«ءبىز ەكىباستۇزدا تۇرامىز!»

ايماقتار • 25 ماۋسىم، 2021

«ءبىز ەكىباستۇزدا تۇرامىز!»

21 رەت كورسەتىلدى

جۋىردا ۇكىمەت تاپسىرماسىنا وراي «ەكىباستۇزدى دامىتۋ ستراتەگياسى – 2021-2023» باعدارلاماسى باستالدى. جوسپارعا سايكەس تۇرعىندار سانىن 200 مىڭعا دەيىن كوبەيتىپ، قالانى دەربەس ەكونوميكالىق ورتالىققا اينالدىرۋ كەرەك. ومىرگە جايلى قاۋىپسىز ورتا مەن ادامي كاپيتالدى دامىتۋعا مۇمكىندىكتەر جاساپ، قالا ەكونوميكاسىنىڭ قۇرىلىمىن ەۆوليۋتسيالىق تۇردە وزگەرتۋ قاجەت.

فاريدا بىقاي

وسى ماڭىزدى باعىتتاعى تۇجىرىمداما اياسىندا الداعى ءۇش جىلدا 3،5 مىڭ وتباسى ءۇشىن 213 مىڭ شارشى مەتر باسپانا سالۋ جوسپارلانعان. سوندىقتان دا بولار، ەكىباستۇز قازىر وڭىردەگى ناعىز قۇرىلىس ورتالىعىنا اينالعانداي. بىلتىر قالا اكىمدىگى 2021 جىلى قالادا 630 پاتەرلى 8 تۇرعىن ءۇيدىڭ قۇرىلىسى باستالادى دەپ حابارلاعان-دى. ياعني جىل سايىن 68،5 مىڭ شارشى مەتر تۇرعىن ءۇي پايدالانۋعا بەرىلەدى. بۇل تۇرعىنداردى باسپانامەن قامتاماسىز ەتۋگە مۇمكىندىك بەرەدى. بۇعان دەيىن ەكىباستۇزدا مۇنداي قۇرىلىس كولەمى مەن تۇرعىن ۇيلەر سالىنباعان.

قالا اكىمى ارداق قاڭتارباەۆتىڭ ايتۋىنشا، وتكەن جىلى 1 مىڭنان استام پاتەرى بار 13 كوپ پاتەرلى ءۇي سالىنعان. بۇل باعىتتا «جۇمىسپەن قامتۋدىڭ جول كارتاسى» بويىنشا بولىنگەن 11 ملرد تەڭگەدەن استام قارجىنىڭ كوپ بولىگى تۇرعىن ءۇي قۇرىلىسىنا تيەسىلى. جاڭادان بوي كوتەرگەن جانە قايتا جاڭارتىلعان ۇيلەر سانى – 12. ال 9-شى شاعىن اۋدانداعى №4 ءۇيدىڭ قۇرىلىسى مەملەكەتتىك قىزمەتشىلەر تاراپىنان باقىلاۋدىڭ السىزدىگىنەن كەش اياقتالىپ، ءتيىستى ادامدار جاۋاپقا تارتىلدى.

كەزەكتە تۇرعان 646 وتباسى جالعا بەرىلەتىن تۇرعىن ۇيگە يە بولدى. ولاردىڭ اراسىندا 132 كوپبالالى وتباسى، 123 جەتىم بالالار جانە 83 بيۋدجەتتىك سالا قىزمەتكەرلەرى، 308 الەۋمەتتىك توپ ساناتتارىنداعى جاندار پاتەر كىلتتەرىن الدى.

وتكەن اپتادا قالادا «جۇمىسپەن قامتۋدىڭ جول كارتاسى – 2021» باعدارلاماسى بويىنشا ق.ساتباەۆ كوشەسى، 37 مەكەنجايىندا جاڭادان سالىنعان 6 تۇرعىن ءۇي پايدالانۋعا بەرىلدى. ۇيلەر 37/1، 37/2 دەگەن بولىكتەرىمەن بولىنگەن. قالا اكىمدىگىنىڭ مالىمەتىنشە، بۇل 6 تۇرعىن ۇيدە 432 پاتەر بار. جاڭا ۇيلەردەن پاتەرلەردى كوپبالالى وتباسىلار، جەتىم بالالار، بيۋدجەتتىك ۇيىمداردىڭ قىزمەتكەرلەرى جانە ءۇي كەزەگىندە تۇرعان تۇرعىندار يەلەندى. بۇل قازىرگى ەسەپتە تۇرعان جەتىم بالالار مەن كوپبالالى وتباسىلاردىڭ قاجەتتىلىكتەرىن تولىق قاناعاتتاندىرىپ، الەۋمەتتىك وسال ازاماتتار مەن بيۋدجەت قىزمەتكەرلەرىنىڭ كەزەگىن تومەندەتۋگە مۇمكىندىك بەرۋدە. مىسالى، «التىن القا»، «كۇمىس القا»، بۇرىن «باتىر انا» اتاعىن العان، سونداي-اق I جانە II دارەجەلى «انا داڭقى» وردەندەرىمەن ماراپاتتالعان كوپبالالى انالار گۇلجانار كەلدىبەكوۆا، نازگۇل ورالقىزى، ريزا قۇرمانعاليەۆا، ەلۆيرا ساپاربەكوۆا، ماحاببات احمەتوۆا، جىبەك ۋاقباەۆلار ءۇيلى بولدى.

– ءبىز، كوپبالالى انالار بۇگىن پاتەر كىلتتەرىن الدىق. وتە قۋانىشتىمىز. ءبىز الەمگە ايگىلى قالا ەكىباستۇزدا تۇرامىز! وسىلاي ماقتانامىز. بالالارىمىز وسى جەردە ءوسىپ كەلەدى، بۇل – مەرەي، بايلىق. جاقسى قۋانىشتى كۇندەر، قونىستويلارى كوپ بولا بەرسىن! – دەيدى ايجان قۋاندىققىزى.

سونىمەن بىرگە، ا.ششەرباچۋك، س.شاكەنوۆ، د.شاكەنوۆا، ا.قالياسقاروۆا، ن.ورازباەۆ سەكىلدى اتا-انانىڭ قامقورلىعىنسىز قالعان بالالار، كوپتەگەن از قامتاماسىز ەتىلگەن الەۋمەتتىك ءالسىز وتباسىلار جانە بيۋدجەتتىك سالا قىزمەتكەرلەرى دە ءوز پاتەرلەرىنە قول جەتكىزدى.

ءيا، ء«بىز ەكىباستۇزدا تۇرامىز!» دەيتىن تۇرعىندار سانى كوبەيە بەرسىن، ۇيلەر دە بىرىنەن سوڭ ءبىرى بوي كوتەرىپ، كەنشىلەر قالاسى وسە بەرسىن.

پاۆلودار وبلىسى