باعدارلامالار • 18 ماۋسىم، 2021

«مەرەيلى وتباسى» اتانعىسى كەلەتىندەر كوپ

21 رەت كورسەتىلدى

ەلىمىزدىڭ وڭىرلەرىندە «مەرەيلى وتباسى» ۇلتتىق بايقاۋىنا قاتىسۋ ءۇشىن وتىنىمدەردى قابىلداۋ اياقتالدى. بەرىلگەن وتىنىمدەر سانى وتباسىلىق قۇندىلىقتاردى ناسيحاتتاۋ قازاقستاندىقتار اراسىندا وتە تانىمال جانە سۇرانىسقا يە ەكەنىن كورسەتتى.

بيىل جاڭا ەرەجەلەر اياسىندا «مەرەيلى وتباسى» بايقاۋىنا قاتىسۋ ءۇشىن وتىنىمدەردى تەك وتباسىلاردىڭ وزدەرى عانا ەمەس، ءبىلىم بەرۋ، دەنساۋلىق ساقتاۋ، مادەنيەت ۇيىمدارى، ەڭبەك ۇجىمدارى، ونەركاسىپتىك كاسىپورىندار، ۇەۇ جانە باسقا دا زاڭدى تۇلعالار بەرگەنىن اتاپ ءوتۋ كەرەك.
ەنگىزىلگەن وزگەرىستەردىڭ ارقاسىندا وڭىرلىك كوميسسيالارعا بارلىعى 2768 ءوتىنىم كەلىپ ءتۇستى. سونىڭ ىشىندە وتباسىلارعا – 1692، زاڭدى تۇلعالارعا 1076 ءوتىنىم تيەسىلى. وتىنىمدەردىڭ ەڭ كوپ سانى الماتى (454)، شىعىس قازاقستان (232) جانە قاراعاندى (223) وبلىستارىندا.
«مەرەيلى وتباسى» ۇلتتىق بايقاۋىنىڭ لاۋرەاتى اتاعى قىركۇيەك ايىندا وتباسى كۇنى قارساڭىندا قازاقستاننىڭ بارلىق وڭىرىنەن كەلگەن 17 ۇزدىك وتباسىنا بەرىلەتىن بولادى. ال بۇرىن رەسپۋبليكالىق دەڭگەيدە ءبىر عانا وتباسى جەڭىمپاز اتانىپ كەلگەن. بيىلعى جىلدان باستاپ وڭىرلىك دەڭگەيدە جەڭىمپاز اتانعان بارلىق 17 وتباسىنا كونكۋرس لاۋرەاتى اتاعى بەرىلىپ، تەڭ ماراپاتتار تاپسىرىلاتىن بولادى.
بۇدان باسقا، بيىلدان باستاپ كونكۋرسقا قاتىسۋعا ءوتىنىم بەرۋ، كونكۋرس ناتيجەلەرى بو­يىنشا ماراپاتتاۋ، كونكۋرس قورىتىندىلارىن انىقتاۋ جونىندەگى كوميسسيا قۇرامىنا ازاماتتىق قوعام وكىلدەرى عانا ەمەس، سونداي-اق بايقاۋدىڭ بۇرىنعى جەڭىمپازدارى دا كىردى جانە جەڭىمپازداردى انىقتاۋ مەن باعالاۋدىڭ جاڭا بالدىق جۇيەسى بويىنشا شارتتىق وزگەرىستەر ەنگىزىلدى.
ەستەرىڭىزگە سالا كەتەيىك، ۇلتتىق بايقاۋ وتكىزۋدى ەلباسى نۇرسۇلتان نازارباەۆ 2013 جىلدىڭ جەلتوقسانىندا بەكىتكەن بولاتىن. سودان بەرى «مەرەيلى وتباسى» كونكۋرسىنا 15 مىڭنان استام وتباسى قاتىستى.

سوڭعى جاڭالىقتار

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

ۇقساس جاڭالىقتار