«نەمولچي.kz» قورىنىڭ مالىمەتىنشە, 12 جاسار اقمولا وبلىسىنىڭ تۇرعىنى 2019 جىلدىڭ جەلتوقسانىنان 2020 جىلدىڭ ماۋسىمىنا دەيىن جىنىستىق زورلىق-زومبىلىققا ۇشىراعان. توپتاسقان قىلمىستى 25-26 جاس ارالىعىنداعى جەرگىلىكتى ءۇش ەر ادام جاساعان.
«كامەلەت جاسىنا تولماعان قىزىن ەرەسەك ەر ادامدار زورلاعانى تۋرالى انام كەزدەيسوق ءبىلىپ قالعان. ايەل بالانىڭ دەنەسىندە كوگەرگەن جەرلەردى بايقاعانىمەن, ءجاسوسپىرىمدى سويلەتە الماعان. انانىڭ كۇدىگى مەديتسينالىق تەكسەرىستەن كەيىن راستالدى», دەلىنگەن «نەمولچي.kz» قورىنىڭ حابارلاماسىندا.
قىز قورىققانىنا ەشتەڭە ايتقىسى كەلمەگەن. بىراق بارلىق جاعداي پسيحولوگتىڭ كومەگىمەن انىقتالدى.
قىزدىڭ ايتۋىنشا, اعاسىنىڭ ءۇش دوسى ونى جىنىستىق قاتىناسقا ماجبۇرلەگەن. قىلمىسكەرلەردىڭ باتىل بولعانى سونشالىق, قىزدىڭ ۇيىنە كەلىپ جۇرگەن. قىزدى «سىنىپتاستارىڭا ءبارىن ايتىپ بەرەمىن» دەپ قورقىتىپ كەلگەن.
قىزدىڭ تۋىستارى بار جاعدايدان حاباردار بولا سالىسىمەن, ءجاسوسپىرىمنىڭ ءسوزىن راستاعان كۇدىكتىلەردىڭ ءبىرىن ۇستادى.
«مەن ماس ەدىم. ءيا, مەن ونى زورلادىم», دەپ جاۋاپ بەرگەن كۇدىكتى جىگىت. كەيىن قالعاندارى دا ۇستالعان.
25 مامىردا كوكشەتاۋدا ءۇش كۇدىكتىنىڭ ەكەۋىنە ۇكىم شىعارىلدى. ولار 120-باپتىڭ 4-بولىگى (زورلاۋ) بويىنشا كىنالى دەپ تانىلدى. ءبىر سوتتالۋشى 20 جىلعا, ەكىنشىسى 21 جىلعا قاماۋعا الىندى. سونىمەن قاتار ءار ادام ەكى ميلليون تەڭگە مورالدىق زيان تولەۋى كەرەك.
ال ءۇشىنشى كۇدىكتى القابيلەردىڭ سوتىن قاراۋدى تالاپ ەتتى جانە 8 ماۋسىمدا ولار ءوز ۇكىمدەرىن شىعاردى.
«القابيلەر ءۇشىنشى سوتتالۋشىنى تولىقتاي اقتاپ, ول سوت زالىنان شىعىپ كەتتى. قىزدىڭ اناسى جىلاعان كۇيى, بىزگە بارلىق قازىلار القاسى ۇياتتان باستارىن سالبىراتىپ وتىرعانىن حابارلادى», دەلىنگەن قور وكىلدەرى تاراتقان جازبادا.
ونىڭ قىلمىسقا قاتىسى بارىن دالەلدەۋ ءۇشىن اتا-انالار مەن قۇقىق قورعاۋشىلار شىعىنعا باتىپ وتىر. بۇعان دەيىن ساراپتاما سوتتالۋشىنىڭ دنق-سىن راستاعان, ءتىپتى تەرگەۋدىڭ باسىندا ونىڭ كىناسىن مويىنداعان ايعاقتارى دا بار.
وسىنىڭ الدىندا عانا الەۋمەتتىك جەلىلەردە قاراوتكەل اۋىلىنىڭ تۇرعىنى زارينا كەمەلوۆا 12 جاسار قىزدى توپتىق زورلاۋ ءىسى ادىلەتسىز جۇرگىزىلىپ جاتىر دەپ شاعىمدانعان.
