ايماقتار • 17 ماۋسىم، 2021

اتىراۋ اۋەجايى ساتىلاتىن بولدى

33 رەت كورسەتىلدى

اتىراۋ وبلىسىندا الداعى جىلدارى باسەكەلەس ورتاعا بەرۋ ءۇشىن جەكەشەلەندىرۋگە جاتاتىن ۇيىمدار بەلگىلەندى. قازىرگى كۇنى ولاردىڭ ساۋدا-ساتتىققا تۇسەتىن جىلى دا ناقتىلانىپ وتىر، دەپ حابارلايدى Egemen.kz.

قر ۇكىمەتىنىڭ 2020 جىلعى 29 جەلتوقسانداعى №908 «2021-2025 جىلدارعا ارنالعان جەكەشەلەندىرۋدىڭ كەيبىر ماسەلەلەرى جونىندەگى» قاۋلىسىنا سايكەس، وسى جىلدارعا ارنالعان «جەكەشەلەندىرۋدىڭ كەشەندى جوسپارى» ماقۇلدانعان. جەكەشەلەندىرۋ نىساندارى ەكى مەكەمە ارقىلى جۇرگىزىلەدى. ونىڭ ىشىندە، اتىراۋ وبلىسى اكىمدىگىنىڭ 2021 جىلعى 11 اقپانداعى №32 «كوممۋنالدىق مەنشىكتىڭ كەيبىر ماسەلەلەرى تۋرالى» قاۋلىسىمەن جەكەشەلەندىرۋگە جاتاتىن كوممۋنالدىق مەنشىكتەگى 10 ۇيىمنىڭ ساتۋ كەستەسى بەلگىلەنگەن.

ولار: «اتامەكەن-اتىراۋ» ميكروقارجى ۇيىمى، وبلىستىق ءبىلىم بەرۋ باسقارماسىنا قارايتىن «قازاقستان گەولوگى» ەمدەۋ پانسيوناتى، وبلىستىق دەنە شىنىقتىرۋ جانە سپورت باسقارماسىنا قارايتىن بوكس بويىنشا مامانداندىرىلعان سپورت كلۋبى، «اتىراۋ سۋ ارناسى»، «اتىراۋ وبلىسى سۋ ارناسى»، «اتىراۋ-جاس وتاۋ» جشس-لارى مەن حيۋاز دوسپانوۆا اتىنداعى اتىراۋ حالىقارالىق اۋەجايى. تاعى ءۇش مەكەمە قالالىق جانە اۋداندىق كوممۋنالدىق مەنشىكتەگى ۇيىم سانالادى، ولار: «سارايشىق-اتىراۋ» جشس، «يندەر سۋ» شجق، «جىلىويسۋ» كمك. بۇلاردىڭ ىشىندە، اتىراۋ قالاسىنىڭ كوممۋنالدىق مەنشىگىندەگى «سارايشىق-اتىراۋ» جشس بيىل 6 ءساۋىر كۇنى 695 ملن تەڭگەگە كەيىننەن ساتىپ الۋ قۇقىعىمەن 5 جىل مەرزىمگە سەنىمگەرلىكپەن باسقارۋعا بەرىلگەن. 

بۇدان بولەك، «اتىراۋ» الەۋمەتتىك-كاسىپكەرلىك كورپوراتسياسىنىڭ دا تاۋەلسىز ۇيىمداردىڭ جارعىلىق كاپيتالىندا قاتىسۋ ۇلەسى بار. ۇكىمەت قاۋلىسىنا سايكەس، قوعامنىڭ (اكك) ديرەكتورلار كەڭەسى بۇل ۇيىمدارداعى قاتىسۋ ۇلەسىن باسەكەلەس ورتاعا بەرۋ جونىندە شەشىم قابىلدانعان. وعان سايكەس، بيىل 6 نىسان: «العا»، «العا» مال ءوسىرۋ كەشەنى»، «LUMPAN CASPIAN PHARMACEUTICALS LLP»، «ميالى» سەرۆيستىك دايىنداۋ ورتالىعى، «دوسجان ي كومپانيا»، «يندەرتەمىرجولى» جانە «العا» مال ءوسىرۋ كەشەنى» جشس-لارى; 2022 جىلى 4 نىسان: «Atyrau-Avtopark»، «AkzhayikAvtopark»، «بايتەرەك-2013»  جانە «نۇرلى-تال» جشس-لارى; 2023 جىلى ءبىر نىسان: «اتما - اتىراۋ اۋەجايى جانە تاسىمالدار» اق اۋكتسيونعا شىعارىلماق. ايتا كەتەيىك، اتىراۋ اۋەجايى دا 2023 جىلى ساۋداعا شىعارىلادى. 

«اتىراۋ» اكك 2014 جىلدان بەرى جەكەشەلەندىرۋدىڭ ەكىنشى تولقىنىنا قاتىسىپ كەلەدى. وسىلايشا، 2014-2015 جىلدارى 4 تاۋەلدى كومپانياداعى 3 252،7 مىڭ تەڭگەگە باعالانعان قوعام ۇلەسى 6 124،0 مىڭ تەڭگەگە ساتىلدى. 2015 جىلى 2016-2020 جىلدارعا ارنالعان جەكەشەلەندىرۋدىڭ كەشەندى جوسپارى قابىلداندى. ءسويتىپ، 2016-2017 جىلدارى  سەگىز، ونىڭ ىشىندە، ءبىر ەنشىلەس جانە جەتى تاۋەلدى كومپانياداعى قاتىسۋ ۇلەسى جەكەشەلەندى. ولار 79 188،9 تەڭگەگە باعالانىپ، 98 318،6 مىڭ تەڭگەگە ساتىلدى»،  دەيدى مەكەمەنىڭ اكتيۆتەردى باسقارۋ جانە ەنشىلەس-تاۋەلدى ۇيىمداردى باسقارۋ دەپارتامەنتىنىڭ ديرەكتورى نۇرلان قاپپازوۆ.

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار