«جاس سۋرەتشىنى بىرنەشە ادام عانا تۇسىنەدى. ال ۇلى سۋرەتشىنى تۇسىنەتىندەر ودان از». ءيا, ءبىز تۇسىنبەيمىز, تەك تاڭ قالامىز. الدىمەن قۇدايدىڭ شەبەرلىگىنە, سوسىن سۋرەتشىنىڭ قيالىنا. پيكاسسونىڭ پايىمى ويلى كورەرمەننىڭ جانارىنا تىلسىم نۇرىن قۇيادى. وندا جالعىزدىقتىڭ جۇپارى, قايعىنىڭ ءيسى بار. ءوزى ايتقانداي, «جاقسى ءدام» – شىعارماشىلىقتىڭ قاس جاۋى. ول عۇمىربويى سول دۇشپانىمەن الىستى. ال جەڭدى مە, جەڭىلدى مە – ونى سونىنان قالعان كوركەم كارتينالاردان سۇراڭىز. سولار سويلەسىن, ءبىز تاعى دا تاڭ قالايىق.
«تراگەديا» كارتيناسىن پابلو پيكاسسونىڭ ەڭ تانىمال تۋىندىلارىنىڭ بىرىنە جاتقىزۋعا بولادى. بۇل ەڭبەك اۆتوردىڭ «كوكشۋلان» كەزەڭدەگى ەڭ جارقىن جۇمىستارىنىڭ بىرەگەيى. شىعارما – سول ءداۋىردىڭ عاجايىپ جەتىستىگى ەسەبىندە ەل جادىندا ساقتالدى. كارتينا جالت ەتكەن كوزدىڭ قاراسىندا ءومىر ءسۇرىپ, ءدال سولاي ولەدى دەسەك تە, كورەگەن ۋاقىت تۋىندىعا اقىرى انىقتاما بەردى. كەز كەلگەن قىلقالام يەسى ماڭگىلىك ولمەۋ ءۇشىن عۇمىر بويى ەرەجەلەرگە باعىنباۋعا تىرىسادى. ال پابلو اجالدى اۋزىنا العان ەمەس. ءولىم ونىڭ ءوز بولمىسىندا جوق, اشەيىن تىرىلەر ءۇشىن بار عانا ۇعىم. ونىڭ كارتينالارىنداعى قايعى مەن قاسىرەت ادامزاتتىڭ اقىماقتىعىنان بولىپ جاتقان قۇبىلىس رەتىندە كورىنەدى.
شىنىندا, شەبەر بۇل تۋىندىنى ازاپ پەن قياناتتىڭ وتىنا كۇيگەن ساتىندە جازدى. ۇلى دەپرەسسيانىڭ ورىنا قۇلاپ, شىعا الماي قينالعان كۇننىڭ بەلگىسى ىسپەتتى. اۆتوردىڭ مۇنداي كۇڭگىرت شىعارما جازۋىنا سەبەپ بولعان – جەكە تراگەدياسى. جاقىن دوسىنىڭ دۇنيەدەن وزۋى, قارجىلىق قىسىم, قوعامنىڭ تۇرتپەگى الەمنەن الىسقا الىپ قاشتى. كوڭىل كۇي تولقىنىسىن ءتىرى جانعا ايتا الماي, الۋان تۇستەرمەن استارلاپ جەتكىزدى.
ءيا, ءومىر قاراما-قايشىلىقتارعا تولى. شەبەر جان ءحالىن قايىرشىنىڭ كەيپىندە بەرگەن. بىراق قايىرشىلار بەينەلەنگەن كارتينا بايلىققا جەتكىزدى. مۇقتاجداردىڭ مۇڭىن شاققان تۋىندىنىڭ قۇنى وسىنشاما قىمبات بولارىن اۆتوردىڭ ءوزى دە سەزبەسە كەرەك. تەك پيكاسسوعا بولمىس الدىنداعى دارمەنسىزدىكتەن ۋاقىتشا قاشىپ قۇتىلۋعا كومەكتەسكەندەي.
كارتيناعا كوز تاستاعان ءار ادام ودان ءوزىنىڭ شاراسىزدىعىن عانا كورەدى. سوسىن شەكسىزدىكپەن ۇزاق تىلدەسەدى. ءبىز ءومىر جولىندا تەك بەلگىسىزدىككە ساياحاتتايمىز. پيكاسسو ءدال وسى ءساتتى عانا سەزىندىرەدى. سەبەبى ءبىز ماڭگىلىك ەمەسپىز, تەك بۇگىنىمىزبەن عانا ءومىر سۇرەمىز.
