اكىمنىڭ ايتۋىنشا, كۇنباعىس جانە قاراقۇمىق داقىلدارى ەگىلگەن القاپتار ەداۋىر كوبەيتىلگەن. بيىل سوڭعىسى 42 مىڭ گەكتارعا ەگىلىپ, قازاقستان بويىنشا قاراقۇمىق داقىلدارى ەگىلگەن اۋماقتىڭ 44 پايىزىن قۇراعان.
پاۆلودار وبلىسىندا اۋىل شارۋاشىلىعى داقىلدارى 1,5 ميلليون گەكتاردان استام جەرگە سەبىلىپ, ەگىلگەن القاپ اۋدانى 6 پايىزعا وسكەن.
ايماق باسشىسىنىڭ بايانداۋىنشا, وبلىستاعى ەكونوميكانى ءارتاراپتاندىرۋ ءىسى اگروونەركاسىپتىك كەشەننىڭ الەۋەتى ەسەبىنەن جۇرگىزىلىپ كەلەدى. 2025 جىلعا دەيىن وڭىردە وسى سالاداعى جالپى قۇنى 230 ملرد تەڭگەنى قۇرايتىن 46 ينۆەستيتسيالىق جوبا جۇزەگە اسىرىلماق. ونىڭ جارتىسىنان كوبى بيىل ىسكە قوسىلادى.
«بيىل اۋىلدا قۇرىلىس جانە اباتتاندىرۋ باعىتىندا بىردەن 150 جوبانى جۇزەگە اسىرامىز. ولاردىڭ جارتىسىنا جۋىعى «اۋىل – ەل بەسىگى» باعدارلاماسى بويىنشا ىسكە اسىرىلادى. اۋىلدارداعى ءال-اۋقاتتىڭ نەگىزگى كورسەتكىشتەرىنىڭ ءبىرى – سۋمەن جابدىقتاۋ. ءبىز اۋىل تۇرعىندارىن ساپالى اۋىز سۋعا قول جەتكىزۋمەن قامتاماسىز ەتۋ جونىندەگى جوسپارلاردى جەدەلدەتىپ, ماسەلەنى 2023 جىلى تولىق شەشۋگە نيەتتىمىز. وسى جىلى ساپالى اۋىز سۋ 212 مىڭ ادامعا نەمەسە وڭىردەگى اۋىل تۇرعىندارىنىڭ 95 پايىزىنا قولجەتىمدى بولادى», دەيدى ابىلقايىر سقاقوۆ.
Business Ertis كاسىپكەرلەردى قولداۋ وڭىرلىك باعدارلاماسى اياسىندا اۋىلعا ەرەكشە كوڭىل بولىنگەن. وسى ارقىلى وبلىستىڭ ءار اۋدانىندا ءبىر اۋقىمدى جوبانى ىسكە قوسىپ, اۋىلدا شاعىن, ورتا, جاڭادان باستاعان بيزنەسكە كۇندەلىكتى كومەك كورسەتىلمەك. بۇدان بولەك, باعدارلامانىڭ تاعى بەس باعىتى بار: كاسىپكەرلەرگە اتاۋلى كومەك كورسەتۋ, ەكولوگيالىق, يننوۆاتسيالىق جانە الەۋمەتتىك باستامالاردى دامىتۋ, سونداي-اق ينۆەستيتسيالار تارتۋ. وسىنداي قولداۋدىڭ ارقاسىندا جىل باسىنان بەرى پاۆلودار وبلىسىندا شاعىن جانە ورتا بيزنەس سۋبەكتىلەرىنىڭ سانى شامامەن 350-گە ءوسىپ, ساۋدا كولەمى 30 ملرد تەڭگەدەن اسقان. مەملەكەتتىك قولداۋدىڭ ناتيجەسىندە 1,5 مىڭعا جۋىق كاسىپكەر 34 ملرد تەڭگەدەن استام كومەك الدى. جىل سوڭىنا دەيىن كەمى 700 جوباعا قولداۋ كورسەتىلمەك.
