ايماقتار • 07 ماۋسىم، 2021

اداسقان بالىقشى امان تابىلدى

36 رەت كورسەتىلدى

سولتۇستىك قازاقستان وبلىسىنىڭ ورتالىعىنا جاقىن ورنالاسقان بەسكول اۋىلىنىڭ 70 جاسار تۇرعىنى سەرگەي كوسەنكو تۋىستارىنا قايدا باراتىنىن ەسكەرتپەي، كۇن قۇلان يەكتەنە باستاعاندا بالىق اۋلاۋ ءۇشىن كولىگىمەن كولگە كەتىپ قالعان، دەپ حابارلايدى Egemen.kz.

ونىڭ قاي كولگە كەتكەنىن ەشكىم بىلمەي قالعان. تەك كەشكە جاقىن زەينەتكەر تۋىستارىنا تەلەفون ارقىلى حابارلاسىپ، قايىقپەن كولدىڭ ورتاسىنا كەتىپ قالىپ، باعىتىنان اداسىپ كەتكەنىن ايتقان. ول نەمەرەسىنە تەك سۋ قويماسىنىڭ اققايىڭ اۋدانى دايىندىق اۋىلىنا جاقىن ەكەنىن ايتىپ ۇلگەرگەن، وسىدان كەيىن تەلەفونىنىڭ قۋاتى تاۋسىلىپ، بايلانىس ءۇزىلىپ قالعان. ونىڭ ۇستىنە باستالعان جاڭبىر مەن قاتتى جەل تۋىستارىن قاتتى ابىگەرگە سالعان. ىزدەۋگە شىققان بالىقشىنىڭ نەمەرەلەرى 112 ارناسىنا حابارلاسىپ، كومەك سۇرايدى.

كومەككە اققايىڭ اۋدانىنىڭ ۋچاسكەلىك پوليتسيا ينسپەكتورى مەن تجد قىزمەتكەرلەرى جەتىپ، اداسىپ كەتكەن بالىقشىنى ىزدەۋگە كىرىسەدى.

«قاس قارايىپ، جاڭبىر جاۋىپ تۇرسا دا، ەشكىمدە دە ىزدەۋدى توقتاتۋ تۋرالى وي بولمادى. ارناۋلى قىزمەت وكىلدەرى ءبىزدى قولداپ، سەنىمدىلىك ۇيالاتىپ، سابىرعا شاقىردى»، دەيدى قارتتىڭ جاقىنى، بەسكول كەنتىنىڭ تۇرعىنى ناتاليا سالمينا.

ۋچاسكەلىك پوليتسيا ينسپەكتورى ءادي مۇعجانوۆ پەن ىزدەۋگە قاتىسقان وزگە ادامدار «نيۆا» اۆتوكولىگىمەن كول جاعاسىن ءسۇزىپ ءجۇرىپ، بالىقشىنىڭ كولىگىن تاباپقان. ىزدەۋشىلەر وسى جەردەن جارىقتارىن جاعىپ، بەلگى بەرەدى. 5 ساعات بويى جاعاعا شىعا الماي اداسقان زەينەتكەر قامىس اراسىنان كورىنگەن فاردىڭ جارىعىن بايقاپ، جاعالاۋعا قاراي بەت الادى. قاتتى جەل قايىقتى العان باعىتىنان اۋىتقىتا بەرسە دە ەسكەكتى قالاي ەسۋدى جاقسى مەڭگەرگەن قارت جولىنان تايماي، جارىقتىڭ تۇسىنا امان جەتەدى. بۇل جەردە ونى جاقىن ادامدارى قارسى الادى. ءسويتىپ اقساقال قاتتى توڭىپ، ابدەن اشىقسا دا ءبىر اجالدان قالىپ، ءوزىنىڭ تۋىستارىنا امان قوسىلدى. قارتتىڭ بارلىق تۋىستارى وزدەرىنە قول ۇشىن بەرىپ، جاقىن جاندارىن اجالدان الىپ قالۋعا كومەكتەسكەن پوليتسيا مەن تجد قىزمەتكەرلەرىنە العىستارىن جاۋدىردى.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار