ناق بۇلاي جازۋىمىزعا نە تۇرتكى بولعانىن سەزىپ وتىرعان شىعارسىزدار, اۋىلدىڭ مادەني ءومىرىنىڭ ءبىر مەزەتى. ءبىز اتاق-داڭقىن الدىعا تارتىپ, كەيبىر قىزمەتكەردىڭ جەتىستىگىنىڭ شەڭبەرىندە باعالاپ, العىس ايتىپ جاتامىز. ال سول سالادا 30-40 جىل ەڭبەك ەتكەن, بىلايشا ايتقاندا وتىمەن كىرىپ, ك ۇلىمەن شىققان, ەڭ عاجابى سول ءۇشىن مەملەكەتتەن ەشتەڭە دامەتپەگەن جاندار حاقىندا ءتىس جارمايمىز. قوڭىر تىرلىكتىڭ ىعىنا جىعىلىپ, ازعانتاي جالاقىنىڭ مەدەت تۇتقان, ءوزىنىڭ سۇيىكتى ماماندىعى ءۇشىن جانقيار ارەكەتكە بارعان, ءارى حالىقتىڭ ءىلتيپاتىنان ۇنەمى شابىت الىپ وتىراتىن ولاردىڭ ەڭبەگى كول-كوسىر. ءبىز بۇگىن ءوز اۋىلىنىڭ مادەني ومىرىنە ءمان بەرگەن, تالاي جىل ءبىر جەردە تاپجىلماي قىزمەت ەتكەن مارتەبەلى ماماندىق يەلەرى حاقىندا ءسوز قاۋزاماقپىز. ولار ونەردى قۇرمەتتەپ, مادەنيەتتى وركەندەتۋ جولىندا ەشقاشان شارشاعان ەمەس. شارشامايدى دا.
جارتى عاسىرعا جۋىق ۋاقىت كولەمىندە شاعىن عانا اۋىلدىڭ كىتاپحاناسىندا قىزمەت اتقارعان باقىتكۇل ويشەۆا بۇگىندە زەينەتكە شىقسا دا ءالى بالالارعا كىتاپ تاسۋدان قول ۇزگەن ەمەس. اۋىل جۇرتى «قامقور كىتاپحاناشى» اتاپ كەتكەنى سوندىقتان. كىتاپحانادا جوق ءبىلىم قۇرالدارىن قالادان ساتىپ اكەلىپ, كىشكەنتاي وقىرماندارعا تاراتىپ بەرىپ, ءبىلىمىن شىڭداۋعا جاردەمدەسىپ كەلەدى. العاشىندا الماتى وبلىسى, بالقاش اۋدانىنا قاراستى اقجار اۋىلىندا كىتاپحاناشى بولسا, كەيىن باقباقتى اۋىلىنا قونىس اۋدارىپ, مادەنيەت ءۇيىنىڭ جانىنان قۇرىلعان شاعىن كىتاپحانادا جۇمىس ىستەگەن. ءوزىنىڭ ايتۋىنشا, تاۋەلسىزدىككە قول جەتكىزبەي تۇرعاندا جانە ەگەمەن ەلىمىزدىڭ ىرگەسى ەندى قالانعان جىلداردىڭ باسىندا تالاي قيىنشىلىقتاردى باستان وتكەرگەن ەكەن.
«مادەنيەت سالاسىندا 40 جىلدان استام ۋاقىت قىزمەت اتقاردىم. تاۋەلسىزدىكتىڭ اۋىلى الىس كەزەڭدە اۋىل تۇرعىندارىنا قازاق جازۋشىلارىنىڭ كىتاپتارىن كوپتەپ اكەلدىك. سەبەبى جاسى بار, جاسامىسى بار, وقىرمان وتە كوپ بولاتىن. اۋىلدا جاتىپ-اق كەڭەس يدەولوگياسى جاسىرىن قارسى قادامدار جاسادىق. ونىڭ ءبارى بۇگىندە اشەيىن اڭىز عانا. ەلىمىز تاۋەلسىزدىك العاننان سوڭ, مادەنيەت سالاسى ازداپ ىلگەرىلەي باستادى. بۇرىنعىداي قازاق ادەبيەتى كلاسسيكتەرىنىڭ شىعارمالارىن تىعىپ ەمەس, اشىقتان اشىق تاراتامىز. ءبىر جىلدارى داڭعاراداي مادەنيەت ۇيىندە مەڭگەرۋشى ەكەۋىمىز عانا جۇمىس ىستەدىك. قىستا سۋىق, ورانىپ وتىرامىز. كەيىن ەلباسىنىڭ باستاماسىمەن باقباقتى اۋىلدىق مادەنيەت ءۇيى كۇردەلى جوندەۋدەن ءوتىپ, مادەنيەت سالاسى قايتا جانداندى», دەيدى ارداگەر كىتاپحاناشى.
كەيىپكەرىمىز قانشا جىلدان بەرى كىتاپحاناشى بولسا دا, ءبىر عانا جەتىستىگى بار. ول – «كىتاپحانا سالاسىنىڭ ۇزدىگى» مەدالى. كەزىندە وبلىس اكىمىنىڭ ورىنباسارى تاققان سىيلىقتى بارىنەن قىمبات كورەدى. سەبەبى كىشكەنتاي مەدال تالاي جىلعى ەڭبەكتىڭ وتەۋىندەي ىستىق.
