«قۇرمەتتى مۋزەي ءىسىنىڭ ماماندارى!
سىزدەردى 18 مامىر حالىقارالىق مۋزەي كۇنىمەن شىن جۇرەكتەن قۇتتىقتايمىن!
مۋزەي – كەشەگى تاريحتى بۇگىنگى كۇنمەن بايلانىستىرىپ, ونى كەيىنگى ۇرپاققا ۇلىقتايتىن, سىناپتاي سىرعىعان ۋاقىتتى پايدالى وتكىزۋگە, تانىم كوكجيەگىن كەڭەيتۋگە مۇمكىندىك بەرەتىن əمبەبەپ ورتالىق. Əر مۋزەي ءوز الدىنا بوياۋى قانىق, ايتار ويى انىق وزگەشە ءبىر əلەم.
بار عىلىمنىڭ جەتىستىگىن باياندايتىن جəنە تاريح تاعلىمىمەن تانىستىراتىن مəدەني وردا ۇرپاق جالعاستىعى مەن əلەم حالىقتارىن ارىپتەستىككە باستايتىن التىن كوپىر اتانىپ ۇلگەردى. وسى ورايدا مۋزەيلەر تۋريزممەن بىتە قايناسىپ, دەمالىستىڭ اجىراماس بولىگىنە اينالعانى بۇل سالانىڭ قىزمەتىن جاڭا باعىتتا جالعاستىرۋعا جول اشادى.
بۇگىنگى ورايلى ءسəتتى پايدالانا وتىرىپ, قورداعى ماتەريالداردى تىركەيتىن, ەكسپوناتتاردى ساقتاۋ مەن ولاردى حالىققا تانىستىرۋعا دەيىنگى كوزگە كورىنبەيتىن جۇمىستىڭ ءبəرىن ىستەيتىن سالا قىزمەتكەرلەرىنىڭ ۇشان-تەڭىز ەڭبەگىنە العىس ايتامىن.
الداعى ۋاقىتتا دا بىرنەشە ءداۋىردىڭ تاريحىن, ەتنوگرافياسىن, تاريحي تۇلعالارىن, ونەرىن جيناقى تۇردە ۇسىناتىن, جيناقتالعان مۇرانى عىلىمي اينالىمعا ەنگىزەتىن ينستيتۋتتىڭ قىزمەتى جاندانىپ, كەلۋشىلەرىنىڭ قاتارى قالىڭ بولسىن!», دەپ جازىلعان قۇتتىقتاۋ حاتىندا.
