ۋچاسكەلىك پوليتسيا ينسپەكتورلارى ينستيتۋتى – ىشكى ىستەر ورگاندارى جۇيەسىندەگى ەڭ كوپفۋنكتسيونالدى ينستيتۋت. ولار ازاماتتاردىڭ قۇقىقتارىن قورعاۋ, وتباسىلىق-تۇرمىستىق زورلىق-زومبىلىق, قۇقىقتىق ءتارتىپ پەن جول قاۋىپسىزدىگىن قامتاماسىز ەتۋ, كوشى-قون, قورشاعان ورتانى قورعاۋ, اۋماقتاردى اباتتاندىرۋ جانە باسقا دا ماسەلەلەرگە قاتىسادى. سونداي-اق قىلمىستىڭ 12 قۇرامى بويىنشا, ونىڭ ىشىندە ەسىرتكىنى زاڭسىز پايدالانۋ, جانۋارلارعا قاتىگەزدىك تانىتۋ, زاڭسىز اڭ اۋلاۋ جانە اعاشتاردى جويۋ بويىنشا قىلمىستىق ءىس جۇرگىزەدى. ۋچاسكەلىك ينسپەكتورلار اكىمشىلىك قۇقىق بۇزۋشىلىقتىڭ 47 قۇرامىن ءوز بەتىنشە قارايدى جانە جازا قولدانادى.
«جالپى, ۋچاسكەلىك پوليتسيا - بۇل قۇقىق بۇزۋشىلىقتىڭ الدىن الۋدىڭ جالپى جۇيەسىندەگى نەگىزگى بۋىن. تەك ولار عانا تۇراقتى نەگىزدە حالىقپەن جەكە بايلانىستا بولادى, ال كەيبىر اۋىلداردا ۋچاسكەلىك پوليتسيا قىزمەتكەرى – قۇقىق قورعاۋ ورگاندارىنىڭ جالعىز وكىلى. بۇل جەردە ول زاڭدىلىق پەن اۋىل تۇرعىندارىنىڭ تىنىشتىعىنىڭ كەپىلى», دەدى كوميتەت باسشىسى.
ۋچاسكەلىك پوليتسەيلەر ەسەپتە تۇرعان ازاماتتار مەن پروباتسيادا جۇرگەن تۇلعالارعا باقىلاۋ جاسايدى. ناشاقور جانە بۇرىن سوتتالعان ازاماتتاردىڭ ءتارتىبىن قاداعالايدى. قازىرگى كەزدە پوليتسيا ەسەبىندە وسىنداي 100 مىڭعا جۋىق ازامات تۇر.
