«قازاقستاننىڭ 100 جاڭا ەسىمى» جوباسىندا مارەگە جەتكەن الماتىلىقتار كىمدەر؟

ءتورت جىلدىڭ ىشىندە جوباعا 7 مىڭنان استام ادام قاتىسىپ، ولاردىڭ 163-ءى جەڭىمپاز اتاندى. ونىڭ 46-سى الماتىلىقتار.  بايقاۋدىڭ ءتورتىنشى كەزەڭىندە بارلىق جەتى سالا بويىنشا («قوعام»، «مادەنيەت پەن سپورت»، «مەديتسينا»، «عىلىم مەن يننوۆاتسيا»، «بيزنەس»، «ەكولوگيا» مەن ء«بىلىم») ءۇش مىڭعا جۋىق قازاقستاندىق ءوتىنىم بەرگەن، اراسىندا 9 الماتىلىق، ياعني كاسىپكەرلەر، عالىمدار، جۋرناليستەر، سپورتشىلار، مۇعالىمدەر مەن ەرىكتىلەر بار. ولار ءتۇرلى سالالاردا تابىستارعا قول جەتكىزدى ءارى  ولاردىڭ تاجىريبەسى باسقا الماتىلىقتار ءۇشىن ۇلگى.

الماتى اكىمىنىڭ ورىنباسارى ەرجان باباقۇماروۆ جەڭىمپازدارعا العىس حاتتار تابىس ەتىپ، «قازاقستاننىڭ 100 جاڭا ەسىمى» جوباسى ەل تاۋەلسىزدىگىنىڭ 30 جىلدىعىنا وراي وتكىزىلگەنىن اتادى.

«جوبادا تاۋەلسىزدىك جىلدارىندا جەتىستىككە جەتكەن، جەڭىسكە وزدەرىنىڭ تالانتى، ەڭبەكقورلىعى ارقىلى باسەكەگە قابىلەتتى ءارى تابىستى بەينەسىن قالىپتاستىرۋعا ءوز ۇلەستەرىن قوسقان ادامدار جەتتى. ءبىزدىڭ وتانىمىز دارىندى ازاماتتارعا جاعداي جاسايدى. پاتريوتيزمدە وتانعا دەگەن سۇيىسپەنشىلىگىمىز ماڭىزدى. ءبىزدىڭ ەلىمىز جاستاردىڭ جەتىستىككە جەتۋىنە مۇمكىندىك بەرەدى. جوبا جەڭىمپازدارى ميلليونداعان ادامدارعا ءۇشىن ۇلگى»، دەدى ە. باباقۇماروۆ.

جۇزدىككە ەنگەن جاڭا ەسىمدەردىڭ ىشىندە-قازۇاۋ حالىقارالىق ۆاكتسينولوگيا ورتالىعىنىڭ ديرەكتورى، پروفەسسور-قايسار تابىنوۆ. عالىم عىلىم مەن يننوۆاتسيا سالاسىندا جەڭىمپاز اتانسا، ول ءوز توبىمەن بىرگە سوڭعى 15 جىل ىشىندە قاۋىپتى ينفەكتسيالارعا قارسى 10-عا جۋىق ۆاكتسينا جاسادى. ونىڭ بىرەگەي جوبالارى قازىردىڭ وزىندە قولدانىلادى. جەڭىمپازدار قاتارىندا جاڭاشىل ءارى تابىستى كاسىپكەر تاير باتالوۆ تا بار. ول استىق نارىعىنداعى الەمدىك اينالىمنىڭ 80%-نا دەيىن رەتتەيتىن كومپانيا قۇرۋ ارقىلى مىڭنان استام جۇمىس ورنىن قۇردى. جەڭىمپازدار تىزىمىندە پروفەسسور، جۋرناليست ءارى «تۇران-تۆ» تەلەارناسىنىڭ جۇرگىزۋشىسى، ابىلايحان اتىنداعى قازحقجاتۋ وقىتۋشىسى مادينا ءاشىموۆا بار. ول سونداي-اق «Nomad»ساياحاتشىلار كلۋبىن ۇيىمداستىردى.

«مەن بىرقاتار الەۋمەتتىك جوبالاردىڭ ۇيىمداستىرۋشىسىمىن، ءجۋرناليسپىن ءارى جوو-دا ساباق بەرەمىن. جاس قازاقستاندىقتارعا ءوز ارمانىنا جەتۋ كەرەكتىگىن كورسەتكىم كەلەدى. مەنىڭ جوباعا قاتىسۋىم ايەلدىڭ تاعدىرى تەك وتباسى مەن ۇيدە عانا ەمەس ەكەنىن كورسەتەدى»، دەدى مادينا ءاشىموۆا.

سونداي-اق «100 جاڭا ەسىم» جوباسىنىڭ جەڭىمپازدارى قاتارىندا: فوتوگراف، «OKO STUDIO» نەگىزىن قالاۋشى دانيار سارسەي ۇلى، اقش-تاعى حوككەي كلۋبىنىڭ جاتتىقتىرۋشىسى، Princeton Tiger Lilies كومانداسىنىڭ باس جاتتىقتىرۋشىسى، سپورتشى ءارى حوككەي شابۋىلشىسى بۇلبۇل كارتانباي، ستارتاپەر، Warwick Boring نەگىزىن قالاۋشى ءارى باس ينجەنەرى تايجان سانجار، حيميا ءپانىنىڭ مۇعالىمى، جاپوندىق انيمە «نارۋتو» ارقىلى مەكتەپ پانىنەن ساباق بەرەتىن ۇلان ۇسەنوۆ، «Kzphdgirlsunion» ەرىكتىلەر جوباسىنىڭ نەگىزىن، «Carl Zeiss» كومپانياسىنداعى ەكسترەمالدى ۋك-ليفتوگرافيا سالاسىنداعى عالىم ءامينا ميرساكيەۆا مەن اقش-تاعى «Qazaq time» جوباسىنىڭ جۇرگىزۋشىسى دانيار قوجان بار.