ال بۇگىندە قاراتال اۋداندىق مادەنيەت ۇيىندە جاستار مەن بۇلدىرشىندەرگە ەسترادالىق ۆوكالدان ساباق بەرىپ, ءان ونەرىنىڭ قىر-سىرىن ۇيرەتىپ جۇرگەن الما دوسوۆانىڭ مادەنيەت سالاسىندا جۇگەنىنە شيرەك عاسىردان اسقان. ول تاربيەلەگەن شاكىرتتەر رەسپۋبليكامىزدىڭ مادەنيەت وشاقتارىندا ەڭبەك ەتىپ, ۇلكەن ساحنالاردا حالىقتىڭ قوشەمەتىنە بولەنىپ ءجۇر. مايتالمان مامان بىزگە بەرگەن سۇحباتىندا قاشاندا ءوزى باپتاعان وقۋشىلارمەن ماقتاناتىنىن جەتكىزدى.
«شاكىرتتەرىم بيىككە شىقسا, ءوزىم بيىككە شىققانداي قۋانامىن. الماتى وبلىسى حالىق شىعارماشىلىق ورتالىعىنىڭ وبلىستىق ءداستۇرلى «جەتىسۋ جۇلدىزدارى» بايقاۋىندا بالالارىمنىڭ جەتكەن جەتىستىكتەرى مول. حالىقارالىق, رەسپۋبليكالىق بايقاۋلارعا قاتىسىپ جۇرگەن بۇلدىرشىندەرىمىز دە جۇلدەلى ورىندارمەن ورالۋدا. اقمولا وبلىسىندا وتكەن قازاقستاننىڭ حالىق ءارتىسى روزا باعلانوۆا ورىنداعان اندەرگە ارنالعان حالىقارالىق «اق سۇنقارىم» اتتى بايقاۋدا وقۋشىلارىم توپ جاردى. اللاعا شۇكىر, تاربيەلەگەن شاكىرتتەرىم ونەر بايقاۋلارىنان جۇلدەسىز قايتقان ەمەس. بۇل مەنىڭ مارتەبەم. وسىلارعا قاراپ, مادەنيەت سالاسىندا جۇرگەنىمە, ولارعا از دا بولسا ءبىلىم بەرگەنىمە ىشتەي مارقايىپ قالامىن», دەيدى ا.دوسوۆا.
ءيا, مادەنيەت پەن ونەر – رۋحاني ءومىرىمىزدىڭ مايەگى. ەلباسى نۇرسۇلتان نازارباەۆ ءبىر سوزىندە: «مادەنيەت – ەڭ الدىمەن جادىگەرلىك. ونى ۇرپاقتان ۇرپاققا جەتكىزۋشى – زيالى قاۋىم. سەبەبى ءار حالىقتىڭ دۇنيەتانىمى, رۋحاني بايلىعى, تىنىس-تىرشىلىگى, سالت-داستۇرلەرى ءدال وسى مادەنيەت دەگەن اسىل ۇعىممەن استاسىپ جاتىر. قاي ەلدىڭ مادەنيەتى مىقتى دامىسا, ول ەلدىڭ ەڭسەسى دە بيىك, رۋحى دا جوعارى بولادى. سونىمەن قاتار مادەنيەت – ادامزات تۇلعاسى دەڭگەيىنە كوتەرەتىن نەگىزگى قۇرال. مادەنيەتتىڭ وزەكتى بولىگى – ونەر. شىنىندا دا ونەر مادەنيەتتىڭ التىن قازىناسى, ادامنىڭ ۇلىلىعىن بىلدىرەتىن عاجاپ كورىنىستەردىڭ ءبىرى. مادەنيەت پەن ونەر – قوعام دامۋىنىڭ نەگىزگى قاجەتتى سالاسى. مادەنيەتى مەن ونەرى وركەندەگەن قوعام ءار ۋاقىتتا ىلگەرىلەپ, داميدى», – دەگەن بولاتىن. راس, ۇلتتىق ونەرىمىز بەن مادەني مۇرامىزدى ناسيحاتتاۋدا ولاردىڭ ەڭبەگى ۇشان-تەڭىز. وسىنداي جانكەشتى جانداردىڭ ارقاسىندا اۋىلدىق جەرلەردە دە رۋحانياتىمىز ىلگەرىلىپ كەلەدى.
ءبىز مىسالعا العان ەكى كەيىپكەردەن بولەك, ەلىمىزدىڭ وركەندەپ-وسۋىنە ۇلەس قوسىپ, مادەنيەت بيىگىنە شىعارماشىلىق تۇرعىدان قىزمەت ەتىپ, حالىقتى تاماشا ونەرلەرىمەن قۋانتىپ كەلە جاتقاندار قانشاما. ولار عاسىرلار بويى مۇرا بولعان اسىل قازىنانى – ۇرپاققا جەتكىزۋ جولىندا اۋقىمدى جۇمىستار اتقارۋدا. سوندىقتان رۋحاني بايلىق پەن مادەني داستۇرلەرىمىزدى, ونەرىمىزدى ساقتاپ, وركەندەتۋ جولىندا ايانباي ەڭبەك ەتىپ جۇرگەن ەلىمىزدىڭ بارلىق وڭىرىندەگى ونەر, مادەنيەت قىزمەتكەرلەرى قانداي ماقتاۋعا دا لايىق. ولاردىڭ قوعامىمىزداعى رۋحانياتتى دامىتۋعا, يگىلىك پەن ادامگەرشىلىكتى, قايىرىمدىلىق پەن ءوزارا تۇسىنىستىكتى ورىستەتۋگە جول اشاتىن ۇزدىك مادەني داستۇرلەردى ساقتاۋدا ورنى ەرەك. سونى ۇمىتپايىق!
