۇرعىنى سايرانگۇل.

ايتا كەتەرلىگى، ۆاكتسيناتسيالاۋعا بەلسەندى تۇردە شاقىراتىندار اراسىندا كوروناۆيرۋسپەن اۋىرعاندار كوپ. سەبەبى ولار ۆيرۋسپەن عانا ەمەس، ونىڭ سالدارىمەن دە كۇرەسۋ قانشالىقتى قيىن ەكەنىن بىلەدى.

«ۆاكتسيناتسيادان كەيىن ءوزىمدى جاقسى سەزىنەمىن. بۇل ىندەتتى وسىدان ءتورت اي بۇرىن جۇقتىرعانمىن. ەكىنشى رەت جۇقتىرعىم كەلمەيدى. ەلىمىزدىڭ بارلىق ازاماتىن ۆاكتسينا الۋعا شاقىرامىن. بۇل ءبىزدى كوروناۆيرۋستان قورعايدى»، دەدى ساۋدا ءۇيىنىڭ قىزمەتكەرى اربەن دجوري.

ۆاكتسيناتسيا – بۇل ۇجىمدىق يممۋنيتەتتى دامىتۋدىڭ جانە ادەتتەگى ومىرگە ورالۋدىڭ جالعىز ءتاسىلى. ەۋروپا ەلدەرى مەن فۋتبولدان ءوتىپ جاتقان ەۋروپا چەمپيوناتىنىڭ (جارتىلاي جانكۇيەرگە تولعان ستاديوندار) تاجىريبەسى ىندەتتى جەڭۋگە بولاتىنىن كورسەتەدى. ۆاكتسيناتسيالانعان ازاماتتاردىڭ سانىن كوبەيتۋ كەرەك. مەديتسينا قىزمەتكەرلەرى ەلوردا تۇرعىندارىنىڭ ۆاكتسيناتسياعا دايىن ەكەنىن ايتتى.

«ناۋرىز ايىنان باستاپ ۆاكتسيناتسيالاۋ ءۇشىن ەڭبەك ۇجىمدارىنا بارىپ ءجۇرمىز. كۇنىنە ەكى رەت باراتىن كەزىمىز بولادى. ورتاشا ەسەپپەن 50-گە جۋىق ادام ۆاكتسينا الۋعا كەلەدى. كەيدە ودان دا كوپ بولىپ جاتادى. ءبىزدىڭ ەمحانانىڭ وزىندە ءۇش ءموبيلدى توپ بار. وتىنىمدەر ءىرى زاۋىتتاردان، اۋەجايلاردان جانە ۆوكزالداردان، سونداي-اق شاعىن كومپانيالاردان ءتۇسىپ جاتادى. ۆيرۋستىڭ جاڭا قاۋىپتى شتاممى پايدا بولعانىن، ونىڭ مۋتاتسيالانعانىن ەسكەرەر بولساق، ۆاكتسيناتسيادان ءبارى ءوتۋى قاجەت. بۇل حالىقتىڭ ازاماتتىق بورىشى»، دەدى №14 ەمحانا بولىمشەسىنىڭ مەڭگەرۋشىسى ەسبول وماروۆ.

ونىڭ ايتۋىنشا، ەلوردا اكىمدىگى جۇرگىزگەن جۇمىستىڭ ناتيجەسىندە ۆاكتسينا الۋعا كەلەتىن جۇرتتىڭ قاتارى كوبەيە باستادى. قالا تۇرعىندارى ۆاكتسيناتسيا ماسەلەسىندە وزدەرىنىڭ ازاماتتىق ۇستانىمدارىن بەلسەندى تۇردە كورسەتىپ، يممۋنداۋدان ءوتىپ جاتىر.

ەسكە سالا كەتەيىك، بۇعان دەيىن ەلوردا اكىمى التاي كولگىنوۆ ۆاكتسيناتسيالانعاندار اراسىندا ەكى بولمەلى پاتەردىڭ ۇتىس ويىنى وتكىزىلەتىنىن حابارلاعان. وعان ۆاكتسينانىڭ ءبىرىنشى كومپونەنتىن 25 ماۋسىم مەن 31 تامىز ارالىعىندا العان ازاماتتار عانا قاتىسا الادى.