مەديتسينا • 18 ماۋسىم، 2021

العىس ارقالاعان جاناشىر جاندار

19 رەت كورسەتىلدى

ەلىمىزدە ماۋسىمنىڭ ءۇشىنشى جەك­سەنبىسى – مەديتسينا قىزمەتكەرلەرىنىڭ كۇنى.

الەمدى ابىگەرگە سالعان ىندەت اقحالاتتى ابزال جانداردىڭ قادىرى قانشالىقتى بيىك ەكەنىن تاعى ءبىر دالەلدەي ءتۇستى. اۋا جەتپەي، اۋىر حالدە ەمحانا ەسىگىنەن ەنگەن ناۋقاستاردىڭ اياعىنان قايتا تۇرۋىنا ايانباي ەڭبەك ەتكەن ماڭىزدى ماماندىق يەلەرىنىڭ الار ورنى ايرىقشا.

مەملەكەت باسشىسى قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» قازاقستان حالقىنا جولداۋىندا مەديتسينا سالاسىنا مەيلىنشە كوڭىل بولىنەتىنىن اتاپ وتكەن ەدى. «پاندەميا تۋىنداتقان داعدارىس ءبىزدى كوپ نارسەگە ۇي­رەتتى. ماسەلەن، دارىگەردىڭ ەڭبەگىن باعا­لاي بىلەتىن بولدىق. ءبىر كەزدە مەديتسينا قىز­مەتكەرلەرىنىڭ مەملەكەت نازارىنان تىس قالعانى راس ەدى. دارىگەر ماماندىعىن ماتەريالدىق تۇرعىدان دا نىعايتا ءتۇسۋ ماڭىزدى بولىپ وتىر. بيۋدجەتتى تاياۋداعى ناقتىلاۋ كەزىندە ەكىنشى جارتىجىلدىقتا مەديتسينا قىزمەتكەرلەرىن ىنتالاندىراتىن قوسىمشا تولەم ءۇشىن 150 ملرد تەڭگە ءبولۋدى تاپسىرامىن. مۇنى ءبىز قازىرگى داعدارىس كەزىندە قولعا الىپ جاتىرمىز، ەندى ونى جۇيەلى تۇردە جۇزەگە اسىرۋىمىز كەرەك. 2023 جىلعا قاراي دارىگەرلەردىڭ جالاقىسى ەكونوميكاداعى ورتاشا جالاقىدان ەكى ەسە ارتىق بولادى»، دەدى پرەزيدەنت.

وتكەن جىلى جالپى مەديتسينا مامان­دارىنىڭ جالاقىسى 20-30 پايىزعا كوتەرىلدى. ال بيىل دارىگەرلەردىڭ ورتاشا جالاقىسى شامامەن 320 مىڭ تەڭگەگە دەيىن كوتەرىلەدى. بۇل يگىلىك ودان سايىن ارتىپ، ەڭبەكاقى 2023 جىلى 561 مىڭ تەڭگە بولماق. سونداي-اق ورتا مەديتسينا قىزمەتكەرلەرىنىڭ ورتاشا جالاقىسى 2021 جىلى 173 مىڭ تەڭگە بولسا، 2023 جىلى 210 مىڭ تەڭگەگە دەيىن جەتەدى.

باسى اۋىرىپ، بالتىرى سىزداعان دار­مەن­سىز ادام دارىگەرلەردىڭ دارگەيىنە جۇگىنەتىنى انىق. سۇرىنگەنگە سۇيەنىش، قۇلاعانعا تايانىش بولىپ جۇرەتىن مەيىرىمدى مەديتسينا قىزمەتكەرلەرىنىڭ مەرەيلى مەرەكەسى ۇلت ءۇشىن دە، ۇرپاق ءۇشىن دە اسا ماڭىزدى. ىزگىلىكتى ىستە ىركىلمەيتىن جاناشىر جانداردىڭ ەڭبەگى ەرەن. مەملەكەتتىڭ مەرەيى تاسىپ، مادەني مارتەبەمىز ءھام ەكونوميكالىق ەڭسەمىزدىڭ بيىك بولۋىنا بىردەن-ءبىر اسەر ەتەتىن مەديتسينا ەكەنى ايدان انىق. سالماقتى سالانىڭ تىزگىنىن ۇستاپ، تىرشىلىككە ءنار بەرىپ تۇراتىن اياۋلى دا ايبىندى دارىگەرلەردىڭ دارەجەسى قاشاندا بيىك بولۋعا ءتيىس.

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار