قازاقستاننىڭ بەينەلەۋ ونەرىن الەمگە ناسيحاتتاپ جۇرگەن ەلىمىزدىڭ ءار ايماعىنداعى تانىمال سۋرەتشىلەردىڭ شىعارماشىلىعىن دارىپتەۋدى كوزدەگەن تاعىلىمدى شارا ونلاين جانە وفلاين فورماتتا ءوتتى. حالىقارالىق كورمەلەر مەن سيمپوزيۋمداردا ەلىمىزدىڭ اتىن اسقاقتاتىپ, بەينەلەر ونەرى سالاسىندا بيىكتەردى باعىندىرىپ جۇرگەن 30 قىلقالام شەبەرىنىڭ ەڭبەگى وقىرماندى ەلەڭ ەتكىزدى. سالتاناتتى شارانىڭ ءبىز دە كۋاسى بولدىق.
نۇر-سۇلتان قالاسى سۋرەتشىلەر وداعىنىڭ توراعاسى ءومىرالى يسمايلوۆ كورمەنىڭ اشىلۋ سالتاناتىندا سۋرەتشىلەردىڭ قىلقالامىنان شىققان نەبىر عاجاپ تۋىندىلاردى تاماشالاۋعا شاقىردى.
«بۇگىن قازاقستان رەسپۋبليكاسىنىڭ مەملەكەتتىك رامىزدەرى كۇنىمەن تۇسپا-تۇس كەلگەن «تاۋەلسىزدىك كوكجيەگى» اتتى كورمەنىڭ اشىلۋى وتۋدە. بۇل – سۋرەتشىلەر ءۇشىن ايتۋلى كۇن. قازاقستان رەسپۋبليكاسى تاۋەلسىزدىگىنىڭ 30 جىلدىعىنا ورايلاستىرعان بۇل كورمەدە سىزدەر بوياۋ بولمىسىن ۇعۋعا ۇمتىلعان قىلقالام شەبەرلەرىنىڭ تۋىندىلارىن تاماشالايتىن بولاسىزدار. ەلiمiزدە وسىنداي كورمەلەر كوپ بولا بەرسiن», دەدى ءو.يسمايلوۆ.
كورمەگە مادەنيەت سالاسىنىڭ ۇزدىكتەرى, سۋرەتشىلەر وداعىنىڭ مۇشەلەرى, «مادەنيەت سالاسىنىڭ ۇزدىگى» توسبەلگىسىنىڭ يەگەرلەرى, حالىقارالىق كيپرلىق «كۇمىس كىلت» سيمپوزيۋمىنىڭ جانە باسقا دا كوپتەگەن ماراپاتتىڭ يەگەرلەرى, سونىمەن قاتار شەتەلدىك, بۇكىلوداقتىق, رەسپۋبليكالىق جانە وبلىستىق كورمەلەردىڭ سۋرەتشىلەرى قاتىستى. قوسىمشا وفلاين فورماتتا وتكەنىنە قاراماستان, قىلقالامنان قۋات العان شىعارماشىل تۇلعالاردىڭ دەنى كەلدى. ولاردىڭ وسىنداي يگى شارانى ساعىنعاندىعى كوزدەرىنەن كورىنىپ تۇر.
اتالعان كورمەدە سۋرەتشىلەردىڭ كەسكىندەمە, گرافيكا جانە ءمۇسىن جانرىنداعى ءارتۇرلى تەحنيكامەن ورىندالعان 60-تان استام تۋىندىلارى ەكسپوزيتسيالانىپ, قىلقالام شەبەرلەرى ءوز شىعارماشىلىعىندا قازاقستاننىڭ تاريحىن, مادەنيەتى مەن تابيعاتىن تانىستىردى.
تالانتتى سۋرەتشىلەردىڭ جۇمىستارى كوپشىلىك كوڭىلىنەن شىعىپ, كورمەگە كەلۋشىلەر رۋحاني جانە ەستەتيكالىق جاعىنان مارقايىپ, تۋىندىلاردى جوعارى باعالادى.
ەڭ قىزىعى, كورمە اياسىندا «تاۋەلسىز قازاقستان قوعامىنداعى سۋرەتشىنىڭ ءرولى» تاقىرىبىندا دوڭگەلەك ۇستەل ءوتتى.
شارا بارىسىندا قازاقستاننىڭ زاماناۋي بەينەلەۋ ونەرىنىڭ وزەكتى ماسەلەلەرى تالقىلانىپ, شەبەرحانالاردىڭ جۇمىسى ءسوز بولدى. سونىمەن قاتار بۇگىندە سۋرەتشىلەر ومىرىندە وزەكتى بولىپ وتىرعان قىلقالام شەبەرلەرىنىڭ مارتەبەسىن انىقتاۋ ماسەلەسى دە كوتەرىلدى.
شارا بارىسىندا ايماقتان كەلگەن سۋرەتشىلەر ءوزارا پىكىر الماسىپ, وسىنداي كەزدەسۋ ۇيىمداستىرۋعا مۇرىندىق بولعان مۋزەي ۇجىمىنا العىستارىن ءبىلدىردى.
ەسكە سالا كەتەيىك, «تاۋەلسىزدىك كوكجيەگى» اتتى سۇلۋلىق پەن اسەمدىككە تولى كورمەنى ونەرسۇيەر قاۋىم 28 ماۋسىمعا دەيىن تاماشالاي الادى.
