قازاقستان • 01 ماۋسىم، 2021

ۆاكتسينالار حالىقارالىق سەرتيفيكات الادى

30 رەت كورسەتىلدى

دەنساۋلىق ساقتاۋ مينيسترلىگىنىڭ 31 مامىرداعى مالىمەتى بو­يىنشا  27 180 ادام كوروناۆيرۋس ينفەكتسياسىنان ەمدەلۋدە، ولاردىڭ ىشىندە 10 908 پاتسيەنت ستاتسيوناردا، 16 272 ناۋقاس امبۋلاتوريالىق دەڭگەيدە ەم قابىلداۋدا. ىندەتكە شال­دىق­قانداردىڭ اراسىندا 668 ادامنىڭ جاعدايى اۋىر، 152 پاتسيەنت­تىڭ جاعدايى وتە اۋىر، 97 ناۋقاس ءوجت اپپاراتىندا جاتىر.

سونىمەن قاتار ەلىمىزدە 2 114 112 ادام ۆاكتسينا سالدىرعان. الايدا حالىق اراسىندا ۆاك­تسي­ناعا قاتىستى ءدۇدامال پىكىر­لەردىڭ كوپ ەكەنى راس. بۇل تۋرالى «قوعامدىق دەنساۋلىق ساق­تاۋ ۇلتتىق ورتالىعى» شجق رمك سانيتارلىق-ەپي­دەميولوگيالىق ساراپتاما جانە مونيتورينگ عىلىمي-پراك­تيكالىق ورتالىعىنىڭ دارىگەر-ەپيدەميولوگى لەنا قاسابەكوۆا ايتتى.

«كوروناۆيرۋس ينفەكتسيا­سى­نا قارسى ۆاكتسينالاۋ بۇكىل الەم­­دە، ونىڭ ىشىندە ءبىزدىڭ رەس­پۋب­ليكامىزدا وتە وزەكتى پروب­لەما بولىپ تۇر. ءبىزدىڭ مىندەتىمىز – قازىرگىدەي قاتە ءارى تەرىس اقپارات­تار ۋشىعىپ تۇر­عان ساتتە «ەكپە الۋ كەرەك پە، كەرەك ەمەس پە» دەگەن ما­سە­­لەدە حالىقتىڭ دۇرىس شە­شىم قابىلداۋىنا كومەك كور­سەتۋ. بۇگىندە حالىق­تىڭ باسىم بولىگىنىڭ تىم بولما­عاندا ۆاك­تسينانىڭ ءبى­رىنشى كوم­پونەن­تىن الۋى ماڭىزدى. بۇكىل الەم­دە ۆاكتسينا تاپشىلىعى باي­قالاتىنىن بارلىعى بىلەدى. بىراق وسىعان قاراماستان، ەلىمىز­دىڭ تۇرعىندارىنا ۆاكتسينانىڭ ءۇش ءتۇرى قولجەتىمدى. مىقتى يممۋنيتەت قالىپ­تا­سۋى ءۇشىن ۆاكتسينانىڭ ەكىنشى كوم­پونەنتىن الۋ كەرەك ەكەنى تۇسى­نىكتى. ۆاكتسينالاۋ كورونا­ۆيرۋس ينفەكتسياسىنان قورعاۋعا كەپىل بولا المايدى. ۆاكتسينا الىپ، ەندىگى ۋاقىتتا «تولىقتاي قورعالدىم» دەپ جۇرگەن ادام­دارعا مۇنىڭ دۇرىس ەمەس ەكەنىن ايتقىم كەلەدى. ادام ەكپە ال­سا دا بۇل ىندەتتەن 100 پا­يىز قور­عالمايدى. ۆاكتسينالاۋ كورو­ناۆيرۋستىڭ اۋىر تۇرىنەن، ءولىم-جىتىمنەن قورعايدى. ءتىپتى ەكپە العان ادامنىڭ ءوزى دە اۋىرىپ قالىپ، ودان ءارى سول ۆيرۋس­تى تاراتۋشى بولۋى مۇمكىن»، دەدى ل.قاسابەكوۆا.

قوعامدىق دەنساۋلىق ساق­تاۋ ۇلتتىق ورتالىعى باسقار­ماسى توراعا­سىنىڭ ورىنباسارى اينا­گۇل قۋاتباەۆانىڭ ايتۋىن­شا، قازاق­ستاندىقتار الىپ جات­قان ۆاكتسي­نالاردى حالىقا­رالىق تانۋ سەرتيفيكاتىن الۋ باعى­تىندا جۇ­مىس جۇرگىزىلىپ جاتىر.

«قاجىلىققا ساپارلاۋ مەر­زىمىنىڭ جاقىنداۋىنا بايلانىستى ۆاكتسينالاۋ وزەكتى ماسەلە دەپ ەسەپتەيمىز. وسىعان وراي، دەنساۋلىق ساقتاۋ مينيسترلىگى وزگە دە مەملەكەتتىك ورگاندارمەن بىرلەسىپ، سونىمەن قاتار دۇنيە­جۇزىلىك دەنساۋلىق ساقتاۋ ۇيى­مىمەن اقىلداسا وتىرىپ، قازاق­ستاندا جاسالعان ۆاكتسينانى وزگە ەلدەردە دە راستايتىن سەرتيفيكاتتى قابىلداۋ ماسەلەسىنە قاتىستى وتە بەلسەن­دى جۇمىس جۇرگىزىپ جاتىر. بۇ­گىندە وسى باعىتتا ءبىزدىڭ ەل مەن موڭعوليا اراسىنداعى ءىس-شارا­لار ناقتىلانىپ جاتقانىن اتاپ وتۋگە بولادى. دەگەنمەن بۇل – ءبىر كۇننىڭ ىشىندە شەشىلە سالاتىن ماسەلە ەمەس. مەنىڭشە، قاجىلىققا بارۋ ناۋقانى ۇيىم­داستىرىلعانعا دەيىن اتالعان ماسەلەگە قاتىستى ناقتى جاۋاپ الا­مىز دەپ ويلايمىن. بۇل رەتتە قازاق­ستاندىقتارعا ەكپە جاسا­لىپ جاتقان ۆاكتسينالاردى دالەلدەيتىن سەرتيفيكاتتاردى تانۋ جايىندا ايتىپ وتىرمىن»، دەدى ا.قۋاتباەۆا.

ەلوردا تۇرعىندارى مەن قوناق­تارىن كوروناۆيرۋس ينفەكتسياسىنا قارسى ۆاكتسينالايتىن ساۋدا ورىندارىنىڭ ءتىزىمىن قالانىڭ وڭ جاعالاۋىنداعى «ەۋرازيا» ساۋدا ءۇيى تولىق­تىردى. مۇندا ازاماتتار ۆاكتسي­نانىڭ ەكى ءتۇرىن قابىلداي الادى: رەسەيلىك سپۋتنيك-V جانە قىتايلىق Hayat-Vaح ۆاكتسيناسى.

«قالا تۇرعىندارى تىعىز ورنا­لاسقان اۋدانداردىڭ ءبىرىن ۆاكتسينالاۋمەن قامتۋ ءۇشىن «ەۋرازيا» ساۋدا ۇيىندە دە ەگۋ پۋنكتىن اشۋدى ءجون كوردىك. اۋدان تۇرعىندارى دا اتالعان ساۋدا ورنىندا اشۋ تۋرالى بىرنەشە رەت ءوتىنىش بىلدىرگەن. نۇر-سۇلتان قالاسى بويىنشا سا­ني­­تارلىق-ەپيدەميالىق باقىلاۋ دەپارتامەنتىمەن بىر­لەسىپ، وسى ماسە­لەنىڭ مۇمكىن­دىگىن قاراس­تىر­دىق جانە ازامات­تارعا ىڭعايلى بولۋ ءۇشىن ۆاكتسينالاۋ پۋنكتتەرىن اشۋ تۋرا­­لى شەشىم قابىلدادىق. ەپي­دە­ميالىق تالاپتاردى ساق­تاي وتىرىپ، وسى جەردە ۆاكتسينا­لاۋ جۇر­گىزىلەدى»، دەپ اتاپ ءوتتى قالا­لىق قو­عامدىق دەنساۋلىق ساقتاۋ باسقار­ماسى.

ۆاكتسينالاۋ ورنى «ەۋرازيا-3»­ ساۋدا ءۇيىنىڭ 4-قاباتىن­دا ۇيىم­­داستىرىلعان. ۆاكتسي­نالاۋ­عا تىركەۋ بريگادانىڭ كەستە­سىنە جانە ساۋدا ءۇيىنىڭ جۇ­مىس رەجىمىنە سايكەس ساعات 19.30-عا دەيىن جۇرگىزىلەدى.

قوعامدىق دەنساۋلىق ساقتاۋ باسقارماسىنىڭ قويمالارىنا دەمالىس كۇندەرى 6 مىڭ دوزا مولشەرىندە وتاندىق ۆاكتسينا جەتكىزىلدى. بۇل 3 مىڭ دوزادان ەكى كومپونەنتپەن سالۋعا ارنالعان.

بۇگىندە ەلوردادا I-كومپونەنت بويىنشا ۆاكتسينالانعان ادام­داردىڭ سانى شامامەن 170 مىڭ ادامدى قۇرادى. قويمادا سپۋتنيك-V ۆاكتسيناسىنىڭ I-كوم­پونەنتىنىڭ شامامەن 12 مىڭ دوزاسى جانە قىتايلىق Hayat-Vax-تىڭ I-كومپونەنتىنىڭ شامامەن 18 مىڭ دوزاسى بار.

 

سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار