اگەنتتىك يپوتەكالىق تۇرعىن ءۇي قارىزدارى بويىنشا جتسم-ءنىڭ شەكتى ءمانىن 56-دان 25-كە ازايتىپ, ميكروكرەديتتەر (كەپىلدى جانە كەپىلسىز) بويىنشا جتسم-ءنىڭ شەكتى ءمانى 56 پايىز دەڭگەيىندە ساقتاعان. ال 45 كۇنگە دەيىنگى مەرزىمگە 50 اەك-كە دەيىنگى سوماعا بەرىلەتىن كەپىلدى ميكروكرەديتتەر بويىنشا نومينالدى سىياقى مولشەرلەمەسىنىڭ شەكتى ءمانى 30-دان 20 پايىزعا دەيىن تومەندەتىلىپتى. ارينە, بۇل دەرەكتەر نەسيە الۋعا ىنتالى ازاماتتار ءۇشىن قاجەت-اق. دەگەنمەن نەسيە الۋ بار دا, ونى دەر ۋاقىتىندا قايتارۋ بار. دەر كەزىندە تولەنبەي قالعان نەسيە سالدارىنان كەي ازاماتتار قايتادان بانككە بەتتەي الماي قالىپ جاتادى. ياعني ونىڭ نەسيە تاريحىنا قارا تاڭبا باسىلىپ, ەكىنشى قايتارا نەسيە راسىمدەۋ مۇمكىندىگى جويىلادى. وسىعان وراي قارجى نارىعىن رەتتەۋ جانە دامىتۋ اگەنتتىگى وتەلمەگەن پروبلەمالىق بەرەشەكتىڭ سالدارىنان تەرىس كرەديتتىك تاريحى بار جانە ونى قايتا قۇرىلىمداۋدى قاجەت ەتەتىن قارىز الۋشى-جەكە تۇلعالاردى وڭالتۋ تەتىگىن ەنگىزىپ وتىر.
اتالعان تەتىك قارىز الۋشىعا كرەديتتىك بيۋرولار جۇيەسىندە «وڭالتىلدى» مارتەبەسىن بەرۋدى كوزدەيدى. ونداي مارتەبەنى الۋ ءۇشىن قانداي دا ءبىر قۇجات تالاپ ەتىلمەيدى. ءراسىمدى نەسيە بيۋروسى جۇرگىزەدى. وڭالتۋ تەتىگىندە قارىز الۋشىنىڭ ساناتىنا بايلانىستى «وڭالتىلدى» مارتەبەسىن الۋ ءۇشىن 3 باعىت كوزدەلگەن. ونىڭ العاشقىسى كرەديت بويىنشا «وڭالتىلدى» مارتەبەسى مەرزىمى وتكەن بەرەشەك وتەلگەننەن كەيىن 12 اي وتكەن سوڭ جانە 30 كۇننەن استام مەرزىمىن وتكىزۋ بولماعان جاعدايدا تاعايىندالماق. قازىرگى كەزدە وسى باعىت اياسىندا 1,4 ملن ادام «وڭالتىلدى» مارتەبەسىن الىپتى.
ەكىنشى باعىت بويىنشا بانكتەر جانە ميكروقارجى ۇيىمدارى مەرزىمى وتكەن بەرەشەكتى ءىشىنارا وتەگەن قارىز الۋشىلاردىڭ تولەم قابىلەتىن باعالاي وتىرىپ نەسيەنى وتەۋدىڭ بارىنشا ىڭعايلى كەستەسىمەن قوسا وڭالتۋ جوسپارىن جاسايدى. مۇنداي نەسيە بويىنشا دا «وڭالتىلدى» مارتەبەسى بەرەشەكتىڭ بارلىق سوماسى وتەلگەننەن كەيىن 12 اي وتكەن سوڭ جانە 30 كۇننەن استام مەرزىمىن وتكىزۋ بولماعان كەزدە عانا تاعايىندالادى. ال ەگەر قارىز الۋشى وڭالتۋ جوسپارىن ورىنداماعان بولسا وندا وڭالتۋ راسىمىنە ءوتىنىشتى تەك 5 جىلدان سوڭ عانا بەرە الادى.
ءۇشىنشى باعىتقا سايكەس نەسيە العاننان بەرى بىردە-ءبىر مارتە قارىزىن وتەمەگەن ادامدارعا قارىز الۋشىلاردىڭ پروبلەمالىق بەرەشەگىن رەتتەۋدىڭ سوتقا دەيىنگى ءتارتىبى قولدانىلادى.
ءبىرىنشى نەسيە بيۋروسىنىڭ مالىمدەۋىنشە, 2021 جىلدىڭ 1 ساۋىرىندە تۇتىنۋشىلىق نەسيە بويىنشا ورتاشا زايم سوماسى 438 مىڭ تەڭگە بولعان. ءبىر جىل ىشىندەگى ءوسىم 3,8 پايىزدى قۇراعان. ەلدەگى ەكونوميكالىق بەلسەندى حالىق سانى شامامەن 9 ملن-عا جۋىقتاسا, سونىڭ 1,8 ملن-دا نەسيە جوق. جالپى, ەل تۇرعىندارىنىڭ تۇتىنۋشىلىق نەسيە بويىنشا قارىز 7,31 ترلن تەڭگەگە جەتكەن. 2020 جىلمەن سالىستىرعاندا 17,6 پايىزعا ءوسىپتى. بۇل سومانىڭ 92 پايىزى بانكتەردە راسىمدەلسە, قالعان بولىگىن ازاماتتار ميكروقارجى ۇيىمدارى مەن سول سياقتى كىشىگىرىم كومپانيالاردا راسىمدەگەن. ەكىنشى دەڭگەيلى بانكتەر اراسىندا جيىنتىق قارىز پورتفەلىنىڭ ءوسىمى بويىنشا Kaspi كوش باسىندا ء(بىر توقساندا +95 ملرد تەڭگە). ودان كەيىنگى ورىنداردا «سبەربانك» (+52 ملرد تەڭگە) پەن «الفا بانك» (+40 ملرد تەڭگە) تۇر.
