ولاردىڭ اراسىندا اۋدانداردا تۇراتىنداردىڭ ۇلەسى باسىم بولىپ تۇر. وبلىستا ۆاكتسيناتسيالاۋ بويىنشا 106 ەگۋ پۋنكتى, 39 جىلجىمالى ەگۋ بريگاداسى بار. وسىنداي بريگادالار قوسىمشا وبلىس ورتالىعىنداعى «قورقىت اتا», «Aray City MALL» جانە «جىبەك جولى» ساۋدا ورتالىقتارىندا اشىلعان. ماماندار ەسەبىنشە كارانتين تالاپتارى جەڭىلدەۋى ءۇشىن وبلىستاعى سەگىز ءجۇز مىڭنان استام تۇرعىننىڭ 371 مىڭى ەكپە الۋى كەرەك.
8 ماۋسىمنىڭ وزىندە وبلىس اۋماعىندا 2641 ادام ەكپە سالدىرعان. بۇرىندارى مەملەكەتتىك قىزمەتكەرلەر مەن بيۋدجەتتىك سالا وكىلدەرى كوپتەۋ بولسا ەندى قاراپايىم تۇرعىندار دا قاۋىپتىڭ الدىن الۋدىڭ قامىن جاساي باستاعانى اڭعارىلادى.
كۇنى كەشە وبلىس ورتالىعىنداعى «سەنىم» جشس ەمحاناسىنا باردىق. ەمحانا ەسەبىندە 23 204 قالا تۇرعىنى بار ەكەن. ونىڭ 15 229-ى ەرەسەكتەر بولسا, ديسپانسەرلىك ەسەپتە تۇراتىندارى 2 851. ون سەگىز جاسقا دەيىنگىلەر سانى 7 759 بولىپ تۇر.
ۆاكتسيناتسيا باستالعالى بەرى ەمحاناعا قاراستى حالىقتىڭ 2049-ى ءبىرىنشى كومپونەنتىن الىپتى. ەكىنشى بولىگىن 796 ادام سالدىرعان. مۇندا كەلگەن ادامدى اۋەلى دارىگەر قاراپ, وپەراتور ونىڭ دەرەكتەرىن مودۋلدىك بازاعا ەنگىزەدى. دارىگەر رۇقساتىنان كەيىن ۆاكتسيناتورلار ەكپە سالادى. باستاپقىدا كۇنىنە 200 ادامعا دەيىن كەلگەن كۇندەرى بولىپتى. قازىر ءسال سايابىرسىعان.
– وسى كۇنى 60-70 ادام ەكپە سالدىرۋعا كەلەدى. بۇرىندارى ۆاكتسينا تاڭعى ساعات سەگىزدەن كەشكى التىعا دەيىن سالىناتىن, قازىر ونىڭ ۋاقىتىن ۇزارتتىق. كۇنى بۇگىنگە دەيىن ەمحانادان قىزمەت الاتىنداردىڭ باسىم بولىگى ەكپە سالدىردى. جىل اياعىنا دەيىن ولاردىڭ قاتارى 80 پايىزعا جەتەدى دەگەن ويدامىز, – دەيدى «سەنىم» جشس ەمحاناسى باس دارىگەرىنىڭ ورىنباسارى شولپان ارعىنباەۆا.
ەمحاناعا ەكپە سالدىرۋعا كەلگەن تۇرعىننىڭ ءبىرى اقىل شەگەباەۆ «سپۋتنيك V» ۆاكتسينانىڭ ءبىرىنشى كومپونەنتىن 18 مامىردا الىپتى. جەر جۇزىندەگى جاڭالىقتى قالت جىبەرمەي قاداعالاپ وتىراتىن ول ۆاكتسينا العان تۇرعىندارى كوبەيگەن ەلدەردە دەرتتىڭ تومەندەي باستاعانىن اڭعارىپتى. وسىدان كەيىن ءوزى دە ەكپە الۋعا بەل بايلاعان.
ماماندار «Ashyq» قوسىمشاسى ىسكە قوسىلعالى بەرى ەكپەنىڭ كەرەكتىگىن تۇسىنگەندەر قاتارى كوبەيگەنىن ايتىپ وتىر. جالپى ۆاكتسينا سالدىرعاندار قاتارى 70-80 پايىزدان اسقاندا دەرتتىڭ دەمى قايتادى.