اقسۋ قالاسىندا وزەكتىلىگىن جويماي كەلە جاتقان جىلۋ پروبلەماسى شەشىمىن تاپتى دەپ مالىمدەدى ايماق باسشىسى. بيىل مۇندا جاڭا جىلىتۋ قازاندىعى ىسكە قوسىلماق. ول ورتالىقتاندىرىلعان جىلۋمەن قامتاماسىز ەتۋ قىزمەتىنىڭ ساپاسىن جاقسارتۋعا ءتيىس. بۇعان قوسا, اقسۋدا مۇز ارەناسىنىڭ قۇرىلىسى مەن «زاماناۋي مەكتەپ» ايماقتىق باعدارلاماسى بويىنشا مەكتەپتەردى جاڭارتۋ باستالدى.
جىل باسىنان 1 ماۋسىمعا دەيىن وڭىردە 11,5 مىڭنان استام جاڭا جۇمىس ورنى اشىلدى. ونىڭ جارتىسىنان استامى تۇراقتى. «ەڭبەك» باعدارلاماسى اياسىندا وبلىستىڭ 14 مىڭنان استام تۇرعىنى ەڭبەككە تارتىلىپ, جىل سوڭىنا دەيىن تاعى 14 مىڭ ادام جۇمىسپەن قامتىلماق.
بيىل 1200-دەن استام جۇمىس ورنىن اشۋعا باعىتتالعان 77 جوبا ىسكە اسىرىلماق. وبلىس اكىمى ەل پرەزيدەنتى قاسىم-جومارت توقاەۆتىڭ تاپسىرماسىمەن ازىرلەنىپ جاتقان ەكىباستۇزدى دامىتۋدىڭ كەشەندى جوسپارىنا بولەك توقتالدى.
«1,5 مىڭ شاماسىندا ۇسىنىس قابىلدانىپ, 100-دەن استام ساراپتامالىق سۇحبات وتكىزىلدى. جوسپاردىڭ نەگىزگى مىندەتتەرىنىڭ ءبىرى – كومىر ءوندىرۋدى تومەندەتۋ جانە يننوۆاتسيالىق تەحنولوگيالارعا كوشۋ ارقىلى ەكىباستۇز ەكونوميكاسىنىڭ وتىن-ەنەرگەتيكالىق كەشەنگە تاۋەلدىلىگىن ازايتۋ. ەسەسىنە, وڭدەۋ ونەركاسىبىنىڭ ۇلەسىن ارتتىرامىز. بيۋدجەتتەن بولىنگەن 1 تەڭگەگە شاققانداعى ينۆەستيتسيا كولەمى 10 تەڭگەگە جەتۋى كەرەك», دەدى ايماق باسشىسى.
پاۆلودار وبلىسىندا سوڭعى بەس اي ىشىندە ونەركاسىپ ءوندىرىسىنىڭ كولەمى 5 پايىزعا ءوسىپ, جالپى قۇنى 1 ترلن تەڭگەدەن اسقان. وڭدەۋ ونەركاسىبىندەگى ءوسىم – 6,3 پايىز. سىرتقى ساۋدا اينالىمى 20 پايىزدان اسىپ, 1,4 ملرد دوللارعا جەتكەن. الدىن الا ەسەپ بويىنشا ەكى ايدا شيكىزاتتىق ەمەس ەكسپورت قۇنى – 318,8 ملن دوللار. بۇل وتكەن جىلعى وسى كەزەڭمەن سالىستىرعاندا 1,4 ەسە ارتتى.
وبلىس ەكونوميكاسىنا قۇيىلعان قاراجاتتىڭ كولەمى ۇشتەن ءبىر ەسەگە ارتىپتى – شامامەن 134,6 ملرد تەڭگە. وڭىرگە ينۆەستيتسيا تارتۋ جۇمىستارى جاڭاشا باستاۋ العان. پروبلەمالار مەن مۇمكىندىكتەر تالدانىپ, ينۆەستيتسيالىق شتاب قۇرىلعان. بۇگىنگى تاڭدا وبلىستىڭ الداعى بەس جىلعا ارنالعان ينۆەستيتسيالىق پورتفەلى – 1,9 ترلن تەڭگە. ياعني 174 جوبا قولعا الىنباق.
