كەڭەس توراعاسى, ءماجىلىس دەپۋتاتى ءمادي احمەتوۆتىڭ ايتۋىنشا, سوڭعى 4 جىلدا «باستاۋ بيزنەس» جوباسى بويىنشا 150 مىڭنان استام ادام وقىپ شىققان, الايدا ونىڭ 30%-تەن استامى عانا جەكە بيزنەسىن اشقان.
«مەملەكەت باسشىسى قاسىم-جومارت توقاەۆ اتاپ وتكەندەي, باعدارلامانىڭ قارجىلىق جاعىن عانا ەمەس, ونى جۇزەگە اسىرۋ تەتىكتەرىن دە قايتا قاراۋ كەرەك. جوبا تۇلەكتەرىنىڭ 10%-ى عانا نەسيە, 19%-ى گرانت الدى. 100 مىڭنان استام ادام مەملەكەتتىك قولداۋدان تىس قالدى. اسىرەسە, وسى باعدارلاما بويىنشا اۋىلدا وقىعاندار ءۇشىن قاراجات جەتكىلىكسىز. باعدارلامانىڭ قارجىلىق كولەمىن عانا ەمەس, ونى ىسكە اسىرۋ تەتىكتەرىن دە قايتا قاراۋ قاجەت دەپ سانايمىن», دەدى ءمادي احمەتوۆ.
بۇل رەتتە كەڭەس توراعاسى, جاستاردىڭ وسىنداي باعدارلامالاردىڭ بار ەكەندىگىنەن حابارى ازدىعىنا نازار اۋداردى.
«جاس كاسىپكەر» جوباسى اياسىندا ءۇش جىل بويى جۇمىسسىز جاستاردى كاسىپكەرلىك نەگىزدەرىنە وقىتۋ جانە ءوز ءىسىن اشۋ ءۇشىن وتەۋسىز گرانتتار بەرۋ جوسپارلانعان بولاتىن. بۇل ءۇشىن مەملەكەتتىك بيۋدجەتتەن 32 ملرد تەڭگە ءبولىندى. الايدا, قويىلعان ينديكاتورلار ءىشىنارا عانا ورىندالدى, ال جوبانىڭ ءوزى ءبىر جىل عانا جۇمىس ىستەدى», دەپ اتاپ ءوتتى ول.
ءوز كەزەگىندە, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ءبىرىنشى ورىنباسارى ناريمان ابىلشايىقوۆ بيىل 30 مىڭعا جۋىق جۇمىسسىزدى وقىتۋ كوزدەلگەنىن, ونىڭ ىشىندە 20 مىڭى NEET ساناتىنداعى (وقىمايتىن, جۇمىس ىستەمەيتىن جانە بىلىكتىلىگىن ارتتىرمايتىن) جاستار قاتارىنان ەكەنىن حابارلادى.
ء«ۇش جىل ىشىندە 300 مىڭعا جۋىق جاس بيزنەس جۇرگىزۋدىڭ قىر-سىرىن مەڭگەرۋگە ءتيىس ەدى. بىراق ءىس جۇزىندە ءبىز 2019 جىلدان باستاپ «جاس كاسىپكەر» جوباسى بويىنشا 60 مىڭ ادامنىڭ ورنىنا 20 مىڭ جاس وقىپ, تەك 6 مىڭى عانا بيزنەس اشقانىن كورىپ وتىرمىز. بۇل جەردە بەيىندى ۆەدومستۆونىڭ نازارىن وسى باعىتتاعى جۇمىستى جانداندىرۋ قاجەتتىگىنە اۋدارعىم كەلەدى», دەدى «Jas Otan» توراعاسى نۇرجان جەتپىسباەۆ.
سونداي-اق وتىرىس بارىسىندا بىرقاتار باستاما كوتەرىلدى. سونىڭ ىشىندە 29 جاسقا دەيىنگى جاستار اراسىنان شىققان كاسىپكەرلەر قوسىمشا سالىق جەڭىلدىكتەرى مەن مەملەكەتتىك قولداۋ الۋى ءۇشىن «جاس كاسىپكەر» ۇعىمىن زاڭدى تۇردە بەكىتۋدى ۇسىندى.
بۇدان باسقا, ەڭبەك جانە الەۋمەتتىك قورعاۋ مينيسترلىگىنە «جاس كاسىپكەر» جانە «باستاۋ بيزنەس» جوبالارى تۋرالى اقپاراتتىق-ءتۇسىندىرۋ جۇمىستارىن كۇشەيتۋدى, سونداي-اق گرانتتىق قارجىلاندىرۋ مولشەرىن قازىرگى 500 مىڭنان 1 ميلليون تەڭگەگە دەيىن ۇلعايتۋ تۋرالى ماسەلەنى پىسىقتاۋدى ۇسىندى.
