التىنشى ماۋسىم كۇنى ساعات 21.00 شاماسىندا تۇركىستان وبلىسى تولەبي اۋدانىندا ورنالاسقان بىركولىك شاتقالىنداعى سارقىراماعا بەت العان ءۇش جىگىت اداسىپ كەتكەن. جىگىتتەردىڭ اداسىپ كەتكەنى تۋرالى حابارلاما 6 ماۋسىم كۇنى ساعات 15.40-تا تۇركىستان وبلىسى تولەبي اۋدانىنىڭ ءورت ءسوندىرۋ قىزمەتىنە كەلىپ تۇسكەن.
ۇشەۋى دە بىرگە دەمالۋعا كەلگەن سارىاعاش اۋدانىنىڭ تۇرعىندارى ەكەنى انىقتالىپ وتىر. ودان بولەك, تاۋ شاتقالىندا اداسىپ كەتكەندەردىڭ 1994 جىلى تۋعان, 1993 جىلى تۋعان جانە 1994 جىلى تۋعان جىگىتتەر ەكەنى بەلگىلى بولعان.
قۇتقارۋشىلار تىكۇشاقپەن ىزدەۋ جۇمىستارىن جۇرگىزدى. ناتيجەسىندە ساعات 17.25-تە اداسىپ كەتكەن جىگىتتەر تابىلىپ, قۇتقارىلعان. جارتى ساعاتتان سوڭ ولار شىمكەنت قالاسىنداعى اۋەجايعا جەتكىزىلگەن.
تاۋ شاتقالىنا دەمالىسقا بارىپ اداسىپ كەتكەندەردىڭ ايتۋىنشا, دەمالۋشىلار بىركولىك شاتقالى باعىتىنداعى تاۋلارعا سارقىراماعا دەيىن بارىپ, اداسىپ كەتكەن. قايتىپ كەلە جاتقاندا ولاردىڭ بىرەۋى اۋىرىپ قالىپ جانە ولار وزدىگىنەن تاۋدان تۇسە المايتىنىن تۇسىنگەن.
«ساعات 16:33-تە زارداپ شەككەندەردى قۇتقارۋ ءۇشىن جەدەل شتابتان توتەنشە جاعدايلار مينيسترلىگىنىڭ «قازاۆياسپاس» اق Mi-8AMT UP-MI871 ۇشاعى جانە تۇركىستان وبىلىسى توتەنشە جاعدايلار دەپارتامەنتى باسشىسىنىڭ ورىنباسارى, پودپولكوۆنيك ە. سارىباەۆ, جەدەل قۇتقارۋ جاساعىنان 6 قۇتقارۋشى جىبەرىلگەن. 17:25-تە تىكۇشاقپەن ىزدەۋ جۇمىستارى كەزىندە ءۇش ادام تابىلىپ, قۇتقارىلدى. كەشكى ساعات 17:55-تە قۇتقارىلعان ادامدار شىمكەنت قالاسىنىڭ اۋەجايىنا جەتكىزىلدى», دەلىنگەن حابارلامادا.
