دەنساۋلىق ساقتاۋ ءمينيسترى الەكسەي تسوي «قالالىق العاشقى مەديتسينالىق-سانيتارلىق كومەك ورتالىعى» جشس جانىنداعى №1 وتباسىلىق دەنساۋلىق ورتالىعىنا باردى. بۇل ورتالىقتىڭ بازاسىندا COVID-19-عا قارسى العاشقى ۆاكتسينالاۋ ورتالىعى ۇيىمداستىرىلدى. مينيستر مۇندا ۆاكتسينانى ساقتاۋعا ارنالعان توڭازىتقىش جابدىققا قوسا, پروتسەدۋرانىڭ قاۋىپسىزدىگى ءۇشىن بارلىق جاعدايدىڭ قانشالىقتى جاسالعانىن قاراپ, ەكپە سالدىرعىسى كەلەتىندەردى قابىلداۋ الگوريتمىنىڭ ساقتالۋىنا كوز جەتكىزدى. ول پاتسيەنتتەرمەن اڭگىمەلەسىپ, حال-جاعدايىن سۇراپ, ۆاكتسينالاۋ پۋنكتىندە جاسالعان جاعداي تۋرالى پىكىرلەرىن مۇقيات تىڭدادى.
«بۇگىنگى تاڭدا وڭىردە ەپيدەميالىق احۋال وڭالماي تۇر. كۆي-ءدىڭ ودان ءارى تارالۋىنا جول بەرمەۋ ءۇشىن ۆاكتسينالاۋ قارقىنىن جەدەلدەتۋ جانە حالىق اراسىندا يممۋندىق قابات قۇرۋ قاجەت. ۇيدە ەمدەۋدى جولعا قويۋ, ناۋقاستىڭ جاعدايىن امبۋلاتوريالىق دەڭگەيدە باقىلاۋ ماڭىزدى», دەدى ۆەدومستۆو باسشىسى.
ا.تسوي العاشقى مەديتسينالىق-سانيتارلىق جانە ستاتسيونارلىق كومەك دەڭگەيىندە ۇيلەستىرۋدى كۇشەيتۋگە, قاۋىپ توبىنىڭ وكىلدەرىمەن, سوزىلمالى اۋرۋلارى بار پاتسيەنتتەرمەن جانە قارت ادامدارمەن جۇمىس ىستەۋگە ەرەكشە نازار اۋداردى. سونىمەن قاتار كۆي بويىنشا وڭىردەگى جاعدايعا جالپى باسشىلىقتى, ونىڭ ىشىندە پاتسيەنتتەردى باعىتتاۋدى, امبۋلاتوريالىق جانە ستاتسيونارلىق دەڭگەيدە ەمدەۋدى, مۇقتاج پاتسيەنتتەردى ۋاقتىلى ەمدەۋگە جاتقىزۋدى, مساك پەن ستاتسيونارلار اراسىنداعى اۋىسۋلاردى قامتاماسىز ەتۋ قاجەت.
COVID-19-عا قارسى يممۋنداۋ بويىنشا ۆاكتسينالاۋ ورتالىعى 1 اقپاننان باستاپ جۇمىس ىستەپ جاتىر. وندا 3 ەگۋ كابينەتى, 3 دارىگەردىڭ قابىلداۋ كابينەتى, 20 ادامعا باقىلاۋ ايماعى بولىنگەن. دەنساۋلىق ساقتاۋ باسقارماسىنىڭ مالىمەتىنشە, 1 اقپاننان باستاپ قاراعاندى وبلىسىندا 70 189 تۇرعىندى ۆاكتسينالاۋ اياقتالدى. 20 مامىرعا دەيىن 149 352 ادام ءبىرىنشى كومپونەنتپەن ۆاكتسينا الدى. ونىڭ ىشىندە QazVac-تى 1 875, Sinopharm-دى 5 865 ادام سالدىردى. ال ەكىنشى كومپونەنتپەن ۆاكتسينا العاندار – 80 201 ادام.
جالپى قاراعاندى وبلىسىندا كوروناۆيرۋس ينفەكتسياسىن جۇقتىرۋدىڭ 28 876 جاعدايى تىركەلگەن. ىندەتتەن 341 ادام قايتىس بولعان, ونىڭ ىشىندە نەگىزىنەن 60 جاستان اسقان جانە سوزىلمالى اۋرۋلارى بار ادامدار بار.
مينيستر بۇدان كەيىن احۋالدىق ورتالىققا بارىپ, بۇل باعدارلامالىق كەشەندى تولىق كولەمدە پايدالانۋدى, ونىڭ ىشىندە مۋلتيديستسيپلينارلىق كونسۋلتاتيۆتىك دارىگەرلىك توپتاردى, كۆي-مەن كۇرەس شەڭبەرىندە قابىلداناتىن شارالار بويىنشا مساك ۇيىمدارىنىڭ قىزمەتىنە تالداۋ جۇرگىزۋدى تاپسىردى.
ا.تسوي وسى جۇمىس ساپارى بارىسىندا كوروناۆيرۋس ينفەكتسياسىمەن كۇرەس جونىندەگى وڭىرلىك شتاب وتىرىسىن وتكىزدى. وندا قاراعاندى وبلىسى دەنساۋلىق ساقتاۋ باسقارماسىنىڭ باسشىسى گامال توقسامباەۆ وڭىردە پاندەميامەن كۇرەسكە باعىتتالعان بىرقاتار ءىس-شارا ۇيىمداستىرىلعانىن مالىمدەدى. ايتالىق, ينفەكتسيالىق گوسپيتالدىق ينفراقۇرىلىمدى دامىتۋ, اۋرۋدى ەرتە انىقتاۋ ءۇشىن مەديتسينالىق كومەك كورسەتۋدى جەتىلدىرۋ, ءۇي ستاتسيونارلارى جاعدايىندا ۋاقتىلى وقشاۋلاۋ جانە ەمدەۋ سياقتى شارالار قولعا الىندى. بۇعان قوسا ستاتسيونارلار مەن ەمحانالاردا قاجەتتى دارىلىك زاتتاردىڭ, مەديتسينالىق بۇيىمداردىڭ جانە جەكە قورعانىش قۇرالدارىنىڭ ءۇش ايلىق قورى قۇرىلدى.
گ.توقسامباەۆ الداعى ۋاقىتتا ەپيدەميالىق جاعدايدىڭ تۇراقتانۋى جانە سىرقاتتانۋشىلىقتىڭ بىرتىندەپ تومەندەۋى كۇتىلەتىنىن اتاپ ءوتتى.
قاراعاندى وبلىسى
