تۋردىڭ ورتالىق ويىنى تۋرنير كەستەسىندە ۇزدىك ۇشتىكتىڭ قاتارىندا كەلە جاتقان قوستانايدىڭ «توبىلى» مەن الماتىنىڭ «قايراتى» اراسىندا ءوتتى. ءۇش ۇپاي ءۇشىن جان الىسىپ, جان بەرىسكەن باسەكەدە كوماندالاردىڭ كۇشتەرى تەڭ بولدى. قوستانايداعى ورتالىق ستاديوندا ۇيىمداستىرىلعان كەزدەسۋدە كوماندالار ءتورت گول سوعىپ, ماتچ 2:2 ەسەبىمەن اياقتالدى.
18-تۋردىڭ ءبىر كۇن بۇرىنعى ويىنىندا «استانانىڭ» سىرت الاڭدا «قىزىلجاردان» جەڭىلىپ, ءۇش ۇپايدان قاعىلعانى «توبىلعا» دا, «قايراتقا» دا ءتيىمدى بولدى جانە بۇل ەكى كومانداعا دا قوسىمشا موتيۆاتسيا سىيلادى. ويتكەنى بۇل كەزدەسۋدە «توبىل» جەڭىسكە جەتەتىن بولسا, تۋرنير كەستەسىندە «استانادان» ءۇش ۇپايعا, «قايراتتان» سەگىز ۇپايعا الىستاپ, چەمپيوناتتا جەكە-دارا كوش باستايتىن ەدى. ال وڭتۇستىكاستانالىق ۇجىم ءۇش ۇپايعا يەلىك ەتسە, وندا اراداعى ۇپاي سانىن ەكەۋگە دەيىن قىسقارتىپ, تۋرنير كەستەسىندەگى جاعدايدى ودان ءارى شيەلەنىستىرىپ جىبەرەتىن ەدى. بۇل, ارينە, ەڭ ءبىرىنشى قازاقستاندىق فۋتبول جانكۇيەرلەرىنە ءتيىمدى-ءتىن. سەبەبى قالعان تۋرلاردا كوشباسشى كوماندالار مەيلىنشە ۇپايدان شاشاۋ شىعارماي, جيناقى جانە جانكۇيەرلەرگە ۇنايتىن تارتىستى ويىن كورسەتەدى. ەگەر جانكۇيەرلەردە ماتچتىڭ ستسەناريىن جازۋعا, الدىن الا جوسپارلاۋعا مۇمكىندىك بولعاندا, كەشەگى «توبىل» مەن «قايرات» اراسىنداعى ويىننىڭ شارىقتاۋ شەگى تۋرنير كەستەسىنىڭ شيەلەنىسۋىمەن اياقتالار ەدى.
دەگەنمەن, بۇل كەزدەسۋ «استانا» فۋتبولشىلارىنىڭ جانە جانكۇيەرلەرىنىڭ قۋانىشىنا وراي تەڭ ەسەپپەن اياقتالدى. ويىندى كوتەرىڭكى كوڭىل-كۇيدە باستاعان «قايرات» فۋتبولشىلارى 23-مينۋتتا ەسەپتى اشتى. گول اۆتورى – ارتۋر شۋشەناچەۆ. بۇل – ارتۋردىڭ قاتارىنان سوڭعى ءۇش ويىندا سوققان ءۇشىنشى گولى, ال بيىلعى چەمپيوناتتاعى جالپى جەتىنشى دوبى. وسى ناتيجەسىنىڭ ارقاسىندا ول ۇزدىك سۇرمەرگەندەر قاتارىنا قوسىلدى. ءبىرىنشى تايمنىڭ سوڭىنا دەيىن قوناقتاردىڭ ەسەپتى ەسەلەيتىن تاماشا مۇمكىندىكتەرى بولعان ەدى, الايدا ۆاگنەر لاۆ تا, ارتۋر شۋشەناچەۆ تە ءوز مۇمكىندىكتەرىن ءتيىمدى پايدالانا المادى. ءسويتىپ ءبىرىنشى 45 مينۋت 0:1 ەسەبىمەن «قايراتتىڭ» پايداسىنا اياقتالدى.
ءۇزىلىس كەزىندە الەكساندر موسكالەنكودان ءتيىستى اقىل-كەڭەس العان الاڭ يەلەرى ويىندارىنا وزگەرىس جاساپ, ناتيجەسىندە 53-مينۋتتا رۋسلان ءۆاليۋلليننىڭ ارقاسىندا تارازى باسىن تەڭەستىرىلدى. ارادا 13 مينۋت وتكەندە ازات نۇرعاليەۆتىڭ ايىپ الاڭىنا اسىرعان پاسىن قايتارۋعا تىرىسقان رادە دۋگاليچ ابايسىزدا ءوز قاقپاسىنا گول سوعىپ, «توبىلدى» العا شىعاردى. وسى گولدان كەيىن ستاديونعا جينالعان جانكۇيەرلەر دە, ويىندى تەلەديدار ارقىلى تاماشالاعان كورەرمەندەر دە الاڭ يەلەرىنە ءۇش ۇپايدى ۇستاتا سالعان. الايدا ەكىنشى تايمدا «توبىلدىڭ» ويىنىن كۇشەيتۋ ءۇشىن الاڭعا شىققان سەرىكجان مۇجىقوۆ 73-مينۋتتا جوق جەردەن قىزىل قاعاز الىپ, الاڭنان قۋىلدى. 10 ويىنشىمەن قالعان قوستانايلىقتار قورعانىستىڭ جوسپارىن ويلاستىرامىز دەگەنشە ارداگەر فۋتبولشى ۆاگنەر لاۆ مەرگەندىگىمەن كوزگە ءتۇسىپ, تارازى باسىن تەڭەستىرىپ كەتتى. قالعان 14 مينۋتتا تابلوداعى 2:2 ەسەبى تورەشىنىڭ سوڭعى ىسقىرىعىنا دەيىن وزگەرىسسىز قالدى. ءبىر قىزىعى, ەكى كلۋب اراسىندا ءبىرىنشى اينالىمداعى كەزدەسۋدە دە وسىنداي ەسەپ تىركەلگەن بولاتىن.
ورالداعى «اقجايىق» ستاديونىندا وتكەن ويىندا «اقجايىق» جامبىلدىڭ «تارازىن» قابىلداپ, ءىرى ەسەپپەن جەڭىسكە جەتتى. ويىنداعى العاشقى گولدى 29-مينۋتتا دميتري ميچۋرەنكوۆ پەنالتيدەن سوقتى. ال 69-مينۋتتا ميرام ساپانوۆ ەسەپتى ەسەلەسە, اراعا ەكى مينۋت سالىپ ۆياچەسلاۆ شۆىرەۆ ماتچتىڭ نۇكتەسىن قويدى.
چەمپيوناتتى ءتاپ-ءتاۋىر باستاعان اقتاۋدىڭ «كاسپي» كلۋبى كەيىنگى تۋرلاردا سۇرەڭسىز ويىن كورسەتىپ ءجۇر. 16-تۋردا ءوز الاڭىندا «قايساردان» 2:4 ەسەبىمەن جەڭىلسە, 17-تۋردا سىرت الاڭدا «قايراتتى» ۇتا المادى. ال مىنە, 18-تۋردا چەمپيوناتتىڭ دەبيۋتانتى تۇركىستاننىڭ «تۇرانىمەن» اقتاۋدا ۇپاي بولىسۋگە ءماجبۇر بولدى. «جاس قانات» ستاديونىندا وتكەن كەزدەسۋ 0:0 ەسەبىمەن اياقتالدى.
سونىمەن قاتار اتىراۋدا وتكەن 18-تۋردىڭ سوڭعى ويىنىندا دا تەڭ ەسەپ تىركەلدى. ءوز الاڭىندا قىزىلوردانىڭ «قايسارىن» قابىلداعان «اتىراۋ» كەزدەسۋدىڭ ەسەبىن ءبىرىنشى بولىپ اشقانىمەن, ەكىنشى تايمنىڭ 74-مينۋتىندا قوناقتار تارازى باسىن تەڭەستىرىپ كەتتى. الاڭ يەلەرىنەن پەتر گجەلچاك مەرگەندىك تانىتسا, «قايسار» ساپىنان دۋمان نارزىلداەۆ گول سوقتى.
2 جانە 3 شىلدە كۇندەرى وتەتىن 19-تۋر ويىندارىندا «قايرات» – «اتىراۋ», «استانا» – «شاحتەر», «اقتوبە» – «اقجايىق», «تۇران» – «توبىل», «قايسار» – «ورداباسى» جانە «جەتىسۋ» – «قىزىلجار» كوماندالارى سىنعا تۇسەدى. وسى ويىنداردان كەيىن قازاقستان چەمپيوناتى ەكى اي ۇزىلىسكە شىعىپ, ماتچتار قىركۇيەكتە جالعاسادى. بۇل ۋاقىت ارالىعىندا كوماندالار قازاقستان كۋبوگى ويىندارىنا جانە ەۋرودودا باسەكەلەرىنە قاتىسادى.
