اتىراۋدا پوليتسەيلەر 23 ماۋسىم كۇنى الاياقتىق نيەتپەن تۇرعىنداردىڭ سەنىمدەرىنە كىرىپ, ولاردىڭ جەكە بانك كارتوچكالارىنان اقشا جىمقىرعان بەلگىسىز ادامداردى انىقتادى. ءبىر كۇن ىشىندە بۇنداي وقيعانىڭ ءۇش دەرەگى تىركەلگەن.
مىسالى, بەلگىسىز بىرەۋ 37 جاستاعى قالا تۇرعىنىنا قۇرىلىس قۇرالدارىن اكەلىپ بەرەمىن دەپ ابونەنتتىك نومىرىنە Kaspi Gold كارتوچكاسى ارقىلى 805 مىڭ تەڭگە اۋدارتىپ, قايتارماي قويعان. جابىرلەنۋشى پوليتسەيلەرگە دەرەۋ شاعىمدانىپ, ناتيجەسىندە الاياق انىقتالىپ, ۇستالدى. تەكسەرۋ بارىسىندا كۇدىكتى 37 جاستاعى ايەل بولىپ شىقتى. وعان قاتىستى قر قك-ءنىڭ 190-بابى 1-بولىگىمەن سوتقا دەيىنگى تەرگەپ-تەكسەرۋ امالدارى جۇرگىزىلۋدە.
تاعى ءبىر ءجايت قالا تۇرعىنى 45 جاستاعى ايەلدىڭ باسىنان وتكەن. بەلگىسىز بىرەۋ ايەلگە گاراج قاقپاسىن قوندىرىپ بەرەمىن دەپ ابونەنتتىك نومىرىنە 105 مىڭ تەڭگە اقشاسىن اۋدارتىپ, قايتارماعان. ازاماتشا ءوزىنىڭ الدانىپ قالعانىن ءتۇسىنىپ, پوليتسياعا ارىزدانعان. كۇدىكتى بىردەن انىقتالىپ, ۇستالدى. 26 جاستاعى قالا تۇرعىنىنا قاتىستى قر قك-ءنىڭ 190-بابى 3-بولىگىمەن سوتقا دەيىنگى تەرگەپ-تەكسەرۋ امالدارى ءجۇرىپ جاتىر.
وسىعان ۇقساس وقيعا قۇلسارى قالاسىندا تىركەلدى. 49 جاستاعى ايەل ءوزىنىڭ بالالارىن جۇمىسقا ورنالاستىرامىن دەپ الدانىپ قالعان. 45 جاستاعى ەر ادام ونىڭ 400 مىڭ تەڭگە اقشاسىن اۋدارتىپ, قايتارماعان. قازىرگى ۋاقىتتا كۇدىكتىگە قاتىستى قر قك-ءنىڭ 190-بابى 3-بولىگىمەن سوتقا دەيىنگى تەرگەپ-تەكسەرۋ جۇرگىزىلۋدە.
قازىرگى ۋاقىتتا ازاماتتاردان ينتەرنەت-الاياقتىققا بايلانىستى شاعىم-ارىزدارىنىڭ كوبەيىپ كەتۋى قىلمىستىڭ بۇل ءتۇرىنىڭ قاتتى بەلەڭ الىپ بارا جاتقاندىعىن اڭعارتادى. ماسەلەن, وتكەن جىلى وبلىس اۋماعىندا ينتەرنەت-الاياقتىق بويىنشا بەس اي ىشىندە 300-گە جۋىق فاكتى تىركەلسە, بيىل جىل باسىنان 400-تەن استام فاكتى تىركەلگەن.
