مينيسترلەر سونداي-اق مينيمالدى كورپوراتيۆتىك سالىق 15 پايىزدى بولادى دەپ كەلىستى. بۇل جەكەلەگەن ەلدەردىڭ سالىق مولشەرلەمەسىن ازايتۋ ارقىلى ولاردى وزىنە كەلتىرۋگە ارەكەتتەنبەۋى ءۇشىن كەرەك.
جاڭا ەرەجەلەرگە باعىنۋى ءتيىس كورپوراتسيالار اراسىندا Amazon جانە Google ءتارىزدى الپاۋىتتار بار. بۇل ماسەلەنىڭ اۋقىمدى ەكەنىن كورسەتەتىن مىسال رەتىندە وسى اپتادا Microsoft كومپانياسىنىڭ يرلاندياداعى فيليالى بىلتىر 315 ملرد اقش دوللارى كولەمىندەگى تابىسى بولاتى يرلاندياعا بىردە ءبىر ەۋرو سالىق تولەمەگەنى تۋرالى اقپاراتتى كەلتىرۋگە بولادى.
بۇعان كومپانيانىڭ رەسمي تۇردە بەرمۋدتا تىركەلگەنى سەبەپ بولعان. سالىق كەلىسىمى اقش, ۇلىبريتانيا, فرانتسيا, گەرمانيا, كانادا, يتاليا جانە ەو اراسىندا ورناتىلدى. سالىق جۇيەسىن بىرىزدەندىرۋ تۋرالى كەلىسىمگە كوپ جىل تالقىلاۋدان كەيىن قول جەتكىزىلدى.
قۇجات باسقا ەلدەر, سونىڭ ىشىندە «ۇلكەن جيىرمالىق» (G20) ەلدەرىنە قىسىم جاساۋعا قولدانىلۋى مۇمكىن. G20 جيىنى كەلەسى ايدا وتكىزىلەدى. كوپتەگەن ەلدەرىڭ ۇكىمەتى ترانسۇلتتىق كورپوراتسيالاردى بۇرىننان بەرى سول ەلدە تۇسكەن تابىسىنان سالىق تولەۋگە ماجبۇرلەمەك بولعان.
الايدا الپاۋىت كومپانيالار فيليالىن بيزنەس جۇرگىزگەن ەلدە ەمەس, سالىعى از ەلدەردە تىركەپ, تاپقان تابىسىنىڭ بارلىعىن سول جەردە دەكلاراتسيالاعان.
بۇل – جاڭا پايدا بولعان پروبلەما ەمەس, بىراق سوڭعى ونجىلدىقتا Google جانە Facebook سياقتى تەحنولوگيالىق الپاۋىتتار قۇرىلعاننان كەيىن وزەكتى بولا ءتۇستى.
