بانك قىزمەتكەرى نەسيە راسىمدەۋ كەزىندەگى كۇدىكتى ارەكەتتەردى بايقاپ تۇركىستان وبلىسى پوليتسيا دەپارتامەنتىنە جۇگىنگەن. تەكسەرۋ كەزىندە جەدەل ۋاكىلدەر الاياقتىقتى انىقتاعان.
جەدەل-ىزدەستىرۋ شارالارى بارىسىندا كريمينالدىق پوليتسيا قىزمەتكەرلەرى الاياقتىق جاسادى دەگەن كۇدىكتىنى ۇستادى. ول ەت ونىمدەرىن ساتۋمەن اينالىساتىن سايرام اۋدانىنا قاراستى اۋىلداردىڭ ءبىرىنىڭ تۇرعىنى بولىپ شىقتى. بۇگىندە سوت ونى ەكى ايعا قاماۋعا الۋعا سانكتسيا بەرگەن.
كۇدىكتى سوڭعى ءۇش ايدا ءار بالاعا 50 مىڭ تەڭگە الەۋمەتتىك كومەك الىپ بەرۋگە ۋادە بەرىپ, جابىرلەنۋشىلەردىڭ جەكە دەرەكتەرىن العان. كەيىن ول قۇجاتتاردى پايدالانىپ ونلاين-نەسيە راسىمدەگەن. وسىلايشا, پوليتسياعا جۇگىنگەن جابىرلەنۋشىلەر سانى 147 ادام بولعان. ولاردىڭ بارلىعى جەرگىلىكتى تۇرعىندار.
«قازىر تەرگەۋشىلەر سوتالدى تەرگەۋ جۇرگىزىپ جاتىر. الاياقتىق قۇرباندارىنىڭ سانى ارتۋى مۇمكىن. ءبىز وقيعانىڭ بارلىق ءمان-جايىن انىقتاپ, كەلتىرىلگەن زالالدى ەسەپتەپ جاتىرمىز», دەدى تۇركىستان وبلىسى پد باستىعىنىڭ ورىنباسارى قۇرمانبەك ساحوۆ.
دەرەك قر قك-ءنىڭ 190-بابى «اسا ءىرى مولشەردەگى الاياقتىق» بويىنشا تىركەلگەن. تەرگەۋ امالدارى جۇرگىزىلىپ جاتىر.
