ارىس اۋداندىق پوليتسيا ءبولىمىنىڭ كەزەكشى بولىمىنە جەرگىلىكتى تۇرعىننىڭ ءبىرى حابارلاسىپ, كومەككە شاقىرعان. ول اقىنبەكوۆ كوشەسى بويىنداعى كارىز قۇدىڭعىن تازالاۋعا تۇسكەن قىزمەتكەرلەر شىعا الماي قالعانىن ايتقان. حابارلامانى الىسىمەن سول اۋماققا بەكىتىلگەن ۋچاسكەلىك پوليتسيا ينسپەكتورى باقىتجان جاقسىلىق پەن ونىڭ ارىپتەسى اسانحان سىزدىقوۆ ەكەۋى 2-3 مينۋت ىشىندە وقيعا ورنىنا جەتكەن.
پوليتسەيلەر كەلگەندە قىزمەتكەرلەر قۇلاپ كەتكەن كارىز قۇدىعىنىڭ اينالاسىندا بىرنەشە تۇرعىندار قاۋمالاپ كومەكتەسپەك بولىپ تۇرعان. ءتارتىپ ساقشىلارى, تۇرعىندارمەن بىرگە ءتورت مەترگە جۋىق تەرەڭدىككە قۇلاعان ادامنىڭ ءبىرىن جىپپەن تارتۋ ارقىلى بەس مينۋتقا جەتەر-جەتپەس ۋاقىتتا شىعارىپ الادى. كارىزدەگى يىستەن ۋلانعان تۇرعىندار جەدەل جاردەمدەگى دارىگەرلەرگە تاپسىرىلىپ, اۋرۋحاناعا جەتكىزىلدى.
بەلگىلى بولعانداي, كارىز (كاناليزاتسيا) تازالاۋعا جۇمىسقا كەلگەن قىزمەتكەرلەر تومەنگە تۇسكەندەرىندە بەلدەرىندەگى ءجىپ ءۇزىلىپ كەتكەن. ءبىرى قۇدىقتىڭ بەتكى جاعىندا ءىلىنىپ قالسا, ەكىنشىسى تەرەڭىنە بارىپ قۇلاعان. جانساقتاۋ بولىمىنە تۇسكەن ەكى قىزمەتكەردىڭ دە جاعدايى جاقسى.
