اتالعان كورمەنى الماتى قالالىق مادەنيەت باسقارماسى مەن اقىن تۋعان ولكە رايىمبەك اۋدانىنىڭ اكىمدىگى ۇيىمداستىردى. سالتاناتتى اشىلۋ ءراسىمى «الماتى گالەرەياسى» عيماراتىنىڭ الدىندا ءوتتى. وعان ەلىمىزگە بەلگىلى ونەر جانە مادەنيەت قايراتكەرلەرى, قالامگەرلەر, اقىننىڭ ۇرپاقتارى, جەرلەستەرى, قالا تۇرعىندارى قاتىستى. جۇلدىز مۇقاعالي ۇلى مەن حالىقارالىق «ماقاتاەۆ» قورىنىڭ ءتورايىمى باقىتگۇل ايداروۆا-ماقاتايكەلىنى مۇقاعاليتانۋعا ۇلەس قوسقان سۋرەتشىلەردىڭ يگى ىستەرىنە اقىن اۋلەتى اتىنان العىس ايتتى. سونداي-اق رايىمبەك اۋدانى اكىمىنىڭ ورىنباسارى عالىم جۋسانباەۆ, اقىن-جازۋشىلار باقىت بەدەلحان مەن دۇيسەن ماعلۇموۆتار ىزگى لەبىزدەرىن ارنادى.
«پوەزيا ماحابباتتان باستالىپ, پاراساتپەن اياقتالۋى كەرەك» دەپ ايتقان ەدى مۇقاڭ. مەنىڭ ويىمشا, اقىن بۇل جەردە تەك پوەزيانى عانا مەڭزەپ وتىرعان جوق. بۇكىل دۇنيە بولمىس وسىنداي ساباقتاستىقتا بولسا ەكەن دەپ ارماندادى. ەندەشە, ءبىز دە مۇقاعاليدىڭ مەرەيتويىن كەڭ اۋقىمدا ۇيىمداستىرىپ, ونى تاعىلىمدى, پاراساتتى شارالارعا ۇلاستىرۋىمىز قاجەت. بۇگىنگى اشىلىپ وتىرعان قىلقالام شەبەرلەرىنىڭ كورمەسى وسى ويىمىزدىڭ دالەلى», دەدى قازاقستان جازۋشىلار وداعى باسقارما توراعاسىنىڭ ورىنباسارى باقىت بەدەلحان.
بەلگىلى ونەر قايراتكەرى شاياحمەت يماش ۇلى اقىننىڭ جىر شۋماقتارىن ناقىشىنا كەلتىرىپ جاتقا وقىدى. مىنا ءبىر سايكەستىككە دە تاڭعالاسىز, اتالعان شارا تۋرا جامبىل جاباەۆ ەسكەرتكىشىنىڭ الدىندا ءوتتى. جىر الىبى مۇقاعالي بالاسىنىڭ ولەڭدەرىن تەبىرەنە تىڭداپ تۇرعانداي. بۇل كورىنىس كوپشىلىكتى ەرەكشە اسەرگە بولەدى.
«مۇقاعاليدىڭ ارمانى, تاڭعى شىقتاي مولدىرەگەن تازا پاك سەزىمى, ساعىنىشى, ەلىنە, جەرىنە دەگەن ماحابباتى – ءومىردى بوياۋمەن زەردەلەگەن سۋرەتشىلەر ەڭبەگىنە تاپتىرمايتىن قۇرال. سوندىقتان قىلقالام شەبەرلەرى دە اقىن رۋحىمەن سىرلاسۋعا بارىنشا دەن قويعان. ناتيجەسىندە, سان الۋان تۋىندىلار قىلقالاممەن جازىلدى. بەينەلەۋ ونەرىندە ماقاتاەۆتىڭ ماڭگىلىك كوشى توقتاۋسىز العا قاراي جىلجىپ بارادى», دەدى قازاق ۇلتتىق پەداگوگيكا ۋنيۆەرسيتەتىنىڭ ونەر, مادەنيەت جانە سپورت ينستيتۋتىنىڭ ديرەكتورى توققوجا قوجاعۇلوۆ.
بۇدان كەيىن جينالعان قاۋىم عيمارات ىشىنە ەنىپ, كورمەگە قويىلعان سۋرەتتەردى تاماشالادى. اقىن پوەزياسىنا العاشقىلاردىڭ ءبىرى بولىپ مويىن بۇرعان بەلگىلى گرافيك-سۋرەتشى تەمىرحان وردابەكوۆ. ونىڭ «رەكۆيەم», «جوقتاۋ», «سۋىق كۇز» جانە تاعى باسقا ەڭبەكتەرىنە زەر سالساڭىز, پوەزيانىڭ تەرەڭىنە بويلايسىز. اق پەن قارا ءتۇس استاسىپ, مۇقاعاليدىڭ قاراما-قايشىلىققا تولى كۇردەلى ءومىرىن ءدال بەينەلەگەن. ونىڭ استارىنا ۇڭىلگەن سايىن فيلوسوفيالىق وي-تولعامدارعا جولىعاسىز. سونداي-اق كورمەدە سۋرەتشىلەر – باۋىرجان نايمانوۆ پەن جاقسىلىق توباجانداردىڭ دا شىعارمالارى كورەرمەندى ادەمى اسەرگە بولەدى. ءسوز ونەرى مەن سۋرەت ونەرى ءبىر-بىرىمەن سونشالىقتى ۇيلەسىپ كەتكەندەي.
