الەم • 11 مامىر، 2021

كيبەرشابۋىل كەسىرىنەن مۇناي قۇبىرى ىستەن شىقتى

12 رەت كورسەتىلدى

اقش-تا كيبەر شابۋىل كەسىرىنەن ەلدەگى ەڭ ۇلكەن مۇناي قۇبىرىنىڭ ءبىرى – Colonial Pipeline ىستەن شىقتى. اتالعان كومپانيا شىعىس جاعالاۋدىڭ 45 پايىزىن جانارمايمەن قامتاماسىز ەتەدى.

Colonial Pipeline-ءنىڭ جالپى ۇزىندىعى 9000 شاقىرىمعا جۋىق، اقش-تىڭ 14 شتاتىن باسىپ وتەدى. قۇبىر نەگىزىنەن كولىك جانارمايىن، ديزەل جەتكىزۋمەن اينالىسادى. ەلدەگى 7 اۋەجايعا كۇنىنە 400 ميلليون ليتر جانارماي جەتكىزەدى. وسىنداي الپاۋىت كورپوراتسيانىڭ جۇمىسىنا كەدەرگى كەلتىرگەن – قاراپايىم كومپيۋتەرلىك ۆيرۋس.

«قازىرگى تاڭدا باستى ماقساتىمىز – قىزمەتىمىزدى قاۋىپسىز تۇردە قايتا قالپىنا كەلتىرىپ، جەتكىزۋ جۇمىستارىن جولعا قويۋ. بۇل جۇمىسقا كىرىسىپ كەتتىك»، دەلىنگەن كومپانيانىڭ تاراتقان مالىمدەمەسىندە.

ۆيرۋستىڭ قايدان كەلگەنىن انىقتاۋ ءۇشىن Colonial Pipeline ارنايى ماماندار شاقىرىپ، ءمان-جايدى ناقتىلاۋ ءۇشىن زاڭ ورگاندارىنا ارىز بەرگەن. شابۋىلدىڭ ناقتى سەبەبى مەن ونى كىمنىڭ جاساعانى بەلگىسىز.

 

Sinopharm ۆاكتسيناسى ماقۇلداندى

دۇنيەجۇزىلىك دەن­ساۋلىق ساقتاۋ ۇيىمى قىتاي بيلىگىنە تيەسىلى Sinopharm كومپانياسىنىڭ كوروناۆيرۋسقا قارسى ۆاكتسيناسىن شۇعىل تۇردە قولدانۋعا رۇقسات ەتتى.

ول – قىتايدا جاسالعان كوروناۆيرۋسقا قارسى ەكى ەكپەنىڭ بىرەۋى. قازىرگى تاڭدا بۇل ۆاكتسينا الەمدەگى ميلليونداعان ادامعا سالىندى. 

سونداي-اق ددۇ كەز كەلگەن جۇقپالى اۋرۋعا قارسى قىتاي ۆاكتسيناسىن  پايدالانۋعا رۇقسات بەردى. وسى اپتانىڭ باسىندا ددۇ-نىڭ جەكەلەگەن ساراپشىلارى Sinopharm كومپانياسىنىڭ جاناما اسەرلەر تۋرالى بەرگەن مالىمەتتەرىنىڭ ساپاسىنا الاڭداۋشىلىق بىلدىرگەن-ءدى. ددۇ-نىڭ توتەنشە جاعدايعا بايلانىستى ۆاكتسينانى قولدانۋعا رۇقسات ەتۋى ءونىمنىڭ قاۋىپسىزدىگى مەن تيىمدىلىگىن اڭعارتادى. سونداي-اق اتالعان ەكپەنى كەدەي ەلدەردى ۆاكتسينامەن قامتاماسىز ەتەتىن عالامدىق باعدارلاماعا ەنگىزۋگە مۇمكىندىك بەرەدى.

بۇعان دەيىن ددۇ بىرقاتار كومپانيانىڭ ءونىمىن قولدانۋعا رۇقسات ەتكەن ەدى. اتاپ ايتقاندا، Pfizer-BioNTech، AstraZeneca، Johnson & Johnson ۆاكتسينالارىن، وتكەن اپتادا Moderna جاساعان ەكپەنى قولدانۋدى ماقۇلدادى.

 

اۋعانستانداعى اپاتتى اپتا

اۋعانستان استاناسى كابۋلدا مەكتەپ ماڭىندا جارىلىس بولىپ، 58 ادام قازا تاپتى. 150-گە جۋىق تۇرعىن جاراقاتتاندى.

سەنبى كۇنى كەشكە جارىلعان بومبا قالانىڭ دەشتى-بارچي ماڭىن ءدۇر سىلكىندىردى. اتالعان ايماق بۇعان دەيىن دە دايش سودىرلارىنىڭ نىسانىنا ىلىككەن ەدى. ەشقانداي توپ سەنبىدەگى جارىلىس ءۇشىن جاۋاپكەرشىلىكتى ءوز موينىنا العان جوق.

اۋعانستان پرەزيدەنتى اشراف گاني شابۋىلدى ايىپتاعان مالىمدەمە جاسادى. سونداي-اق ول تاليباندى دا ايىپتادى. «تاليبان وزدەرىنىڭ زاڭسىز سوعىسى مەن زورلىق-زومبىلىقتارىن كۇشەيتە وتىرىپ، قازىرگى داعدارىستى بەيبىت جانە تۇبەگەيلى شەشۋدەن باس تارتقاندارىن جاعدايدى كۇردەلەندىرۋ ارقىلى تاعى دا كورسەتتى»، دەدى گاني. ال تاليبان بەيبىت تۇرعىندارعا باعىتتالعان شابۋىلدى ايىپتايتىنىن مالىمدەپ، وعان قاتىسى جوق ەكەنىن حابارلادى.

ەۋروپالىق وداقتىڭ اۋعانستانداعى ميسسياسى وقيعانى «قورقىنىشتى شابۋىل» دەپ مالىمدەدى. «بۇل – جەككورىنىشتى تەرروريستىك اكت. قىزدار وقيتىن مەكتەپكە جاسالعان شابۋىل – اۋعانستاننىڭ كەلەشەگىنە بالتا شابۋ، ەلىن دامىتاتىن بالالاردى ءولتىرۋ»، دەدى ميسسيا Twitter-دەگى پاراقشاسىندا.

 

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار