شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, پوليتسيا قىزمەتكەرلەرى ۇلتتىق قاۋىپسىزدىك كوميتەتىمەن بىرلەسىپ, وڭتۇستىك وڭىردەن شىعىسقا ەسىرتكى زاتتارىن جەتكىزۋمەن اينالىسقان قىلمىستىق توپتىڭ جولىن كەسۋ ءۇشىن ارنايى وپەراتسيا وتكىزگەن.
ء«ساۋىر ايىنىڭ سوڭىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى بۇرىن سوتتى بولعان جامبىل وبلىسى تۇرعىنىنىڭ سىبايلاستارىمەن بىرگە ەسىرتكى ارنالارىن ۇيىمداستىرىپ وتىرعانى تۋرالى اقپارات العان. ول ماريحۋانا مەن گاشيشتى جۇك كولىگىندەگى جاسىرىن ورىنعا سالىپ, وسكەمەن قالاسىنا وتكىزۋ ءۇشىن جەتكىزىپ وتىردى. وسى سحەمانىڭ بارلىق قاتىسۋشىلارى, ونىڭ ىشىندە ەسىرتكىنى شاھار تۇرعىندارىنا ساتۋدى تىكەلەي جۇزەگە اسىرعان ادامداردىڭ جەكە باستارى انىقتالعاننان كەيىن قۇقىق قورعاۋشىلار ولاردى ۇستاۋعا كىرىستى», دەپ حابارلادى ۆەدومستۆو وكىلدەرى.
باستاپقىدا ەسىرتكى وتكىزگەن 43 جاستاعى قالا تۇرعىنى ۇستالدى. ودان 1,5 كەلى ماريحۋانا تاركىلەنگەن. سودان كەيىن گاراج كووپەراتيۆتەرىنىڭ بىرىنەن ەسىرتكى قويماسى تابىلدى, وندا «قويماشى» دەگەن لاقاپ اتى بار 40 جاستاعى وسكەمەن تۇرعىنى قالاعا اكەلىنگەن ەسىرتكىنى ساقتاپ كەلگەن. ول جەردەن 74 كەلىدەن استام ماريحۋانا مەن 1,7 كەلى گاشيش الىندى.
ارنايى وپەراتسيانىڭ سوڭعى كەزەڭىندە وبلىس ورتالىعىنا اسا ءىرى كولەمدەگى ەسىرتكىنى تاعى دا اكەلۋ كەزىندە 50 جاستاعى جامبىلدىق قۇرىقتالدى. ونىڭ باسقارۋىنداعى جۇك كولىگى شاناعىنىڭ الدىڭعى بولىگىندەگى ارنايى جابدىقتالعان جاسىرىن ورىننان 300 كەلىدەن استام ماريحۋانا جانە 8 كەلىگە جۋىق گاشيش تابىلعان.
«وسى ەسىرتكى ارناسىن جويۋ بارىسىندا 380 كەلىدەن استام ءارتۇرلى ەسىرتكى زاتتارى الىندى. قازىرگى ۋاقىتتا كۇدىكتىلەرگە قاتىستى قر قك-ءنىڭ 297-بابىنا سايكەس تەرگەۋ امالدارى جۇرگىزىلۋدە. اتالعان قىلمىس ءۇشىن ولار 15 جىلعا دەيىنگى مەرزىمگە باس بوستاندىعىنان ايىرىلۋى مۇمكىن». الدىن الا مالىمەت بويىنشا تاركىلەنگەن ەسىرتكى زاتتارىنىڭ «قارا نارىقتاعى» قۇنى 320 ميلليون تەڭگەدەن اسادى», دەدى شقو پد باستىعى, پوليتسيا پولكوۆنيگى ساعات ماديەۆ.
