رۋحانيات • 07 مامىر، 2021

ەگەمەن ەلدىڭ ساربازى بولۋ – زور مىندەت ءارى جاۋاپكەرشىلىك

47 رەت كورسەتىلدى

قورعانىس مينيسترلىگىنىڭ 29011 اسكەري ءبولىمى – كاسپي تەڭىزىنىڭ قازاقستاندىق سەكتورىندا قازاقستان رەسپۋبليكاسىنىڭ مەملەكەتتىك شەكاراسىن، اۋماقتىق تۇتاستىعى مەن ەگەمەندىگىن، ەكونوميكالىق مۇددەلەرىن قورعاۋدى مىندەتىنە العان ماڭىزدى قۇرىلىم.

ال ەلىمىزگە كاسپي تەڭىزىنىڭ ەڭ ۇزىن تەڭىز جاعالاۋى تيەسىلى. وسى ەرەكشە مانگە يە اۋماقتى جات كوزدەن، ارام نيەتتىلەردەن قورعاۋ، بەرىكتىگىمىزگە قول سۇقتىرماۋ، سول ارقىلى اسكەري تەڭىز كۇشتەرىنىڭ ايبىنىن اسىرۋ – مىنە، ءبىزدىڭ باستى ماقساتىمىز وسى. قازىرگى ۋاقىتتا وسى اسكەري بولىمدە جاس ساربازداردى اسكەري ىسكە، وتانسۇيگىشتىككە باۋلىپ، اسكەري تەحنيكا مەن قارۋ-جاراقتى قولدانۋدى ۇيرەتىپ كەلەمىن.

مەن – تاۋەلسىزدىكتىڭ قۇرداسىمىن. سوندىقتان دا بولار، بالا كەزىمنەن حالىق قاھارمانى، ارميا گەنەرالى ساعادات نۇرماعامبەتوۆتىڭ قاھارماندىعى مەن قايراتكەرلىگىن وزىمە ۇلگى تۇتىپ ەرجەتتىم. باتىس قازاقستان وبلىسىنىڭ جالپاقتال اۋىلىندا تۋىپ-ءوستىم. اتا-انامنىڭ سەنىم ارتقان سۇيەنىشتەرى، ارتىمنان ەرگەن قوس قارىنداسىمنىڭ ارقا تۇتار اعاسى، جان جارىم مەن قىزىمنىڭ قورعانىمىن. ال اسكەري ومىردە ەل قورعانى بولار جاس ساربازدارعا، جان-جاعىما سوزىممەن دە، ىسىممەن دە ۇلگى بولار ناعىز كوماندير اتانۋ – باستى مىندەتىم. سەبەبى كوماندير بولۋ – ۇلكەن جاۋاپكەرشىلىك. ساپقا ەندى قوسىلعان ساربازعا ءجون سىلتەپ، جول باستاۋ ءۇشىن دە بويىڭدا  تەگەۋرىن بولۋى كەرەك.

ەگەمەن ەلدىڭ جاۋىنگەرى بولۋ – اتا-بابامىزدىڭ اق نايزانىڭ ۇشىمەن، اق بىلەكتىڭ كۇشىمەن ساقتاپ، ۇرپاعىنا امانات ەتكەن ۇلان-عايىر جەرىمىزدىڭ،  كيەلى تاۋەلسىزدىگىمىزدىڭ قورعانى بولۋ دەگەن ءسوز. ال ءبىزدىڭ ەنشىمىزگە وسى اسىل مۇرانى كوزىمىزدىڭ قاراشىعىنداي ساقتاۋ، دامىتۋ مەن نىعايتۋدىڭ ۇلكەن جاۋاپكەرشىلىگى بۇيىردى. ول ءۇشىن قاتارعا تۇرىپ، ساپ قۇرعان، ەل-جۇرتىنىڭ الدىندا وتانعا ادال قىزمەت ەتۋگە انت بەرگەن ءاربىر سارباز ءوز ەلىنىڭ ناعىز پاتريوتى بولۋى كەرەك. ارقاشان ىزدەنىپ، ءبىلىمىڭدى تولىقتىرۋ، ءوز-ءوزىڭدى دامىتىپ، قانداي سالادا قىزمەت ەتسەڭ دە ءوز قاتارىڭنىڭ ۇزدىگى بولۋعا تىرىسۋ قاجەت. قازىر بىزگە كەرەگى قارا باسىڭنىڭ ەمەس، قالىڭ ەلىڭنىڭ قامىن ويلاۋ، جۇرتىڭا جۇدى­رىقتاي بولسا دا پايدا الىپ كەلۋ بولىپ تۇر.

ەل تاۋەلسىزدىگىنىڭ 30 جىلىندا قازاقستان اسكەرىنىڭ الەۋەتى ايتارلىقتاي ءوستى. قازاقستان ارمياسىنىڭ ايبىنى اسقاقتاپ، ابىرويى جىلدان-جىلعا ارتىپ كەلەدى.

ەندىگى تىلەك – ەلىمىزدىڭ تىنىشتىعى مەن جۇرتىمىزدىڭ اماندىعى عانا. دۇنيە ءجۇزىن دۇر­لىك­تىرگەن مىنا ىندەتتەن امان-ەسەن شىعىپ، بۇرىنعى مامىراجاي قالىپتى ومىرىمىزگە تەزىرەك ورالايىق دەپ تىلەيمىن. قازاق ەلىنىڭ كوك اسپانىن بۇلت تورلاماسىن!

 

قۋانىشبەك جامانعارين،

29011-اسكەري ءبولىمى شتاب باتالونى كومەندانتتىق روتاسىنىڭ كومانديرى

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار