ايماقتار • 18 مامىر، 2021

قوستاناي وبلىسىندا قىزعالداقتار فەستيۆالى ءوتتى

10 رەت كورسەتىلدى

قوستاناي وبلىسىندا جىل سايىن كوكتەمدە ءداستۇرلى تۇردە ۇيىمداستىرىلىپ تۇراتىن قىزعالداقتار فەستيۆالى بيىل «اينالدىم سەنى، اتامەكەنىم!» دەگەن اتپەن ءوتتى، دەپ حابارلايدى Egemen.kz.

ءۇش بولىمنەن تۇراتىن مادەني شارا بارىسىندا اقىندار «قىزعالداقتى قۇت مەكەن» تاقىرىبىندا ارناۋ ولەڭدەرىن وقىسا، قول ونەر شەبەرلەرى «ونەرلىنىڭ قولى ورتاق» اتالىمى بويىنشا سىنعا ءتۇستى. ال بيشىلەر اراسىندا «قىزعالداقتار ءبيى» ونلاين حورەوگرافيالىق بايقاۋى ۇيىمداستىرىلدى.

فەستيۆال «رۋحاني جاڭعىرۋ» باعدارلاماسى اياسىندا وبلىستىق مادەنيەت باسقارماسىنىڭ جانىنان جۇمىس ىستەپ جاتقان «كوركەمونەرپازداردىڭ حالىق شىعارماشىلىعى مەن كينوبەينەقور ورتالىعىنىڭ» ۇيىمداستىرۋىمەن ءوتتى.

«ەلباسى نۇرسۇلتان نازارباەۆتىڭ « ۇلى دالانىڭ 7 قىرى» اتتى باعدارلامالىق ماقالاسىندا «بۇگىندە جەر جۇزىندە قىزعالداقتىڭ 3 مىڭنان استام ءتۇرى بار ەكەنى، ولاردىڭ باسىم كوپشىلىگى – ءبىزدىڭ دالا قىزعالداعىنىڭ «ۇرپاعى» ەكەنى، قازىر قازاقستاندا قىزعالداقتىڭ 35 ءتۇرى وسەتىنى» ايتىلعان. بۇل فەستيۆالدىڭ نەگىزگى ماقساتى دا وسى ماقالادا ايتىلعان قۇندى ويلاردى ناسيحاتتاۋ، وسكەلەڭ ۇرپاقتىڭ بويىنا دارىتۋ، سول ارقىلى ەل ىشىندەگى قاراپايىم ونەر ادامدارىنىڭ ەڭبەگىن دارىپتەۋ بولىپ تابىلادى.
قىزعالداق – قوستاناي وبلىسىنىڭ ەلتاڭباسىندا بەينەلەنگەن»، دەدى ورتالىق جەتەكشىسى ءدامىر قالقاەۆ.

ءىس-شارا اياسىندا امانگەلدى، جانگەلدين، ناۋىرزىم، قامىستى، اۋليەكول اۋداندارى مەن ارقالىق قالالارىنىڭ ۇجىمدارى ونەر كورسەتتى. «قىزعالداقتى قۇت مەكەن» ونلاين ارناۋلار بايقاۋىندا ءى ورىندى جانگەلدين اۋدانىنان بۇركىتباي فاريزا، ءىى ورىندى ارقالىق قالاسىنان اپباسحان بالعىن، ءىىى ورىندى امانگەلدى اۋدانى ەسىر اۋىلىنان بالتاسار تۇرىسبەك ۇلى سىندى اقىندار يەلەندى.

«قىزعالداقتار ءبيى» ونلاين ايماقتىق حورەوگرافيالىق بايقاۋىندا ايگەرىم بالعىنباەۆا جەتەكشىلىك ەتەتىن ارقالىقتاعى «اقبوتا» حالىق بي ءانسامبلى جەڭىس تۇعىرىنان كورىندى. ەكىنشى ورىنعا جانگەلدين اۋدانىنىنىڭ «ەركە ناز» بي ءانسامبلى لايىق دەپ تانىلسا، «قىزعالداقتاي ەركە قىز» ءبيىن ورىنداعان امانگەلدى اۋدانىنىڭ ءمولدىر عابدىبەكوۆا جۇلدەلى ءۇشىنشى ورىنعا يە بولدى. 

ونلاين تۇردە وتكەن فەستيۆالدە جۇلدەگە ىلىككەن بارلىق ونەرپازدارعا ارنايى ديپلومدار مەن جانە قارجىلاي سىياقى تابىس ەتىلدى.

سوڭعى جاڭالىقتار

ۇقساس جاڭالىقتار