حالىقارالىق تۇركى اكادەمياسىنىڭ پرەزيدەنتى دارحان قىدىرالى اشىپ, جۇرگىزىپ وتىردى. «بۇل كيەلى شاھاردا بارشا تۇركىنىڭ رۋحاني دىڭگەگى ازىرەتى قوجا احمەت ياساۋي بابامىز بەن اياۋلى حاندارىمىز بەن داناگوي بيلەرىمىز ماڭگىلىككە تىنىم تاپقان. بۇگىن, مىنە وسى ياساۋي داۋىرىندە, قاستەرلى تۇركىستان توپىراعىندا بۇدان 1000 جىل بۇرىن تۇركى تىلىنە اۋدارىلعان قاسيەتتى «قۇران كارىم» كىتابىنىڭ سالتاناتتى تۇساۋكەسەرىنە جينالىپ وتىرمىز. ەلباسى نۇرسۇلتان ءابىش ۇلى نازارباەۆ پەن تۇركيا پرەزيدەنتى تايىپ رەجەپ ەردوعاننىڭ العى سوزىمەن جارىق كورگەن بۇل قاسيەتتى قۇران-كارىمنىڭ باسىلۋىنا ىقپال جاساپ, سەپتەسكەن تۇركى مەملەكەتتەرىنىڭ باسشىلارى شارامىزعا قولداۋ ءبىلدىرىپ وتىر. تۇركىستاننىڭ يسلام وركەنيەتىنىڭ ەجەلگى التىن بەسىگى ەكەنىنە تاعى ءبىر مارتە ايعاق بولارلىق ايتۋلى شاراعا تۇركى دۇنيەسىنىڭ كورنەكتى تۇلعالارى, قاناتتاس ۇيىم باسشىلارى, باۋىرلاس ەلدەردىڭ ديپلوماتتارى قاتىسۋدا», دەدى دارحان قىدىرالى.
قاسيەتتى قۇران-كارىمنىڭ تۇساۋكەسەر سالتاناتىنا تۇركسوي ۇيىمىنىڭ باس حاتشىسى كاسەينوۆ دۇيسەن قوراباي ۇلى مەن «بىلگە تۇرىك مادەنيەت قورى» باسقارما باسشىسى, ەكس-گۋبەرناتور تۋنا گۇنگور ازيم مىرزا ورتاعا شاقىرىلىپ, تۇساۋكەسەر ءراسىمى وتكىزىلدى. اتالمىش كيەلى كىتاپتىڭ ەكى داناسى وبلىس اكىمىنىڭ ورىنباسارى ساكەن قالقامانوۆقا جانە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى جانار تەمىربەكوۆاعا تابىس ەتىلدى. ياعني كىتاپ تاۋەلسىزدىكپەن قۇرداس ءارى ەكى ەل اشقان وقۋ ورنىنداعى جانە جاقىندا ەلباسى جوعارى باعا بەرگەن وبلىس ورتالىعىنداعى كىتاپحاناعا قويىلادى. كونفەرەنتسياعا, سونداي-اق سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ەرجان مۇقاشەۆ, اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ توراعاسى ەرجان نۇكەجانوۆ, تۇركيا رەسپۋبليكاسىنىڭ الماتى قالاسىنداعى باس كونسۋلى الي ريزا اكىندجى, «بىلگە تۇرىك» مادەنيەت قورىنىڭ باسقارما توراعاسى, ەكس-گۋبەرناتور گۋنگور ازيم تۋنا سونىمەن قاتار زيالى قاۋىم وكىلدەرى مەن تانىمال عالىمدار قاتىستى.
حالىقارالىق تۇركى اكادەمياسى باسىپ شىعارعان كىتاپ ءبىزدىڭ زامانىمىزعا جەتكەن قۇران اۋدارماسىنىڭ ەڭ كونە ءارى تولىق نۇسقاسى سانالادى. بۇگىندە بۇل قولجازبا ىستامبۇل قالاسىنداعى تۇرىك جانە يسلام ونەرى مۋزەيىندە ساقتاۋلى تۇر. تۇركىستان توپىراعىندا تۋىپ, جەتىلگەن عۇلامالار سۋسىنداعان مىڭجىلدىق مۇرا وسىلايشا تۇركولوگيا, ءتىل دانە ءدىن ماسەلەلەرىنە قىزىعۋشىلىق تانىتاتىن عالىمدار مەن ىزدەنۋشىلەرگە قولجەتىمدى بولىپ, تولىق فاكسيميلە نۇسقاسىندا تۇڭعىش رەت جاريالانىپ وتىر.
كەلەلى كەڭەسكە قاتىسۋشىلار ەلباسى باستاماسىمەن قايتا تۇلەگەن تۇركىستان جانە ونىڭ تۇركى الەمىندەگى ماڭىزى تۋرالى ويلارىن ورتاعا سالىپ, باۋىرلاس ەلدەردىڭ بىرلىگى جايىندا پايىمدى پىكىرلەرىمەن ءبولىستى.
