24 جاستاعى جاس تالانت انەيليا قاراعاندىنىڭ تۋماسى, سوڭعى ون جىلدان بەرى لوندوندا تۇرادى. سۋرەت ونەرىن وسى جاقتا مەڭگەرگەن. ەكى جىل بۇرىن ايگىلى Louis Vuitton ءسان ۇيىنە قاراپايىم ساتۋشى بولىپ جۇمىسقا تۇرعان ول, كەيىن ديزاينەر رەتىندە بايقاۋدا باق سىناپ كورەدى.
«ەكى ايعا سوزىلعان قاتال ىرىكتەۋدەن ءوتتىم. ۇلىبريتانيا جانە ەۋروپا ەلدەرىنىڭ سۋرەتشىلەرى اراسىنان تاڭداپ الىنعان 17 ديزاينەردىڭ ءبىرى بولعانىما شەكسىز ريزامىن. ءارتۇرلى يدەيالاردى دۇنيەگە اكەلەمىز. كليەنتتەردىڭ نازارىن اۋدارۋ ءۇشىن جانە Louis Vuitton ساۋداسىن جۇرگىزۋ ءۇشىن كرەاتيۆتى ۇسىنىستار دايىندايمىز», دەيدى جاس سۋرەتشى.
قىلقالامنىڭ حاس شەبەرى قازىر Louis Vuitton-نىڭ ايگىلى قولساندىقتارىن بەزەندىرەدى.
انەيليا جەكە شىعارماشىلىعىن دا دامىتىپ كەلەدى. ول كۇزگە قاراي لوندوندا ءوز كورمەسىن اشۋدى جوسپارلاپ وتىر. جەكە تۋىندىلارىن قايىرىمدىلىق اۋكتسيونىنا شىعارىپ, ودان تۇسكەن قاراجاتتى جەرگىلىكتى عيباداتحانانى جوندەۋ جۇمىستارىنا جۇمساماق.
سۋرەتشى تۋعان جەرىمەن دە بايلانىسىن ۇزبەۋگە تىرىسادى. بولاشاقتا قازاقستاندا جەكە كورمەسىن اشقىسى بار.
«مەن ءاردايىم قازاقستانمەن بايلانىستا بولعىم كەلەدى. ويتكەنى وتانىم مەنى قاناتتاندىرادى جانە پاتريوتتىق سەزىمىم ەشقايدا كەتپەك ەمەس», دەيدى انەيليا.