كارتينانىڭ كەيىپكەرلەرى سول كەزدەگى پيكاسسونىڭ ءوزى سياقتى كەدەي ادامدار بولعان. ولاردى سىرتتان باقىلاي وتىرىپ, تۋىندىعا شابىت الادى. جۇرەگىندەگى بوستىقتى تولتىرۋ ءۇشىن, بوستىقتى جويۋ ءۇشىن, ودان قاشىپ قۇتىلۋ ءۇشىن سۋرەت سالعان سەكىلدى. سەبەبى ءدال سول ساتتە قۋانىشتى كۇتۋ مۇمكىن ەمەس ەدى. كەنەپتە كولبەڭدەگەن بەينەلەر ارقىلى ۇمىتقانىن, جوعالتقانىن تاپقىسى كەلدى. تاپتى دا. ساناسىندا, ەڭ بولماعاندا, ءالى باعىتى انىقتالماعان بولسا دا ءبىر يدەيا بار ەكەنىن كورسەتتى.
شاماسى, تەڭىز جاعاسىندا تۇرعان ءبۇتىن ءبىر وتباسى. اكە مەن انا جانە جالعىز بالا. ولاردىڭ كوزدەرىندە جالىن جوق, تەك ومىرگە دەگەن وكپە عانا بار. باستارى مەن يىقتارى تومەن, قولدارى ايقاسقان. اششى ويدىڭ شەڭگەلىنە ورالىپ, شاراسىزدىقتان جانارىن تومەن سالادى. جۇپىنى كيىمى مەن جالاڭ اياق جۇرگەنى جان تولقىتادى. اۋا رايىنىڭ ىزعارلى ەكەنى انىق بايقالىپ تۇر. تەڭىزدىڭ سۋىق جەلىنەن ابدەن توڭعان ۇشەۋى جىلىنۋ ءۇشىن جامىلعىلارىنا ورانۋدا. بىراق شۇبەرەك اياعىنا جەتپەگەندىكتەن, جاۋراي تۇسۋدە.
مازاسىز تەڭىز, تۇنگى اسپان, دىمقىل قۇم. كەيىپكەرلەردىڭ بەتى مەن ساۋساقتارى دا سۋىق كوك تۇسپەن كومكەرىلگەن. ءدال وسى فون ناقتى انىقتالماعان بولشەكتەرسىز بەرىلگەن. ارالارىندا ۇلكەن كەڭىستىك بار, دەگەنمەن ولار بوس ورىندى تولتىرا المايدى, جاقىنداۋعا باتپايدى. ولاردى تەك ازاپ قانا بىرىكتىرەتىن سەكىلدى, سوسىن قويۋ تۇسكە شومىلعان جۇمباق كارتينا.
مۇندا كەسكىندەمەنىڭ ەڭ كوڭىلسىز بۇرىشى – كىشكەنتاي بالانىڭ بەت-الپەتى. وتە سالماقتى ورنالاسقان. ول بولعان وقيعانىڭ تەرەڭدىگىن تۇسىنۋگە تىرىسادى. اتا-اناسىنا قولىن سوزىپ, وسىنشا قايعىعا قالاي تاپ بولعانىنا قايران كۇيدە. ۇمىتسىزدىكتىڭ اپانىنا تۇسكەندەي, ءبىر-بىرىمەن تىلدەسۋگە باتپايدى. قۇلاعىنىڭ تۇبىنە ايقايلاعان اياز داۋسى, تاباننان وتكەن سىز, جىلۋى جوق جامىلعى ەندىگى ءومىرىنىڭ ماڭىزدىلىعىن جوعالتقانداي. قارا جانە كوك رەڭك – قايعى ءتۇسى. بۇل بۋىرقانعان مۇڭلى بوياۋلار كارتينانىڭ ءمانىن اشىپ تۇرعانداي. سول بوياۋلار ادامنىڭ ەموتسياسى سەكىلدى وزگەرىپ وتىرادى. وقىرماندى دا ەلەڭ ەتكىزەرى حاق.
كارتيناعا ءولىم الدىنداعى ۇمىتسىزدىك ەنەرگياسى سىڭگەن. بۇل اۆتوردىڭ وسى شەدەۆرمەن جۇمىس ىستەۋ كەزىندە باستان كەشىرگەن جاعىمسىز ەموتسيالاردىڭ دا-ۋىلى ىسپەتتى. قاراعان سايىن, كەۋدەڭىزدەن قۇيىن وتكەندەي, كوڭىلىڭىز الابۇرتىپ, جانىڭىزدى قويارعا جەر تاپپايسىز. ويىڭىزعا ەلەستەگەننىڭ بارلىعى شىندىق. بۇل – پيكاسسونىڭ شىندىعى.
