بۇگىندە الەمدە قازاقستاننىڭ ازاماتتىعىن الماعان, بىراق ۇلتى قازاق 5 ملن-عا جۋىق قانداسىمىز بار. ولاردىڭ كوبى قازاقستان ۋنيۆەرسيتەتتەرىندە جوعارى ءبىلىم العىسى كەلەدى. حالىقارالىق ءبىلىم بەرۋ كورپوراتسياسىنىڭ ءبىرىنشى پرورەكتورى قايىرجان مەڭدىعاليەۆ وقۋ ورنىنا call-ورتالىعىنا, مەسسەندجەرلەر مەن الەۋمەتتىك جەلى بەتتەرىنە شەتەلدىك قانداس-تالاپكەرلەردەن مەملەكەتتىك گرانتتارعا قاتىستى كوپتەگەن ساۋال كەلىپ تۇسكەنىن ايتتى.
ء«بىلىم جانە عىلىم مينيسترلىگى جىل سايىن ەلىمىزدىڭ جوعارى وقۋ ورىندارىندا جوعارى ءبىلىم الۋ ءۇشىن 50 مىڭنان اسا گرانت بولەدى. بۇل رەتتە, قازاقستان ازاماتتارى ەمەس, ۇلتى قازاق ادامدار دا مەملەكەتتىك گرانتتار كونكۋرسىنا قاتىسا الۋى ءۇشىن جاقسى جاعدايلار جاسالۋدا. گرانت الۋ ءۇشىن ۇبت تاپسىرۋ قاجەت. كەيبىر تاپسىرمالار ەلىمىزدىڭ مەكتەپ پاندەرىنەن الىنعان. مىسالى, قازاقستان تاريحى نەمەسە قازاقستان گەوگرافياسى. وسىعان بايلانىستى ءبىلىم جانە عىلىم مينيسترلىگى قازاقستان رەسپۋبليكاسىنىڭ ازاماتتارى ەمەس, ۇلتى قازاق ادامدار ءۇشىن 4% كۆوتا بولەدى. بىراق ءبىراز ادام ءوتۋ ءۇشىن قاجەتتى ۇپايىن جيناي المايمىن دەپ قورقادى. سوندىقتان ايعازى قۇسايىنوۆ باستاعان حالىقارالىق ءبىلىم بەرۋ كورپوراتسياسىنىڭ باقىلاۋ كەڭەسى 20 ىشكى گرانت ءبولدى. «وتانعا بارار جول» بايقاۋىنىڭ جەڭىمپازدارى ءبىزدىڭ ەسەبىمىزدەن وقىعانىن قالايمىز», دەدى ق.مەڭدىعاليەۆ.
بايقاۋ بىرنەشە كەزەڭنەن تۇرادى جانە ونلاين فورماتتا وتەدى. نەگىزگى كەزەڭدە قاتىسۋشىلار الەۋمەتتىك جەلىدە جاريالاناتىن «قازاق حالقىنىڭ تاريحىنداعى كورنەكتى تۇلعالار» جانە «مەن نەگە حالىقارالىق ءبىلىم بەرۋ كورپوراتسياسىنا تۇسكىم كەلەدى؟» تاقىرىپتارىندا بەينە-ەسسە دايىنداۋى ءتيىس. بايقاۋ قورىتىندىسى 26 شىلدەدە شىعارىلادى. فينالدا قاتىسۋشىلار ونلاين-اڭگىمەلەسۋدەن وتەدى. بايقاۋ جە-
ءڭىمپازدارى حالىقارالىق ءبىلىم بەرۋ كورپوراتسياسىندا – قازبسقا جانە قاۋ جوعارى وقۋ ورىندارىندا وقۋعا 20 ىشكى گرانت الادى.
حالىقارالىق ءبىلىم بەرۋ كورپوراتسياسىنىڭ رەكتورى مارگاريتا يماندوسوۆا شەتەلدىك ستۋدەنتتەردىڭ قازاقستاندىق جاعدايلارعا جىلدام بەيىمدەلۋى ءۇشىن كەشەندى جۇمىس جۇرگىزىلۋ كەرەك ەكەنىن, مۇنداي باعىتتا وقۋ ورنىنىڭ تاجىريبەسى جەتكىلىكتى ەكەنىن جەتكىزدى.
«بۇل باعىتتاعى تاجىريبەمىز مول. بۇرىنعى وقۋ ورىندارىندا دا شەتەلدىك ستۋدەنتتەر وقىعان. قازىرگى ۇتقىرلىق باعدارلاماسى بويىنشا دا ستۋدەنتتەر كەلىپ وقيدى. بۇگىندە جوو-دا 69 شەتەل ازاماتى ءبىلىم الۋدا. ستۋدەنتتەر تاراپىنان تۋىنداعان ماسەلەلەردى ۋاقتىلى ءارى جەدەل شەشۋگە مۇمكىندىگىمىز بار. بۇل ءۇشىن ارنايى بولىمدەر (حالىقارالىق كەڭسە مەن الەۋمەتتىك دامۋ دەپارتامەنتى) اشىلدى. وسى بولىمدەردىڭ قىزمەتكەرلەرى ستۋدەنتتەردىڭ ماسەلەلەرىن شەشىپ بەرۋگە ءاردايىم دايىن», دەدى م.يماندوسوۆا.
حالىقارالىق ءبىلىم بەرۋ كورپوراتسياسى قازاقستاننىڭ وزگە دە جوعارى وقۋ ورىندارىن ۇلگى الۋعا جانە باستامانى قولداۋعا شاقىردى.
«ەگەر بولاشاقتا 129 جوو-نىڭ ارقايسىسى 1 گرانتتان بولسە, سايكەسىنشە 129 تالاپكەر ءوز وتباسىلارىمەن بىرگە تۋعان جەرىندە ءوز بولاشاعىن تابۋعا مۇمكىندىك الادى. ءدال وسىنداي قادامدار قازاقستاندا قازاق حالقىنىڭ ۇلتتىق جاڭعىرۋىنا الىپ كەلەدى», دەدى حالىقارالىق ءبىلىم بەرۋ كورپوراتسياسىنىڭ ءبىرىنشى پرورەكتورى ق.مەڭدىعاليەۆ.
قوسا كەتەيىك, حالىقارالىق ءبىلىم بەرۋ كورپوراتسياسى (حبك) 2007 جىلى ەلباسى نۇرسۇلتان نازارباەۆتىڭ ەلىمىزدەگى ءبىلىم بەرۋ سالاسىنىڭ ساپاسىن كوتەرۋ جانە ۋنيۆەرسيتەتتەر الەۋەتىن ارتتىرۋ باعىتىندا جۇرگىزگەن ساياساتى نەگىزىندە قازاق باس ساۋلەت-قۇرىلىس اكادەمياسى (قازبسقا) مەن قازاق-امەريكا ۋنيۆەرسيتەتىن (قاۋ) بىرىكتىرىپ قۇرىلعان بولاتىن.
