ەڭبەكشىقازاق اۋدانى راحات اۋىلىنىڭ تۇرعىنى, جاس شەبەر ابزال اكىمبەك ۇلتتىق مۋزىكالىق اسپاپتارىنىڭ 50-دەن استام ءتۇرىن دايىندايدى ەكەن. ونىڭ قولىنان شىققان دومبىرا, قوبىز اسپاپتارىنا قىزىعۋشىلار كوپ. ال ابزالدىڭ ءوزى بابالار مۇراسىن ساقتاي وتىرىپ, تابىستى دا مولايتۋعا بولادى دەگەن ويدا. ويتكەنى 23 جاستاعى جاس شەبەر كۇندەلىكتى تىنىمسىز ەڭبەك ەتىپ, شەبەرحانا جۇمىسىن جۇرگىزىپ وتىر. ءوزى ىنتالى ءىزباسارلارىن قولونەرگە باۋلىپ, ۇستازدىق قىرىنان دا تانىلىپ ۇلگەرىپتى.
– ۇلتتىق مۋزىكا اسپاپتارىنىڭ تاريحىن بىلۋگە, جاسالۋىن مەڭگەرۋگە دەگەن قىزىعۋشىلىعىم بالا كۇنىمنەن وياندى. شامامەن 7-سىنىپتا وسى قىزىعۋشىلىعىم دومبىرا جاساپ ۇيرەنۋىمە سەبەپ بولدى. مەن مەكتەپتى بىتىرگەنشە بوس ۋاقىتىمنىڭ ءبارىن شەبەرحانادا وتكىزەتىنمىن. كەيىن كوللەدجدە وقىپ, ونى بىتىرگەننەن كەيىن شەبەرحانادا ءبىر جىلداي جۇمىس ىستەپ, تاجىريبە جينادىم. مۇنان سوڭ جەكە ءىسىمدى اشۋعا بەل بۋدىم. ءبىر جىل بويى ءوز بەتىممەن جۇمىس ىستەگەننەن كەيىن جەكە بيزنەس اشىپ, دامىتۋ كەرەكتىگىن ءتۇسىندىم. ءسويتىپ مەملەكەتتىڭ قولداۋىن الۋ ءۇشىن كاسىپكەرلەر پالاتاسىنىڭ وڭىرلىك فيليالىنا كومەككە جۇگىندىم. كوپ ۇزاماي, «جاس كاسىپكەر» باعدارلاماسى بويىنشا 2,5 ملن تەڭگە سوماسىندا گرانت ۇتىپ الدىم. وعان زاماناۋي ستانوكتار, باسقا دا قاجەتتى قۇرال-جابدىق ساتىپ الدىم. بۇل مەنىڭ باستاماما ۇلكەن قولداۋ بولدى. سودان بەرى ەرىنبەي ەڭبەكتەنىپ, ۇلتتىق قولونەردى جالعاستىرۋ ءۇشىن جاس بالالاردى اسپاپتار جاساۋعا ۇيرەتىپ كەلەمىن. الداعى ۋاقىتتا وتاندىق جانە حالىقارالىق كورمەلەرگە قاتىسۋدى ويلاپ ءجۇرمىن, – دەيدى قولونەر شەبەرى ابزال اكىمبەك.
ال قاپشاعاي قالاسىندا تۇراتىن كوپبالالى انا جانات مەدەتقىزى بولسا ۇلتتىق سيپاتتاعى قۇراق كورپەلەر تىگۋدىڭ كونە تەحنولوگياسىن قايتا جاڭعىرتىپ وتىر. بۇل ىستە 15 جىلدىق تاجىريبەسى بار شەبەر قاپشاعايلىق جاس قىز-كەلىنشەكتەردى وسى ونەرگە باۋلىپ جاتىر. ال ورىندالعان تاپسىرىستار قازاقستاننىڭ تۇكپىر-تۇكپىرىنە جونەلتىلەدى.
– ءبىزدىڭ بۇيىمدارىمىزدى
قاپشاعايلىقتار عانا ەمەس, اتىراۋ, اقتاۋ, ۋفا قالالارىنىڭ تۇرعىندارى دا ساتىپ الادى, ءتىپتى تۇركيا, جاقىندا چەحيا ەلدەرىنە دە جىبەرىلدى. ءبىز ءۇشىن ساپا – ءبىرىنشى ورىنداعى ماڭىزدى ماسەلە. حالقىمىزدىڭ داستۇرلەرىن ساقتاۋعا ءوز ۇلەسىمىزدى قوسىپ, باي مادەني مۇرامىزدى الەمگە تانىتقىمىز كەلەدى. بۇل ءىستى جالعىز تىگىن ماشيناسىمەن توسەك جابدىقتارىن تىگۋدەن باستاعان ەدىم. قازىر ىرگەسى كەڭەيىپ, بيزنەستىڭ اۋقىمى ۇلكەيىپ كەلەدى. مۇنداعى ماقساتىم – ءوزىم سەكىلدى كوپبالالى انالارعا كومەك كورسەتۋ. ءبىزدىڭ كىشكەنتاي تسەحىمىز بىرتە-بىرتە اياعىنان تۇردى. العاشىندا 50 ادام جۇمىس ىستەگەن, بارلىق قاجەتتى تەحنيكانى ساتىپ العاننان كەيىن 20 ادام جۇمىسقا ورنالاستى. قازىر تسەحتى كەڭەيتىپ جاتىرمىز. توقىمادان كيىمدەر تىكسەك دەيمىز. 100 ادامعا دەيىن جۇمىسقا تارتساق دەگەن جوسپارىمىز بار, – دەيدى تسەح يەسى جانات مەدەتقىزى.
شاعىن تسەحتاعى شەبەرلەر كۇنىنە 40-50 قالىڭدىقتىڭ جاساۋىن تىگە الادى ەكەن. ولاردىڭ قولىنان شىققان جاستىقتار, كورپەلەر, جاپقىشتار ءوزىنىڭ ءتۇرلى ويۋ-ورنەكتەرىمەن كوز تارتادى. جالپى, قۇراق قۇراۋ – كوركەمدىك تالعامدى تالاپ ەتەتىن شىعارماشىلىق جۇمىس. قۇراق تۇستەرىن تاڭداۋ, فورمالارىن تابۋ, ولاردى ءبىر-بىرىمەن ۇيلەستىرۋ – وڭاي ءىس ەمەس. دەگەنمەن تسەح شەبەرلەرى جۇمىستىڭ كۇردەلىلىگىنە قاراماستان تسەحتا جالپى جيىرمادان استام بۇيىم ءتۇرىن دايىندايدى.
ايتپاقشى, كوپبالالى انا ىندەت ۋشىعىپ تۇرعان كەزدە دە كومەك بەرۋدەن تىس قالعان جوق. ونىڭ تسەحىندا 13 مىڭ دانادان استام مەديتسينالىق قورعانىس بەتپەردەسى تىگىلىپ, تۇرعىندارعا تەگىن تاراتىلعان-دى.
