ونەر • 13 مامىر، 2021

جازعا سالەم جولدايىق

13 رەت كورسەتىلدى

جاز تاياپ قالدى. ال استانادا ورىك اعاشى ەندى گۇلدەپ جاتىر. انە-مىنە ادەتتەگىدەي وڭتۇستىكتە شيە جەمىسى قىزدىڭ ەرنىندەي قىزارعالى تۇر. كارانتيندەگى كوكتەمنىڭ قاي قىلىعىنا تامساناسىڭ. كوبىكتەي جەڭىل، تابىتتاي اۋىر كۇندەر كۇنتىزبەدەن قۇلاۋدا.

ەرتەڭىنەن ءۇمىت كۇتەتىن ەجەلگى قازاقتىڭ ادەتىنشە جازعىتۇرىم ورناپ، جاقسىلىقتىڭ جۇپار ءيىسىن جۇتۋعا بەيىمبىز. بەتپەردە بورتەگۇل ءيىسىن سەزدىرمەدى. وسىندايدا جايلاۋعا تارتا جونەلسە عوي دەيسىڭ. ءتوزىمىمىزدى توزدىرعان تاۋلىكتىڭ ەرەجەسىنە باعىنباي، سامال اۋامەن ەركىن تىنىستايتىن.

بەينەلەۋ ونەرىنە قاتىستى تەرمين­دەردى ءتىزىپ جازۋعا بولار ەدى، بىراق ءبىز ءوزىمىزدىڭ كوڭىل تارازىمىزبەن ولشەگەندى ءجون كوردىك. ەندىگى اڭگىمە قازاقتىڭ باعىنا بەرگەن داڭقتى سۋرەتشى ءابىلحان قاستەەۆتىڭ «جايلاۋ» كارتيناسى تۋرالى. قۇلانيەكتەنىپ تاڭ اتىپ كەلە جاتقاندا قوزى-لاقتى ەنە­سىنەن ءبولىپ، كوككە ايداۋعا شىعاتىن كەشەگى جاستىقتىڭ جاسىل بوياۋ­ى. جەل­مەن جارىسقان، يتپەن الىسقان قويشى بالالارىنىڭ تۇمسا تابيعات توسىندە اسىر سالعان مەرەيلى مەزەتتەرى. اۆتور­دىڭ بالالىق شاعىنا سالەم-ساۋقا­تىنداي جاسامپاز بەينە. قارا دا، ءوزىڭدى كور. كارتينادا ءسىزدىڭ دە بالداۋرەن كۇندەرىڭىزدىڭ جاڭعىرىعى بار.

جاستىق شاعى وتكەن اسقار تاۋلار، كوكپەن تىلدەسكەن زەڭگىر قۇز-جارتاستار، بيىك بەتكەيلەردەگى ارشا مەن قاراعايدىڭ كىلەمدەگى ورنەكتەي تىزىلگەن سۇلۋلىعى بولا­شاق سۋرەتشى جۇرەگىنىڭ قىلىن شەرت­كەندەي. وزەننىڭ بەرگى جاعاسىنداعى سازداققا جايىلعان مال تاۋلى ءوڭىردىڭ ءسانىن كەلتىرىپ تۇر. «جايلاۋ كوركى – مال» دەگەن قازاق ماقالى وسىندايدا ايتىلسا كەرەك. جول بويىندا كەتىپ بارا جاتقان ادامدار بەينەسى الىستان ەمىس-ەمىس بايقالادى. باسىن قار باسقان زەڭگىر تاۋلار تاكاپپار ءور مىنەزىمەن سۇستانا قارايدى. تاۋ ەتەگىندەگى تەرەڭ سايلار سالالانىپ ەرەكشە كورىنەدى. سارعىش قوڭىرقاي توبە قانداي اسەم ەدى. بۇل كورىنىسكە تامسانىپ تا، تاڭعالىپ تا قاراي بەرەسىڭ...

تاكاپپار تاۋلاردىڭ ۇشار باسىنا شىعىپ، بالا كۇندەگىدەي مۇقا­عا­ليدىڭ ولەڭىن وقىسا، شىركىن! ماڭ­دايىڭدى سامال جەلدىڭ الاقانى سيپاپ، كەۋدەڭە قانات بىتكەندەي، كۇيبەڭ تىر­لىكتەن ءبىر ساتكە ادا كۇي كەشەرىڭىز ءشۇباسىز.

مەن – تاۋلىقپىن!

تاۋدان مەن جاراتىلعام.

تاۋ دەگەن – انا تۋعان، دارا تۇلعام!

...تاۋعا بارىپ

كوككە ۇشىپ كەتسەم بە ەكەن،

ۇستاپ الىپ قىراننىڭ قاناتىنان.

ادامعا قانات بىتىرەتىن ارمانى دەسەك، ەڭ العاش ارمان تۇزگەن توپىراققا نەگە تاعزىم ەتپەسكە؟ مۇراتىمدى الديلەگەن وسى جايلاۋ ەدى. مىناۋ عاجاپ كارتينا سونى قايتا ەسكە ءتۇسىردى. جازعا سالەم جولدايىق!

سوڭعى جاڭالىقتار

كەڭەستەردىڭ قىزمەت اياسى كەڭەيدى

قازاقستان • بۇگىن، 08:37

5 جىلدا – 2 ملرد اعاش

قازاقستان • بۇگىن، 08:36

ءسۇت زاۋىتىنداعى سىناق

ايماقتار • بۇگىن، 08:27

«قارا باۋىر قاسقالداق»

رۋحانيات • بۇگىن، 08:25

ەكىدىڭ ماڭىنداعى ەسكەرتكىشتەر

ايماقتار • بۇگىن، 08:22

كۇي – قازاقتىڭ قازىناسى

رۋحانيات • بۇگىن، 08:19

جۇرەك جىلۋى جان جادىراتادى

ايماقتار • بۇگىن، 08:18

دونور بولۋ – ۇلكەن دارەجە

قوعام • بۇگىن، 08:14

قايران، التىن ارالىق...

قوعام • بۇگىن، 08:07

قانداي اكىم جۇرتقا جاقىن؟

قازاقستان • بۇگىن، 08:04

ۇقساس جاڭالىقتار