پارتيانىڭ ساياسي مەنەدجمەنت اكادەمياسى جاڭا فورماتتا اۋىلدىق وكرۋگتەردىڭ سايلانعان اكىمدەرىن, ءماسليحات دەپۋتاتتارىن جانە باستاۋىش پارتيا ۇيىمدارىنىڭ وكىلدەرىن وقىتۋ جۇمىسىن باستادى. جاڭا باعدارلاما باسقارۋشىلىق قۇزىرەتتەردى ارتتىرىپ قانا قويماي كوشباسشىلىق قاسيەتتەردى دامىتىپ, ستراتەگيالىق ويلاۋدى جەتىلدىرۋ مەن مەملەكەتتىك جوبالىق باسقارۋدى مەڭگەرتۋدى كوزدەيدى. وقىتۋ جۇمىسى اباي وبلىسىندا باستالادى.
جيىندا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ الەم قارقىندى وزگەرىپ جاتقانىن, جاھاندىق تۇراقسىزدىق جاعدايىندا جاپپاي تسيفرلاندىرۋ مەن جاساندى ينتەللەكت جاڭا ءومىر شىندىعىنا اينالعانىن اتاپ ءوتتى. جاڭا سىن-قاتەرلەرگە لايىقتى جاۋاپ بەرۋ ءۇشىن مەملەكەت باسشىسىنىڭ باستاماسىمەن ەلىمىزدە اۋقىمدى رەفورمالار قولعا الىندى. بۇل قادام ازاماتتاردىڭ ەل باسقارۋ ىسىنە ارالاسۋىن كەڭەيتىپ كەلەدى. «Amanat» پارتياسى جالپىۇلتتىق ۇدەرىستەرگە تىكەلەي قاتىسادى. سوندىقتان پارتيالاستار جاڭا جاعدايدا العا قويىلعان مىندەتتەردى لايىقتى ءارى ءتيىمدى ورىنداۋ ءۇشىن جاڭا قۇزىرەتتەردى بەلسەندى تۇردە مەڭگەرۋى قاجەت.
«پرەزيدەنت قاسىم-جومارت توقاەۆ حالىقارالىق قاتىناستاردىڭ مويىندالعان مامانى, الەمدىك دەڭگەيدەگى ديپلومات رەتىندە وسىنداي پروگرەسسيۆتى ۇردىستەردى جاقسى بىلەدى. مەملەكەت باسشىسى «العان ديپلومىڭ ءومىر بويى ازىق بولادى» دەگەن تۇسىنىكتىڭ ەسكىرگەنىن, بۇل ۇعىمنىڭ ورنىن ء«ومىر بويى وقى جانە ۇيرەن» دەگەن قاعيدا باسقانىن ۇنەمى ايتىپ ءجۇر. ونىڭ ۇستىنە, جاڭا كونستيتۋتسيادا ادام كاپيتالىن دامىتۋ, ءبىلىم مەن عىلىم ستراتەگيالىق باسىمدىق رەتىندە بەكىتىلدى. بۇل ءبىزدىڭ باستى رەسۋرسىمىزعا اينالدى. وسى باعداردى باسشىلىققا العان «Amanat» پارتياسى بۇگىن جەرگىلىكتى كادرلاردى وقىتۋ باعدارلاماسىن باستاپ وتىر. ولار وزىنە جاۋاپكەرشىلىك الا الاتىن, تاباندى, ءتيىمدى شەشىم قابىلداي بىلەتىن مامان بولۋى كەرەك», دەدى ءماجىلىس توراعاسى.
ەرلان قوشانوۆ سايلانعان اۋىل اكىمدەرى, ءماسليحات دەپۋتاتتارى جانە بپۇ وكىلدەرى بۇگىندە حالىق سەنىم ارتاتىن, ازاماتتار ءوز ماسەلەلەرىن شەشۋ ءۇشىن جۇگىنەتىن ناعىز وڭىرلىك ەليتا ەكەنىن ەرەكشە اتاپ ءوتتى. بۇل رەتتە, اۋىل اكىمدەرى مەملەكەتتىك باعدارلامالاردى جۇزگە اسىرۋدان باستاپ, الەۋمەتتىك ينفراقۇرىلىمدى دامىتۋعا دەيىنگى كەڭ اۋقىمدى ماسەلەلەرگە جاۋاپ بەرە وتىرىپ, ۇلكەن جۇكتەمە ارقالاپ وتىر. ءوز كەزەگىندە, ءماسليحات دەپۋتاتتارى مەملەكەت پەن قوعام اراسىنداعى ءوزارا بايلانىستىڭ نەگىزگى بۋىنى رەتىندە قاراستىرىلادى. ازاماتتاردىڭ سەنىمى مەن وڭىرلەردەگى تۇراقتىلىق دەڭگەيى ولاردىڭ كاسىبي شەبەرلىگىنە, كوممۋنيكاتسيا ساپاسىنا تىكەلەي بايلانىستى. پارتيانىڭ كۇن ءتارتىبىن جۇزەگە اسىرۋ ىسىندە 3800 بپۇ ەرەكشە ءرول اتقارادى. ءدال وسى دەڭگەيدە قوعامدىق پىكىر قالىپتاسىپ, حالىقپەن كەرى بايلانىس قامتاماسىز ەتىلەدى.
پارتيا توراعاسى جاڭا وقۋ جوباسى بولاشاعى زور باسقارۋشىلاردى انىقتاۋعا ارنالعان پلاتفورماعا اينالاتىنىن ەرەكشە اتاپ ءوتتى. باعدارلاما اياسىندا پارتيانىڭ كادرلىق رەزەرۆى قالىپتاسىپ, مەملەكەتتىك جانە قوعامدىق-ساياسي قىزمەتتە ىلگەرىلەتۋگە باعدارلانعان ءتيىمدى ءارى باسەكەگە قابىلەتتى كوشباسشىلار دايارلانادى.
جاڭا وقۋ جوباسىنا قاتىستى پىكىر بىلدىرگەن پارتيا حاتشىسى شولپان كارينوۆا جاڭا وقۋ باعدارلاماسى قولدانبالى تاسىلىمەن ەرەكشەلەنەتىنىنە جانە زاماناۋي عىلىمي زەرتتەۋلەرگە سۇيەنەتىنىنە نازار اۋداردى.
«ساياسي مەنەدجمەنت اكادەمياسى ۇسىنىپ وتىرعان جاڭا ءبىلىم بەرۋ باعدارلاماسى تاجىريبەلىك باعىتىمەن ەرەكشەلەنەدى. باعدارلامادا ارىپتەستەرىمىزگە قىزمەت بارىسىندا كەزدەسەتىن ءتۇرلى جاعدايعا ناقتى شەشىم ۇسىنىلادى. باعدارلاما نازارباەۆ ۋنيۆەرسيتەتى, AlmaU, SDU جانە بيل سىندى جەتەكشى جوعارى وقۋ ورىندارى عالىمدارىنىڭ قاتىسۋىمەن ازىرلەندى. ءال-فارابي اتىنداعى قازاق ۇلتتىق ۋنيۆەرسيتەتى جانىنداعى رەسپۋبليكالىق وقۋ-ادىستەمەلىك كەڭەس وقىتۋ باعدارلاماسىنىڭ مودۋلدىك قۇرىلىمىن ماقۇلدادى. سونداي-اق ەلىمىزدەگى جوعارى وقۋ ورىندارى بۇل وقىتۋ مودۋلدەرىن ءوز باعدارلامالارىنا ەنگىزە الادى», دەدى پارتيا حاتشىسى.
ءىس-شارا بارىسىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي مەملەكەتتىك قىزمەت سالاسىنىڭ باسشىلىق قۇرامىن تولىقتىرۋ بارىسىندا «Amanat» پارتياسى مۇشەلەرىنىڭ الەۋەتى اشىق ءارى باسەكەلى تسيفرلىق ىرىكتەۋلەر ارقىلى بەلسەندى پايدالانىلىپ جاتقانىن اتاپ ءوتتى. Istanbul Kent University ەكونوميكا, اكىمشىلىك جانە الەۋمەتتىك عىلىمدار فاكۋلتەتىنىڭ دەكانى حاسرەت چوماك پارتيا باعدارلاماسى ناقتى ناتيجەگە نەگىزدەلگەنىن جانە ساياسي شەشىمدەردى تۇرعىنداردىڭ تۇرمىسىن جاقسارتۋعا باعىتتايتىن كوشباسشىلاردى دايارلاۋدى كوزدەيتىنىن ايتتى. اباي وبلىسىنىڭ اكىمى بەرىك ءۋالي جاڭا مودۋلدىك باعدارلاما اۋىل اكىمدەرىنىڭ زاڭنامانى ءىس جۇزىندە قولدانۋ داعدىسىن قالىپتاستىرۋعا باعىتتالاتىنىن, ولار بيۋدجەتتىك رەسۋرستاردى ءتيىمدى باسقارۋدى – بيۋدجەتتىك ۆەرتيكالدى تۇسىنۋدەن باستاپ, ءوز كىرىس بازاسىن دامىتۋدى, سالىق تۇسىمدەرىن ارتتىرۋدى جانە اۋماقتاردىڭ ەكونوميكالىق ءوسىمىن ىنتالاندىرۋدى مەڭگەرەتىنىن اتاپ ءوتتى.
سونداي-اق ءىس-شارادا عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا, نازارباەۆ ۋنيۆەرسيتەتى جوعارى مەملەكەتتىك ساياسات مەكتەبىنىڭ پروفەسسورى, يتاليالىق ساياسي تەحنولوگ ريكاردو پەليتستسو, سولتۇستىك قازاقستان وبلىسى ماعجان جۇماباەۆ اۋدانى ءماسليحاتىنىڭ توراعاسى ايزادا راحمەتوۆا جانە «جەتىگەن» بپۇ توراعاسى, الاتاۋ قالاسى جەتىگەن شاعىن اۋدانىنداعى №11 ورتا مەكتەپتىڭ مۋزىكا ءپانى مۇعالىمى اناستاسيا مەلنيك, اتىراۋ ۋنيۆەرسيتەتىنىڭ رەكتورى سالامات يدريسوۆ, شىعىس قازاقستان ۋنيۆەرسيتەتىنىڭ رەكتورى مۇحتار تولەگەن جانە تورايعىروۆ ۋنيۆەرسيتەتىنىڭ رەكتورى نۇرلان مەدەتوۆ ءسوز سويلەدى.
جاڭا وقۋ باعدارلاماسىنىڭ باستالۋىنا مەملەكەتتىك ورگاندار مەن اكادەميالىق قاۋىمداستىق وكىلدەرى, سونداي-اق بەينەكونفەرەنتسيا بايلانىسى ارقىلى پارتيانىڭ وڭىرلىك فيليالدارىنىڭ قىزمەتكەرلەرى قاتىستى.
